Read Mayangna 2 Timoti 2 Bible Online

2 Timoti 2 - Mayangna bible

2 Timoti 2

¹Dawak man, yang walakibis, parasma balna yaktah Papang dalani lani Jisas Krais munah namangkana kidika.

²Witnis balna mahni muhnina yakat yul balna yultingkat dakanaman kidika, man yamni dikultaman kidika ahalni balna muih ūk balna yakat disumalnin sip balna kidika tingnina yakat diatah.

³Wauhnin balna yakat man dima dutah Jisas Krais solnidado yamni man kapat.

⁴Muih as soldado warkni duwa kidika kalbauyang awas sangnika yakat di balna yamnin kidika mistik kalahwas ki, kat witing tanituna yamni talnin dini kidika yamnin karang ki.

⁵Sihm kaput bik, yakisdi kalsarawa muihni as kidika witing sip warkni minit kidika duwas ki, yakisdinin lani balna kaput yakisdas karangkat.

⁶Angdika muihni di dahnin pāni yakat wark kalahwa kidika witing tatuna di minik balna kidika dunin rahmni duwi.

⁷Adika yultayang akat kultah, kat Dawan yaklau mayamwakat bitik amanglanaman karang.

⁸Jisas Krais yulni ismangkattah, watwi yaklauna kidika dawak king Devid sulani dai kidika, yul wisam yamni yang yultayang kaput.

⁹Dawak yul wisam yamni kidika yulni wauhnin balna kidika sip wauhtayang, sihm di dutni yamyang as yang kapat sin kau yasitna sakyang adika kat bik; kaunah Papang yulni kidika laih sin kau sitwas ki.

¹⁰Kidika bahang di balna bitik kidika sip wauhtayang Papang yaklau walwi yakna balna bitik kidika yamni atninna yulni, witingna bik laihwi yaknin lani kidika dawak Jisas Krais yakat alasna yaksihni kidika bik duna atninna yulni.

¹¹Adika laih rahm palni ki: Witing karak daunamayang kat, witing karak bik yalahdarang ki;

¹²maising dadasni karak wauhdarang kat, witing king kāwa lani yakat madiki dudarang ki; dikah kalatdarang kat, witing yaklau bik dikah maitarang ki;

¹³mayang barangni awas mawarang kat, witing laih tanityakat ban barangni ki, kat witing alas muihni yakat sip dikah kaltas ki.

¹⁴Muih ūk balna yakat isningnapaktah dawak Papang muhni yakat yamnin diyultah kalbilnin lani kidika dadawang. Kidika laih di dauh ki. Dakakawa muihni balna yakat dutni diyamwi.

¹⁵Papang muhni yakat lawanam kidika kultah muih al as kulnam dadasni, wark kalahyang muihni as di as bik yakasaldas, rahm yulni sumalyang as yamni makulna kapat.

¹⁶Yul dauh balna dawak panimanah kidika dakawinih, kat kaput yuyulwa muihni balna kidika laih, ma balna bitik yakat dutni lani yakat auiwi

¹⁷dawak witing sumalwa yulni balna kidika laih sihm siknis dutni as kapat rawi kiwi. Adika aput dikalahwi Himeneo dawak Fileto kidika balna yakat,

¹⁸rahm tani kidika kaupak naikau kalahwi uina mayang watdi malawinin kidika laih uman pāni duna, dawak kaput karak muih balna buas rahm kulnin lani duduwa kidika kaupak wirlalawi.

¹⁹Kaunah Papang yaklau rahni as barangni āwi dana, kidika yakat aput ulna sakki: “Dawan laih witing dini balna kidika amangninalawi”, dawak “Dawan ayangni yuyulwa balna kidika bitik laih dutni kidika kaupak naikau yaklaninna karang ki.”

²⁰Ū nuhni as yakat, gol dawak lalah dini balna manah laih bang-awaski, kaunah tat dawak sau bibilni dini balna bik bangki; buas balna kidika laih ma as as kau dunin dini balna dawak ūk balna kidika laih ma bitik yakat dunin dini balna.

²¹Ma as as kau dunin dini, Papang dini yakna dawak Dawan dunin dini as karang kat, muih as kidika di dudutni balna kaupak maisihni dis atnin ki; bahang kaput laih dunin dini as yamni karang di yayamni balna bitik yakat.

²²Bahang irah wahma muihni nuhni dukih kalawa lani kidika kaupak, dawak la kat, rahm kulnin lani, dalani lani dawak kulnin aslah lani kidika bik waltah, muih balna isningna maisihni dis karak Dawan yakat kalyuyulwa balna kidika karak kalpakta.

²³Man kalbilnin lani tapdadas dawak dutni kidika dakawinih; man uman amanglataman kidika laih dutni lani duahaiwi.

²⁴Dawak Dawan dini yamyang as kidika laih kalbaunin lani yakat likatnin sip awaski; nawatkauh, yamni atnin ki di balna bitik yakat. Sumalwi sip atnin ki; kulnin laihwatnin lani duwa atnin ki

²⁵dawak isning buknin lani karak muih dudutni balna yakat barangni diyamna atnin ki, Papang yaklau diyamwakat witing yakat wiryaklana atninna dawak rahm kidika bik amanglana atninna,

²⁶sahmuhna atninna dawak laihnin dini kidika kaupak kiri yaklana atninna sitan yaklau silak yakat diduwa kidika witingna yakat amput diyamnin kulwa kidika kaput yamna atnin yulni.