Read Mayangna Hibru 10 Bible Online

Hibru 10 - Mayangna bible

Hibru 10

¹Kat Moses lāni kidika laih wayani as manah dai di yamni balna kaiwarang dai kidika, rahm kidika palni laih awaski. Kidika bahang lā kidika sip barangni awaski, kidika balna kurih kaiwa bitik yakat Papang yaihnit yakat uiwadai kidika sihm sakripaisni kidika kalanin.

²Bahang lā kidika yaklau rahm muih dutni balna kidika maisihnidis yamnin sip kat laih, uman dutni yayamna kaldakakawas karang, dawak sakripais kidika bik yayamwas karang.

³Kaunah adika sakripais laih dauhmanah kurih kaiwa bitik yakat isningnakatwadai witingna dutnina kidika.

⁴Kat turuh balna, sīp balna ānina kidika muih dutni yamna kidika sip yakpamwaski.

⁵Kidika bahang Krais kidika sau akat kaiwi kanin kat, Papang yakat kalyulna: “Sakripais dawak minitdis kalanin kidika bik dukih mawaski, kaunah muihki nuhni as yanaman.

⁶Sakripais karauni kauna buswa kidika dawak minitdis kalanin kidika bik dukih mawaski muih dutni yamna kidikadispamnam.

⁷Kaput dawak yulnayang: ‘Akat sakyang, yang yulkiwauhtaya yakat ulna kaput, Papang, man kulnam lani yamnin.’ ”

⁸Tatuna kidika, yulwi Papang laih sakripais dawak minitdis kalanin tinglau balna kidika dukih kalawaski, dawak muih dutni yamna kidika dawak disnin sakripais karauni kauna buswa kidika bik, kidika dini balna kidik lā yaklauwi yamnin pakwa karang bik.

⁹Dawak minityakat lakwi yulwi: “Akat aiwayang man ismang lani yamnin.” Yuldarangkat kidika sakripais umani kidik yakpamta, dawak pāni yakat wisam as atah.

¹⁰Papang witing dini maiyakna kat Jisaskrais yaklauwi Papang kulnin lani yamna bahang, witing silp muihni kidika kalana sakripais yamna atnin wat aslah, dawak ban kaput atnin.

¹¹Ju sumalyang balna kidika laih ma bitik yakat sihm sakripaisni kidika duwi kiwi, muih dutni yamna kidika sip dawak diswas karang bik.

¹²Kaunah Jisaskrais laih wat aslah ban kaput atnin sakripais yamna, kidika usnit kat Papang tingnipal yakat yalahna.

¹³Kidika yakat tahawasakki Papang yaklauwi witing waihnila balna kidika bitik kalni dinityakat āwarang kat,

¹⁴kat minitdis kalanin dini wat aslah karak barangni ban kaput atnin diyamna, Papang dini yayakna balna kidika.

¹⁵Dawak Spirit Holi bik kaput maiyulwi, yulwi:

¹⁶“Witingna karak aslah kalahninyamki kidika dawak kidika mani balna usnit kat, adika karang, Papang yulwi: Lāki balna kidika kulninna yakat āki dawak sinsnina yakat ulki.

¹⁷Dawak dutni yayamna balna kidikawattik isingkattas awaki.”

¹⁸Kaput bahang, dutni balna kidika dāwak disna usnit kat, nid awaski baisa minitdis kalanin dini kidika duainin dutni yamna kidika yulni.

¹⁹Wirah balna, waralaih holi pāni yakat kanin kidika laih pri mayang, tingkih Jisas āni munah,

²⁰sangka atnin tani wisam munah kiunin, witing apahwi mayana kidika asna baini kidika kaupak, yuldarangkat, witing palni muihni nuhni kaupak.

²¹Sumalyang nuhni palni as dudi Papang ūni muhnit yakat.

²²Kidika bahang Papang yaihnit yakat mawanang maising alas dis, dawak kasak kulnin lani karak, maising klin kulnin dutni kidika kaupak dawak mayang mamuihki kidika was yamni kau suhna karang.

²³Parasni atnin, makulnik sat sat kulnin awas, kasak kulnin yakat tahada kidika, kat Papang pramis maiyamna kidika laih kaput yamwarang ki.

²⁴Waldang biri biri ilp kidika, dalani talnin kidika baisa dunin dawak di yamni balna kidika yamnin.

²⁵Kaluduhda kidika yakat dadas mawang, muih as as yayamwa kapat laih awaski, biri biri makulnik dulaudanang; dawak baisa yamdanang Dawan mani kidika kaiwi uliswabahang.

²⁶Kat ban ting dutni kidika yamdarang kat, di rahm kidika dakanamayang usnit kat, baisa sakripais ūk diski dutni yamna kidika yulni;

²⁷la yamwarang yamadahngni kidika manah maitahawi dawak kuhpau daihni kidika, Papang waihnila balna dismukwarang kidika.

²⁸Muih as Moses lāni kidika dakawi yamwas karang kat, witnis bu kidika awaskat bās kalalahwarang kat witing niningkauh, daunin yakat kalwirlana karang minikun talnin dis palni.

²⁹Bahang, ¿manna kultasmana witingna wah kau parasni kidika duninna karang, kat Papang Walanibis al yakat atatakwa kidika dawak āni bik dauh kukulwa kidika, dawak Papang Spiritni dalani ditalwa yakat uhuswa kidika? Kidika āni kuduh pramis yamna kidik yulwasak kidika, kidika kau witingna Papang dini diyakna.

³⁰Amangladi Papang yulna kidika: “Muih lani yamnik kidika laih yang tingki yakat ki; yang lautik diaki.” Dawak aput bik yulna: “Dawan witing tawanni kidika lani yamwarang.”

³¹¡Papang sangka kidika tingni yakat buknin laih yamadahngni palni!

³²Kaunah manna ismangnakattanauh, ma bayakna balna yakat, awas yaringni kidika dutanang minitni yakat parasni wauhnamana kalbaunin nuhni kidika.

³³Manna pasyakat as as muih muhnina yakat dutni manayayamna dai, dawak ūk balna kidika laih dalani wawauhwa balna yakarak aslah kalahwi wawauhna.

³⁴Manna miniknakun ditalnamana silak kau bangdai yakat, dawak alasna karuk dutamana kidika datanang dakyayakna, amanglatamana makau kisang yakat dutanama kidika laih tanit yamni bahang, dawak daukalwas ban kaput bahang.

³⁵Kulnamna āta dutamana kidika didiswinih, kat kidika yaklauwi minit nuhni manana karang bahang.

³⁶Manna nidmana wauhnin yakat parasni atnamna kidika, Papang kulnin lani yamnin, dawak kaput laih witing pramis yamna kidika dunin.

³⁷Ulna yakat yulwi: “Bainah, bainah, kaiwarang ki kainin muihni kidika. Nai watwas karang.

³⁸Barangni muihni kidika kasak kulnin karak sangka karang; kaunah dangsawarang kat, isinglak awaskarang witing niningyakat.”

³⁹Mayang laih dangsasawa balna kidika awasmayang, daunin yakat uiwa kidika, kaunah laihwi yaknin duduwa kidika kat kasak kukulwa bahang.