Read Mayangna Josué 9 Bible Online

Josué 9 - Mayangna bible

Josué 9

¹Hitita, amorreo, cananeo, ferezeo, heveo dawak jebuseo kingni balna sauyak bubukna dai di kalahna kidika yulni. (Adika kingni balna yalalahwadai Jordán wasni kung makawa nining yakat, asang pas yakat, walang yakat dawak Mediterráneo kumani kung bitik kau Líbano sauni pīsni kat.)

²Bahang witingna bitik kau kalpakwi aslah kalahwi witing kalalahna Josué dawak Israel balna niningna yak yaklauna atnin.

³Kaput bik heveo balna Gabaón kau yalalahwa kidika laihwi tatalna Josué yaklauwi Jericó dawak Hai tawanni kau balna yamna kidika,

⁴alas diyulnin kulna. Mahka ta yak kalahwi lapapakna birininaku balna minit yakat di punin dini utuhni, dawak di unitak kau waih wasni umani, kidika balna laih biswak pislakna manah kat ihilna dai;

⁵kaput bik sihm sat asna bahni kalnina unitak bahni ahana dawak tanina yakat dis plawar busna bahni dawak suihni bik duduna.

⁶Gilgal ūni lababanni yakat uiwi kakana mani, Josué dawak Israel balna yak aput yuyulna dai: —Yangna sau nai kaupak aiwayangna. Manna yangna karak pramis as yamtanauh.

⁷Israel balna yaklau heveo balna yakat nangnitlalana: —Manna bik wais amanglawih mayaihkit akat yalahtamana pa; ¿dawak amput yangna manna karak pranimis yamtanaki yah?

⁸Kaunah witingna yaklauwi Josué yak kalyuyulna: —Yangna manna di mana yamtanaki. Witing yaklauwi di yulwi dakana: —¿Manna adika wais manah? ¿Angkaupak aiwamanah?

⁹Dawak witingna yaklauwi nangnitlalana: —Nai kaupak aiwa yangna, manna Papangmana Dawan ayangni nuhni daka yangna yulni. Yangna amanglatayangna witing yaklauwi Egipto yakat di yamna balna kidika,

¹⁰dawak Jordán wasni nahas kau amorreo kingni balna bupak dis yamna kidika bik, yuldarang kat, Hesbón kaupak Sihón yak dawak Basán kaupak Og kat, Astarot sauni kau yalalahwa dai balna yak.

¹¹Kidika bahang, yangna takinatuna balna dawak yangna aslah balna yangna kidi yangna kau yana yuyulna: ‘Manna ta yakat kasnamna dini duta dawak manna yawanauh witingna angkat bang yakat. Di yultanauh witingna pasningna yak maiahawang dawak witingna karak la pramis as yamnikna want yangna.’

¹²Yangna manna kau mana waltik alahwana yangna mani adika planiwar busna adika baisa daihni dai, dawak waralaih sanni laihna dawak suihni kalna.

¹³Kaput bik adika dini unitak balna adika wisam palni dai wain wasni puna mayang, dawak waralaih uman biswi daukalna. Dawak sihm kaput bik askina adika kaput kalahna dawak suskina bik ta naini lapakna yangna yulni.

¹⁴Israel balna yaklauwi gabaonita balna kasninna kidika laihwatwi tatalna, kaunah Dawan kau yul dakakawasdai.

¹⁵Bahang Josué yaklauwi witingna karak pri lani pramis as yamna. Sangnika pātni ban dawak disna atnin pramis yamna; dawak Israel tunan muihni ūk ūk balna bik sihm sat kaput yamnin pramis kalalahna.

¹⁶Ma bas bayakna usnitkauh, Israel balna amanglalana gabaonita balna kidika tawannina yaihnit yakaupak dai, dawak witingna kidika yaihnitna yak yalalahwadai.

¹⁷Bahang witingna gabaonita balna walwi kalahwi dawak ma bas kat tawannina nuhni yakat uiwi kakana kat witingna kidika Gabaón, Cafira, Beerot dawak Quiriat-jearim balna dai.

¹⁸Kaunah Israel balna ihiwas dadana, ampat dawak kat uman laih tunan muihni balna pramis yayamna dai Israel balna Daniwan dawi Papangni muhni tani yakat adika muihni balna sangninaka kauna didana atnin. Kidika yulni kat tawan muihni balna ahanwadai tunan muihni balna niningna yak,

¹⁹kaunah tunan muihni balna yaklauwi diyuyulna: —Yangna uman Dawan ayangni kau pramis yamna yangna, Israel Papangni yakat, manaitas awanaki. Kidika bahang, waralaih di as bik manayamtas yangna.

²⁰Mayang dadakat ban atninki, ampat dawakat kidika pramis bahpamdarang kat, Papang mayang kau anwarang.

²¹Kaput laih Israel tunan muihni balna adar diayawadai inin awas, sangka di danin, kauna witingna kidika tawan kuhni sahyang atnin, dawak tawan wasni butyang adika kidi tawan bitik laih yaihnit kat. Kaput munah tatuna balna praninamis kidika ban duwi uinadai.

²²Josué yaklau gabaón balna yulwi duaiwi didakawadai: —¿Ais yamta yangna kau alas yana yamta yulna manah manna tawan nai palni kaupak aiwamana, rahm palni karang kat manna ulis akat yalahtanama?

²³Kidika bahang manna dutni lani yakat mana kulna karang dawak ban atnin yak mana duna karang. Manna kidika Papangki ūni yak kuh dakyang dawi was butyang nid kalahwa kidi manna karangki.

²⁴Dawak witingna Josué yak nangnitlalana: —Yangna yamna yangna kidika kuduh uba palni manna kau yamaduna yangna, yanaitanama yulni, kat bukna yangna manna Papangmana Dawan yaklauwi Moses yak adar kalana dai adika sauni bitik kawi duna atnin dawak adika pīsni akat yalalahna balna bitik daukalmukna atnin.

²⁵Kaunah yangna tingmana yakat bangyangna; manna ais yanayamnin kultamana yakat yamtanauh.

²⁶Josué yulwas dana Israel balna yaklauwi gabaonita balna yakat ina atnin,

²⁷kaunah, kuh sahnin dawi was butnin warkni diana tawan bitik yulni kat dawak sakripais busnin pāni Dawan dini, Dawan yaklau walwi yakwarang pāni kidika. Dawak warmani kat bik gabaonita balna kidika warkni ban duduwi.