Read Mayangna Josué 6 Bible Online

Josué 6 - Mayangna bible

Josué 6

¹Jericó kidika muih as bik kanin dawak kalahnin bik sip awasdai, kat tawan nuhni dūrni balna kidika puputna dai Israel muihni balna niningna kaupak nandakna atnin yulni.

²Kaunah Dawan yaklau Josué yakat kalyulna: “Yang lawik Jericó tawanni nuhni kingni kidika kauna dawak yaihnit kau kalbauyang muihni balna duwa kidika kauna bik man tingma yakat anayang.

³Manna Israel muihni kalbauyang balna, ma tiaskauas pasyakat tawan nuhni yaihnit kidika awaihlana as awaihlatanauh ma bitik yakat.

⁴Aslah kalahnin lani baksni kidika tanit yakat sumalyang balna tiaskaubu uiwarang, witingna muihnina kat kat sīp almuk tamni kau trumpit yamna kidika as as duwi uiwarang, dawak ma tiaskaubu yakat laih sumalyang balna kidika trumpit puhwa bangkat manna laih wat tiaskaubu awaihlatanama.

⁵Manna dakanangkat trumpit balna kidika tanit yamni pupuhwarang mani kat, parasmana bitik palni sarahtanama, dawak tawan nuhni daklana kidika laih sau yakat bukwarang ki. Bahang manna muihnimana kat barangni yawanama tawan nuhni kidika niningyakat.”

⁶Bahang Josué yaklau sumalyang balna yakat diyulwak uiwakat aput diyulna: “Aslah kalahnin lani baksni Dawan dini kidika duta yawanauh, dawak manna kaupak muih tiaskaubu la baksni kidika tanit yakat sīp almuk tamni kau trumpit yamna kidika duta yawanauh.”

⁷Dawak tawan muihni balna yakat laih diyulna: “Yawa tawan nuhni kidika yakat awaihtanauh. Kalbauyang muihni balna kidika laih, Dawan lani baksni kidika tanityakat uiwang.”

⁸Josué yaklau ais yamnin diyulna dai kidika bitik yayamna dai. Sumalyang balna tiaskaubu kidika laih aslah kalahnin lani baksni Dawan dini kidika tanityakat trumpit balna tiaskaubu kidika puhwinah uina, dawak la baksni kidika laih witingna dangnitna yakat kiuna dai.

⁹Sumalyang balna laih trumpit balna kidika laihwatwas pupuhwakat Kalbauyang muihni balna kidika laih witingna tanitna yakat uina, dawak dangnit kau kalbauyang balna ūk aiwa kidika laih la baksni kidika dangnit yakat uina dai.

¹⁰Kaunah Josué yaklau kalbauyang muihni balna yakat diyulna dai ap lapakna atninna, witing yaklau angkat parasni sarahnin diyulwarang kidika kat.

¹¹Josué yaklau yamwakat Dawan lani baksni kidika tawan nuhni kidika yaihnit yakat awaihna dai. Usnit kat ūnina labanni yakat nawatwi uiwi payayahna dai.

¹²Kidika payahwakat, Josué laih mapiris palni yaklauna dawak sumalyang balna laih Dawan lani baksni kidika duduna dai.

¹³Sumalyang balna tiaskaubu kidika laih Dawan lani baksni kidika tanit yakat watwas lapapakna dai dawak trumninapit balna bik laihwatwas pupuhna dai. Kalbauyang muihni balna kidika laih witingna tanitna yakat uina dai dawak ūk balna kidika laih la baksni kidika dangnit yakat uina dai. Trumpit balna kidika laih laihwatwas pupuhna dai.

¹⁴Ma bu yakat watwi tawan nuhni kidika yakat awaihwi dawi ūnina labanni yakat nawatwi uina dai. Dawak kaput manah ma tiaskauas yayamna dai.

