Read Mayangna Hibru 11 Bible Online

Hibru 11 - Mayangna bible

Hibru 11

¹Rahm kulnin lani kidik dunin laih, dunin tahada kidika rahm palni tahanin ki; di taldas kidika rahm kulnin talnamayang kapat.

²Mamuihkibararak balna dai kidika yamni dikulna dai kat kasak kulnin kidika duduwadai bahang.

³Rahm kulnin lani karak Papang sau adika yamna witing yulni karak, kaput laih waradika mayang talda balna kidika di disdai, adika kaupak yamna.[6]

⁴Rahm kulnin lani karak Abel, Papang yakat sakripais as tanit yamni yamna, Caín karak dawakat, kidika bahang Papang yaklauwi barangni alni as kalkulna, dawak minitdis dini duwi kiuna kidika duna dai. Abel kidika dauna kaunah, ban yulbauwi kasak kulna kidika munah.

⁵Rahm kulnin lani karak, Enoc sangnika karuk duwi kiuna daunin kidika talwas atnin yulni, sip walwi yakwasdadana, kat Papang duwi kiuna bahang. Dawak Ulna yakat yulwi, dukiwas tanit kauh, Enoc yakat Papang yaklauwi yamni kaltalna dai.

⁶Kaunah sip awaski kasak kulnin kidika dismayang kat Papang yamni maitalnin, kat Papang yaihnit yakat kiunin laih, mayang kulnin ki witing kidika sakki dawak witing yakat wawalwa kidika di diawi.

⁷Rahm kulnin lani munah Noé, di balna baisa taldas dini kalahwarang kidika kalyulna dai, dawak yulni dakawi kuma kuring as yamna walanibis balna laihwi yaknin yulni. Sihm kidika kasak kulnin kau, Noé sau muihni balna yakat ladituhna dai, dawak lakat yamnin kidika kalana dai kasak kulnin munah duduwa kidika.

⁸Rahm kulnin lani karak, Abraham Papang yaklauwi kalyulwak, yulni dakawi kalahwi kiuna pa as kalawarang dai kidika witing dini. Witing sauni kaupak kalahwi kiuna kaunah amanglawasdai angkat kiwapa,

⁹dawak rahm kulnin lani karak pa ūk muihni kapat yalahna, Papang yaklauwi pa as kalaki atna pāni yakat. Dawak ū labanni kau yalahna, Isaac dawak Jacob bik sihm, dawak kidika pranimis bik witingna duduna.

¹⁰Kat Abraham laih tahawadai kidika tawanni rahni balna pamni duwa kidika, dawak kidika tawanni laih Papang yamna.

¹¹Rahm kulnin lani karak, Sara witing walabis yaknin sip-awas dai dawak abraham laih muihbarak kalna dai, kaunah witing parasni duna dai papang kalnin kidika, kat kasak kulna bahang Papang laih pranimis kat yamwarang kidika.

¹²Kaput bahang Abraham, witing mani witni ulis yakat, sulani mahni duna dai sihm makau kisang kau yala balna kapat dawak kumakung kau kauhmak kapat, sip kuldi yakdas kidika.

¹³Adika muihni balna bitik dadauna, Papang pramis diyamna dai kidika duduwas; kaunah kasak kukulwadai bahang, naikaupak tatalna dai, dawak dipararasna kaput bik kalamanglalana witingna kidika pa ūk kaupak muihni balna kapat, adika sauni munah aiwi bayayakna kidika.

¹⁴Di ais ais yuyulwa muihni balna kidika, lāih amanglanin yayakwi witingna sau as wawalwa kidika, baisa.

¹⁵Witingna baisa kukulna dai katlaih sauni kalalahna kidika, sipdai yamni palni nawatwi uinin kidika yakat;

¹⁶kaunah witing saunina as tanit yamni kidika dukih diawi, yuldarang kar, makau kisang kidika sauni. Kidika bahang, Papang laih yakasaldaski witingna Papangnina atnin kidika, kat tawan nuhni as ridi yamna duwi witingna dinina.

¹⁷Rahm kulnin lani karak, Papang yaklauwi Abraham yakat laihwi kaltalna, dawak Isaac kidika duna sakripais yamna atnin. Witing walanibis al aslah kidika sakripais yamnin kulna, Papang pramis kalyamna dai kaunah:

¹⁸“Isaac munah sulama mahni duma.”

¹⁹Kat Abraham witing amanglana Papang laih parasni nuhni duwi, bahang dauna kaupak bik dulaunin sip kidika; kidika bahang Abraham kidika walanibis watwi duna, dawak kaput laih sainni as kalna.

