Read Mayangna 1 Timoti 4 Bible Online

1 Timoti 4 - Mayangna bible

1 Timoti 4

¹Kaunah spirit yaklau lāih yulwi witni mani balna yakat muih balna buas kidika yaklau rahm kulnin lani kidika kaupak naikau kalalahwarang ki, alas yulyang spiritni balna yakat dawak sitan balna kaupak sumalnin yulni balna kidika yakat usnit uiwi.

²Sins dis muihni balna dawak alas yulyang muihni balna yakat yulnina dakakana karang, kidika balna kulninna kidika laih ayan kau ulna ki di dutni yayamwa kidika kaupak.

³Adika muihni balna laih marid kalahnin kidika yuyulwas ki dawak kasnin dini balna Papang yaklau yamna kidika kulyang balna dawak di rahm amanglayang balna kidika bik yaklau tingkih kalawi kasninna kidika yuyulwas ki.

⁴Bahang Papang yaklau di balna bitik yamna kidika laih yayamni ki; dawak Papang yakat tingkih kaladi duda laih di as bik yamni talwas atnin dini diski,

⁵kat Papang yulni kidika dawak makat yulni kidika karak yaklau maisihni dis yayamwi.

⁶Adika dini balna wanaih balna yakat disumalma kat dawak rahm kulnin lani yulni balna karak kasta mabuhng awama kat dawak sumalna yulni yamni yakat usnit uinaman kidika yulni, man laih Jisas Krais dini yamyang as yamni awama.

⁷Kaunah bayakwi kiunin yulni balna kidika dawak mutu balna yakat bik yulnina dakawinih. Papang yakat dalani lani kidika yamta lan alahwah;

⁸bahang mamuihki nuhni yakat di balna yamda kidika di as yamni karang bik, Papang yakat dalani lani yamnin kidika laih di balna bitik yakat yamni ki, kat warmani dawak matakit yakat bik sangka atnin pranimis kidika duwa bahang.

⁹Adika laih rahm palni ki, dawak muih bitik rahm kulnamna ki.

¹⁰Kidika yulni wark alahwayangna dawak bik kalbautayangna,[5] kat tahanin lani kidika laih Papang sangka atnin tingni yakat danayangna bahang, muih balna bitik laihwi yakyang kidika, rahm kukulwa balna kidika manah.

¹¹Adika dini balna laih yamninna diyulnam ki dawak bik disumalnam ki.

¹²Wahma man kidika yulni datangkat dutni mayamninna awaski; baisa yamni ki kulyang balna kidika talninna as awanam yulbautaman kidika yakat dawak di balna yamtaman kidika yakat bik, dawak dalani lani, rahm kulnin lani yakat dawak sangmaka maisihni dis kidika nining yakat bik.

¹³Yang baisa yawik āwas yang kidika yakat, ulna balna kidika muih balna muhnina yakat yulta talah, wanaih balna yakat kulninna dulauna atnam dawak disumalna atnam bik.

¹⁴Man yulbautaman dawak suts muihnibararak balna yaklau bik man mamatyakat tingnina dulalauna mani kat, Papang prisantni balna mana kidika bik damatkahwinih.

¹⁵Man adika dini balna yakat amung talah dawak bik tapama lakta dakah, muih balna bitik matalna atninna man laih amput tamatyakat yawaman kidika.

¹⁶Man muihma kat bik amung talah dawak muih ūk balna yakat sumaltaman kidika bik, dawak di balna bitik yakat barangni awah. Kaput yamma kat, man kat bik kallaihta yakma dawak muih ūk balna madakakawa kidika bik dilaihta yakma.