Read Mayangna 2 Timoti 3 Bible Online

2 Timoti 3 - Mayangna bible

2 Timoti 3

¹Man amanglana atnam ki ma witni balna yakat ma dudutni balna aiwarang kidika.

²Muih balna kidika witingna manah atnin kukulwarang, lalah yakat dalani lani duduwa karang, witingna manah kapat kaldakakawarang dawak bik dauh manah karang. Papang niningyakat yaklalauwarang, papangnina yulni dakakawas karang, tingkih lani dis karang dawak bik suts kidika yakat rispik yayamwas karang.

³Dalani lani dawak minikun talnin lani bik dis karang, muih yulni yulwi kakararang, muihnina nuhni dukih dia kidika sip taihwi duduwas karang, muih dudutni dawak di yayamni balna kidika bitik niningkauh yaklalauwa karang.

⁴Malni kau pāt yakat ayang balna karang dawak di yamnin dini awas kidika bik yayamwarang, witingna laih dauh manah karang dawak Papang walnin pāni yakat witingna alasnina lani kauh wawalwarang.

⁵Suts muihni balna kapat kaldakakawarang, kaunah witingna di balna yayamwa yakat laih rahm palni suts parasni kidika awas karang. Kidika muihni balna kapapat kidika karak man di as bik dis atnam ki.

⁶Kat kidika laih witingna dinina ū balna yakat kawi muih yayal dutni yamyang balna sip minit bayakwas, muihnina nuhni yakat satni bitik dukih diawa kidika,

⁷witingna laih ban kaput lan kakalwi kaunah di rahm kidika laih sip amanglalawas ki.

⁸Dawak sukyah Janes dawak Jambres balna Moses niningkauh yaklalauna kaput, kidika muihni balna bik sihm di rahm kidika niningyakat yaklalauwi. Kidika muihni balna laih sinsnina kidika daukalna dawak rahm kulnin lani kidika bik diski.

⁹Kaunah uba palni tanitna yakat uiwas karang, kat muih balna bitik dakakawarang witingna laih muih mutu balna kidika, Moses niningkauh muih bu yaklalauwakat dikalahna dai kidika kapat.

¹⁰Kaunah man laih yang sumalnayang yulni balna kidika, amput yalahtayang kidika, yamnik dini kidika, rahm kulnin lani dutayang kidika, kulnik laihwatnik lani kidika, dalani lani dutayang kidika dawak sip wauhnik parasni dutayang kidika bik yamni usnit uinaman

¹¹yang yakat yauinin lani dawak wauhnik balna kidika bik. Man yamni amanglataman Antioquía, Iconio dawak Listra yakat ais yakalahna dai kidika, dawak bik yauhuiwakat wauhnayang kidika; Kaunah Dawan yaklau kidika balna bitik kaupak yalaihwi yakna.

¹²Rahm angdika muihni balna witingna sangninaka kidika minikun talnin lani yakat duwi uinin dukih diawarang kidika laih Jisas Krais aslah diuhuiwakat wawauhwarang ki;

¹³kaunah dutni muihni balna dawak alas yulyang balna kidika bik dutni kidika kaupak baisa dutni yakat uiwarang ki, alas yulwinah dawak biriwi bik alas diyuyulwakat.

¹⁴Man laih, barangni awah di balna lan alahwanaman kidika bitik yakat, kulnam laihna kidika yakat. Man uman amanglataman wais balna yaklau masumamalna kidika.

¹⁵Ismang aitah muihbin man kaupak ulna balna holi kidika amanglanaman kidika, masumalninna dawak laihwi yaknin tani yakat bik maduwi uinin sipki Jisas Krais yakat rahm kulnin lani dutaman kidika munah.

¹⁶Ulna balna bitik kidika laih Papang kaupak kalahna dawak kidika laih yamni ki[2] sumalna atnin dawak muih balna yakat bilna atnin, barangni yamna atnin dawak sangnika as barangni atnin yulni yul sumalnin bik,

¹⁷Papang alni kidika sip atna atnin dawak di yayamni balna bitik bik yamwi sip atnin yulni.