²⁰Rahm kulnin lani karak Isaac yaklauwi Jacob yakat blisin kalanin yulna ma balna kaiwarang yakat, dawak Esaú yakat bik.

²¹Rahm kulnin lani karak Jacob, daunin manah dawak, blisin dianin pramis yamna José walanibis balna yakat, dawak tulninah yakat taih dawi Papang kau minityulna.

²²Rahm kulnin lani karak José yulna, Israel balna kidika Egipto sauni kaupak kalalahwarang ki, dawak witing muihni nuhni kidika amput yamnin kidika bik diyulna dai.

²³Rahm kulnin lani karak, Moses batahndawak, papangni balna yaklauwi malwi duduna waiku bās; kat muihnibin kidika nuhnibin yamni tatalna dai bahang, dawak yamaduduwasdai king yaklauwi lā āna dai kidika muihbinina inin.

²⁴Rahm kulnin lani karak Moses witing muihbarak kalna kat, yulwasdai witing laih Fero walanibis yal kidika walanibis;

²⁵witing kau yamni talna Papang tawanni karak libitwi wiwiswarang kat, dawak ma parahni dutni alasnina kidika dakanin.

²⁶Tanit minit nuhni kulna Mesías balna kidika yulni wauhnin, dawak Egipto ritsni balna dunin karak dawakat; kat Papang di kalawarang kidika yakat minikpa talna dai bahang.

²⁷Rahm kulnin lani karak, Moses Egipto sauni kaupak kiuna, yamaduwasdai king kulnin daukalna kidika, dawak ais yamnin kulna kidika yakat barangni dai, Papang taldas kidika witing laih talwa kapat dai.

²⁸Rahm kulnin lani karak, Moses insal kaiwi bayakna alasnina kidika yamna, dawak sihwak dūr balna kidika ā kau rasna dai, kaput laih iyang innisal kidika Israel balna walaninabis tatuna yakat inin awas yulni.

²⁹Rahm kulnin lani karak Israel balna Kuma Pauni bayayakna, sau buhni kapat; kidika usnit kat Egipto muihni balna bik kaput yamnin kukulna, kaunah yakat was dadauna.

³⁰Rahm kulnin lani karak Jericó daklana kidika bahwi bubukna, kidika yaihnit yakat Israel balna ma tiaskaubu awawaihna usnit kat.

³¹Dawak rahm kulnin lani karak, Rahab, yal as ahal manas karak kalangwa yalni kidika, yulni dakawi yayamwas balna kidika karak kalpakwi dauwasdai, kat witing yaklauwi ūni yakat yamni āwi duna dai bahang, Israel muihni yakpakwi talwa bangdai kidika balna.

³²¿Ais baisa ūk yulki yah? Ma aitani dis awaki Gedeón yulni balna kidika yulnik, Barac, Sansón, Jefté, Devid, Samuel, dawak prapit balna.

³³Rahm kulnin lani karak kalbauwi sau dakyakwi duduna, la kat yayamna, Papang pramis yamna kidika duduna, layan tinpas bik puputna,

³⁴kuh parasni dahlwa kidika bik pipina, isparah kau daunin bik kiri yaklalana, parasnina dahnkalna kapat bik watwi parasnina duduna, kaput laih war yakat pararasni dai, dawak waihla balna yakat minitna bayayakna.

³⁵Yayal bik bang bangki, wanaihnina dadauna dai kaunah watwi sangninaka duwi yaklalauwak kalpapakna. Ūk balna laih dalani nuhni wauhwi dadauna, kidika kaupak dilaihwi yayakwarang kidika dukih diawasdai, witni kat, sangninaka tanit yamni kidika dunin yulni.

³⁶Ūk balna yakat laih sarahni diyuyulna, wah bik wiwisna, sīn kau sisitna dawak silak bik ahana.

³⁷Dawak ūk balna laih kipala kau bahrwi ihina, sa kau buhwi dadakna, dawak isparah baini kau bik dadauna; dawak ūk balna laih pini uina praknina kidika di unitak kau kakana, sīp, kuts unitak kau, miniknakunni di dis, dawak kaput laih dutni bik diyayamna.

³⁸Adika ahalni balna, witingna adika sauni akat atnin sip-awas dai, kaunah pini kauhmak wanilang yakat uina, dawak asangpas balna yakat, pa sulihni balna yakat bik.

³⁹Kaput kaunah witingna as bik Papang pranimis kidika duduwasdai, witingna rahm kulnin lani duduwa dai kidika ditalna dai bik;

⁴⁰kat Papang mayang akat maikulna, dawak di tanit yamni as mayanin yulna, dawak mayang karak aslah kalalahwarang kat witingna kidika barangni kakalna karang.