Read Mayangna 2 Timoti 4 Bible Online

2 Timoti 4 - Mayangna bible

2 Timoti 4

¹Papang dawak Jisas Krais muhni yakat bik, alasna yaksihni nuhni karak kaiwarang kidika sihm king kapat muih sangka dawak dauna balna lanina yamna atnin, yamna atnin dini mahni mayultayang

²yul yamni kidika sumaltah, dawak yulnin sip dawak sip awas karang bik baisa diyulma. Kulninna laihtah, dibiltah dawak kulninna dulautah, kulnam laihwatnin karuk disumaltinah.

³Kat mani kiwi kawarang ki muih balna kidika sumalna yamni kidika yulni sip wawauhwas karang ki; baisa kauh, witingna dukih diawa kaput, sumalyang balna mahni wawalwarang witingna dakakih diawa yulni balna kidika manah disumalna atninna yulni.

⁴Rahm yulni kidika yakat laih dangbabahwarang ki dawak kisi satni balna kidika yakat laih dakakawarang ki.

⁵Kaunah man laih la yamni ban kaput atnin kidika dutah, wauhnin balna kidika sip wauhtah, yul wisam yamni kidika yultah, warkma kidika yamni yamtah.

⁶Yang laih uman sakripais yāyamnin kidika ridi yang; daunik awarni kidika uman kaiwi uliswi.

⁷Kalbaunin yamni kidika kalbaunayang, yawik watnik kidika kat yawik āwanayang, barangni lawanayang dai.

⁸Waralaih kraun dunik kidika[3] tahawi Dawan, wihta la kat kidika yaklau, kidika mani yāwarang kidika. Yang yakat manah laih yawas karangki, kaunah angdika muihni balna dalani lani karuk witing alasnina yaksihni karak kaiwarang kidika yakat tahahawa balna kidika yakat bik diawarang ki.

⁹Traitala sirihni palni aiwa yatalma;

¹⁰bahang Demas laih, adika sangnika dini balna yakat baisa dalani talwa dai kidika, yaruhmwi yadawi Tesalónica yakat kiuna. Crescente laih Galacia sauni yakat kiuna, dawak Tito laih Dalmacia sauni yakat kiuna.

¹¹Luk manah yang karak sakki. Mark kidika walta man karak kalpakta aiwah, kat sipki yang nikingyakat ilp as atnin wark yakat.

¹²Tíquico yakat laih Efeso sauni yakat sihnayang.

¹³Aiwama mani kat, Troas yakat kalmuknik dini datik aiwanayang kidika duaita yama, Carpo ūni yakat; wauhtaya balna kidika bik, dawak sīp almuk unitak balna palni kidika duaita yama.

¹⁴Alejandro ayan warkni yamyang kidika laih yang karak dutni yamna; Dawan yaklau minit lauwi kalana karang amput yamna kat kaput.

¹⁵Man bik amung talah witing niningyakat, kat uba palni mayang yul yulda kidika niningkauh yaklauna kidika yulni.

¹⁶Tatuna la tunan muihni balna niningna yakat rahmki yulnayang mani kat, muih as bik ilpki kawasdai; bitik yaruhmwi dadana dai. Yang dukih yawi kidika yulni Papang yaklau dawak disna atnin.

¹⁷Kaunah Dawan laih rahm ilp yana dai dawak bik parasni yana dai, kaput laih laihwi yaknin yulni yamni kidika witni kat sumaltik yawanayang dai dawak bik yamtingkat Papang yakat kukulwas balna kidika bitik dakakana dai. Kaput laih Dawan yaklau yalaihwi yakna dai layan tinpas kaupak,

¹⁸dawak di dudutni balna bitik kaupak bik yalaihwi yakna karang, dawak bik yalaihwi yakwi witing king kāwa lani yakat yaduwi kiuna karang. ¡Witing alasnina yaksihni kidika laih ban kaput karang! Kaput karang.

¹⁹Prisca dawak Aquila yakat parasnin lani balna, dawak Onesíforo sulani balna yakat bik.

²⁰Erasto laih Corinto yakat watna, dawak Trófimo laih siknis kat datik aiwanayang Mileto yakat.

²¹Traitala baisa was lauwas kat aiwah. Eubulo, Pudente, Lino, Claudia dawak wanaih balna bitik kau bik parasnin masisihwi.

²²Dawan Jisas Krais man karak karang, dawak Papang witing minikun talnin lani duwa kidika manna bitik mamatna yakat lakna karang.