Read Mayangna Tito 1 Bible Online

Tito 1 - Mayangna bible

Tito 1

¹Pal wauhtaya ulna kidika, Papang dini yamyang dawak Jisas Krais aposnitel, witing yaklau sihna kidika Papang walwi yakna balna kidika rahm kulnin lani dunin yakat duaina atnin dawak mayang masutski yakat rahm sinsni lani sakkidika bik amanglana atninna,

²ban kaput sangka atnin tahanin lani karak laihna kidika. Papang alas yulwas kidika, adika sangnika mayanin pramis yamna baisa sau adika dis mani kaupak;

³dawak waralaih, mani kiwi kawakat, witing yulni kidika lāih yakna Papang mailaihwi yakyang kidika yaklau yang yakat sumalnin yana kidika munah.

⁴Tito adika wauhnitaya maultayang, rahm kulnin lani yakat yang walakibis mayang albupak duda kidika, yang dukih Papang dawak mailaihwi yakyang Jisas Krais karak witingna minikun talnin lani dawak kulnin aslah lani duduwa kidika bik man mamatyakat lalakna karang.

⁵Creta wasni wirni yakat madanayang mani kat, kaput yamnayang dai barangni yamnin dutaman dai kidika barangni yamna atnam yulni dawak tawan balna bitik yakat, suts muihnibararak balna yakna atnam, yang lawik yamnin mayulnayang dai kaput.

⁶Muihbarak as kidika laih sangnika kidika yamni duwi kiunin ki. Muih yal aslah alni[1] atnin ki, dawak walanibis balna kidika laih kulyang balna atninna ki dawak dutni yayamwa yulni kidik awaskat muih niningkauh yaklalauwa yulni yulnina bik yakwas atninna ki.

⁷Bahang angdika muihni suts tanituna duwakat, kidika laih Papang dini balna kidika maintalnin ki, dawak kidika yulni sangnika kidika barangni duwi kiuna atnin ki. Tunani dadasni atnin awaski, lani balna bik dutni dunin awaski; wasak diyang, kalbauyang, di malyang bik atnin awaski.

⁸Nawatkauh, witing ūni kidika muih balna diawakat payahninna ki, dawak bik muih al as yamni, lani yamni, la kat, holi dawak bik sins duwa atnin ki.

⁹Yul rahm sumalna kidika yakat dakanin ki, muih ūk balna yakat kulninna dulauna atnin yulni sumalna yamni kidika karak dawak bik kulninna laihna atnin niningkauh yaklalauwa muihni balna yakat.

¹⁰Kat muih dudutni balna mahni palni ki, Papang sainni dunin yulni baisa baisa yuyulwa balna kidika palni, yulnin dini awas manah yuyulwa kidika dawak bik muih balna yakat alas diyuyulwa kidika.

¹¹Kidika balna laih tininapas kidika putnin ki, sulani balna bitik yakat wirlalawa kidika yulni, di as bik yakwi dunin dini awas yulni balna sumamalwa kidika.

¹²Creta wasni wirni kaupak Prapit as dai witing yaklau sauni muihni balna yulnina aput yulna dai: “Creta muihni balna, alas yulyang balna, di anyang balna, di kasyang balna dawak bik baskiwah muihni balna.”

¹³Dawak rahm kidika yulna; kidika bahang, parasni dibiltah, witingna rahm kulnin lani duduwa kidika yamni atninna yulni

¹⁴dawak Ju muihni balna yaklau yul minitlalakwa yakat dakawas atninna dawak yul rahm kidika niningyakat dangbabahwa muihni balna yaklau yamnin yuyulwa kidika bik dakawas atninna yulni.

¹⁵Maisihni dis muihni balna niningna yakat laih di balna bitik kidika maisihni dis manah ki; kaunah maisihni karuk muihni balna dawak rahm kulnin lani duduwas kidika laih, witingna niningna yakat maisihni dis dini as bik diski, bahang sinsnina dawak kulninna kidika laih maisihni manah duduwi.

¹⁶Papang amanglanin atwi, kaunah di yayamwa balna yakat laih dikah atwi; dutni kulnin lani duduwi dawak bik muih dudutni ki, wark yamni as bik sip yayamwas ki.