¹⁵Ma tiaskaubu yakat laih pukkau yaklauwi tawan nuhni kidika yaihnit yakat lapapakna dai, muhnilau kau yayamna dai kaput, kaunah kidika mani laih wat tiaskaubu awawaihna dai.

¹⁶Sumalyang balna yaklau trumpit wat tiaskaubu pupuhna mani kat, Josué yaklau muih balna yakat yamnin diyulna dai: “¡Sarahtanauh! Dawan yaklau tawan nuhni adika manna tingmana yakat ana.

¹⁷Tawan nuhni pasyakat di balna bangkidika bitik laih Papang dini yakwi daukalmuknin karangki, kat Dawan yaklau kaput yamnin yulna bahang. Rahab, yal as ahal manas karak kalpakwa muihni kidika dawak witing ūni yakat muih ūk yakmaldana bangkidika sangninaka manah wawatna karang, kat witing yaklau pakwi talnin muihni balna sihdak malmukna dai kidika yulni.

¹⁸Manna namangnakauh laih, tawan nuhni kidika pasyakat di balna bangkidika dunamna awaski dawak bik laihnamna awaski kat Dawan yaklau witing dini yakna daukalmukna atnin, kaput awas karang laih manna lawa Israel ūni labanni kidika minityakat latuhtanama dawak dalani wauhnin wahni kidika bik duaita kalatanama.

¹⁹Kaunah Gol, lalah dawak bras kau dawi ayan kau di yamna dini balna kidika laih Dawan dini yakwi witing lalahni baksni yakat ana karang.”

²⁰Muih balna kidika laih sararahna dawak trumpit balna kidika laih pupuhna dai. Israel muihni balna laih trumpit balna pupuhwa kidika dakawi parasni sararahna dawak tawan nuhni yaihnit kau daklana kidika laih sau yakat bukna dai. Bahang tawan nuhni kidika niningyakat barangni uikawi dakyayakna dai.

²¹Usnit kat muih ahal balna, yayal, wawahma dawak muihbararak balna yakat isparah baini kau ihina dai, dawak kidika minityakat turuh ahalmuk wark kalahyang balna, s-ip balna dawak biriku ahalmuk balna kidika bik ihina dai. Bitik palni imumukna dai.

²²Josué yaklau pakwi talyang muihni balna bu sau lakwi tatalna dai kidika yakat diyulna: “Yal as ahal manas karak kalpakyang muihni kidika yakat yawa ūni kaupak yaktanauh dini balna bitik karak, manna lawa witing yakat pramis kalyamnamana dai kaput.”

²³Witingna laih uikawi Rahab, papangni, nanangni, wirahni ahal balna dawak witing wanaihni balna bitik kau yayakna dai, dawak Israel muihni balna ūnina labanni kaupak naikau duwi uina dai.

²⁴Usnit kat Israel muihni balna yaklau tawan nuhni kidika dawak paskau di balna bangdai kidika bitik busmumukna dai. Lalah, gol dawak bras kau dawi ayan kau yayamna dini balna dai kidika manah yayakna dai, Dawan lalahni baksni kau ahana dai kidika.

²⁵Kaunah Josué yaklau Rahab dawi wanaihni balna sangninaka kidika kauna dana dai, kat Josué yaklau Jericó yakat pakwi talyang muihni balna sihwakat witing yaklau malna dai kidika yulni. Dawak kidika mani kaupak Rahab sulani balna kidika Israel muihni balna pasyakat yalalahwi.

²⁶Usnit kat Josué yaklau adika pranimis yamna dai: “Dawan minikpa yakat la kaltuhna karang angdika muihni yaklau Jericó tawanni nuhni dulautik yamkuhti kulwarang kidika. Witing walanibis barakni kidika minityakat ū rahni sau paskau kana kidika balna kau taihna karang dawak walanibis binkauh kidika minityakat laih dūr balna kidika kau taihna karang.”[3],

²⁷Dawan yaklau Josué yakat ilp kalana dai, dawak Josué ayangni nuhni kidika laih sau bitik yakat ka'yaklana dai.