Read Mayangna 2 Tesalónica 3 Bible Online

2 Tesalónica 3 - Mayangna bible

2 Tesalónica 3

¹Witni kat, wanaih balna, yangna yulkina mamatna yultanauh, Dawan yulni kidika sirihni palni pa balna bitik yakat kiwi kana atnin dawak dalani lani karuk bik duna atninna yulni, manna pasmangna yakat kalahna kaput.

²Yangna yulkina mamatna yultanangkat muih dudutni balna tingnina kaupak pri alahwanakuh, kat witingna bitik laih rahm kulnin lani kidika diski.

³Kaunah Dawan laih barangni ki, dawak witing yaklau manna kidika barangni manaduna karang dawak dutni kidika niningyakat tamatna dakna karang.

⁴Dawak yangna Dawan yakat yamni kultayangna manna lawa di yamtamana kidika dawak tamatna yakat yamta yawanama kidika yangna lawik yamnin manayulnayangna kaput.

⁵Dawan yaklauwi ilp manana karang dalani lani kidika duna atnamna sihm Papang yaklau dalani lani duwa kapat dawak wauhnin balna yakat Krais parasni kidika duta atnamna.

⁶Wanaih balna, Madakiwan Jisas Krais ayangni usnit yakat yamnin manayuldi, wanaih as di dudutni yamwarang kat witing kaupak dakta alahwanama dawak yangna di balna amput yamtiningkat manna tala dunamana kidika, witing kaput yamnin awaski.

⁷Bahang manna amanglatamana amput yalahnamna kidika yangna di balna yamtayangna kaput yamta tamatna yakat yawana atnamna: yangna laih manna pasmangna yakat dutni lani as bik yamtasyangna,

⁸dawak muih as bik witing kasnin dini kidika dutik lautik kalatas yangna laih kastas yangna. Nawatkauh, madah pukta wark alahwayangna manna kaupak muih as bik witing truknin dini awas atnikna yulni.

⁹Dawak yangna rahmkina dutayangna dai manna yakat ilp manayulna atnikna, kaunah yangna wark alahwayangna manna lawa yangna yakat yanatala uskitna uinamna kidika.

¹⁰Yangna manna karak bangyangna dai mani, adika lani mananayangna dai: Angdika muihni wark kalahnin dukih kalawas kidika laih, di bik kaswas kawang.

¹¹Kaunah yangna amanglanayangna manna kaupak muih buas kidika wark yayamwas ki, dauh manah bangki di as bik yayamwas.

¹²Kidika muihni balna yakat yamninna diyuldi, Dawan Jisas Krais parasni kau, kulninna alasna wark kalalahwang sangka atninna yulni.

¹³Kaunah manna laih, wanaih balna, yamni yamnin kidika yakat manalunglaknin awaski.

¹⁴Angdika muihni yangna wauhtaya ultayangna akat ais yultayangna kidika yakat dakawi yamwas karang kat, manna talnauh wais kidika, dawak witing karak kalpapakwinih, witing yakasaldana atnin yulni.

¹⁵Kaunah manna lawa witing yakat dutni laih kalkukulwinih, kaunah yul kalyultanauh wanaihmana kapat.

¹⁶Dawak kulnin aslah Daniwan kidika yaklau manna yakat kulnin aslah lani kidika manana karang ma balna bitik yakat dawak di satni balna bitik yakat bik. Dawan laih manna bitik karak karang.

¹⁷Yang, Pal, yang lawik adika parasnin lani tingki kau ultik manasihtayang. Yang aput ultayang wauhtaya balna ultayang bitik kidika; aput ultayang.

¹⁸Madakiwan Jisas Krais yaklau witing minikun talnin lani duwa kidika manna bitik mamatna yakat lakna karang.