Read Mayangna Hibru 12 Bible Online

Hibru 12 - Mayangna bible

Hibru 12

¹Kidika bahang mayang mayaihkit yakat muih manas kasak kukulwa kidika manikingkakana, pirini ladanang maikapahwa dini kidika, dawak dutni maibalakwa kidika bik, dawak parasni maīrang matakit yakat kirinin duda kidika.

²Mayang Jisas yakat taldang, kat mayang kasak kulda kidika laih witing munah kaiwa bahang, dawak witing yaklauwi bik barangni āwa bahang. Jisas pan prihni yakat wauhna, kidika daunin asalni witing kulwas dai, kat witing yamni amanglana wauhwarang usnit kat alasna duwarangdai kidika, dawak Papang trunni tingnipal yakat yalahna.

³Kaput bahang Jisas yamna yakat kultatalnauh, dutni yamyang balna kidika witing niningkauh yaklalauwak witing wauhna; kidika bahang manasuhni awaski, dawak bik, kulnamna sau yakat buknin awaski.

⁴Kat manna laih daunin kat bik yawanamna awaski dutni niningkauh kalbautamana kidika,

⁵dawak damatnakahna Papang yul manasumalwa kidika walanibis balna mana kapat. Ulna yakat yulwi: “Di dauh kapat kulwinih, walakibis. Papang yaklauwi barangni mayamwa kidika, mabilwak kulnam kidika sau yakat buknin awaski.

⁶Kat Papang yaklauwi barangni kalyamwi wais yakat dalani talwa kidika, dawak wiswi wais kidika witing walanibis kapat duwa kidika yakat.”

⁷Manna wauhtamana barangni kalahnin yulni: Papang yaklauwi walanibis kapat manaduwi. ¿Muih walanibis as kidika papangni yaklauwi barangni āwas kat pah?

⁸Kaunah Papang yaklauwi barangni mana-awaskat, walanibis balna ūk yakat diyamwa kapat, kaput kat manna kidika witing walanibis palni laih awasmana.

⁹Kidika minityak, walabismayang dai kidika yakat, sau akat mapapangki kidika barangni maiahawadai, dawak bik rispik bik diada dai. ¿Amput dawak Papang makau kisang yakat sakkidika yakat tingni dinit yakat mahawas karangyah, masangkika kidika dunin yulni?

¹⁰Mapapangki balna sau akat barangni maiahawadai, masangkika parahni duda akat, witingna yamni tatalwa yakat; kaunah Papang laih rahm di yamni palni dunin kidika yaklauwi barangni maiāwi, holi atnin witing kapat.

¹¹Rahm kidika laih, wah kidika yamni awaski duda minitni yakat, nawatkauh laih dalani ki; kaunah yulni balna kidika lan malahwarang kat, kaiwi kalahwa kidika laih sangnika yakat kulnin lani aslah dawak barangni.

¹²Kaput bahang, tingmana kalsuhna dawak kalasmanamak kalsuhna kidika bik wattas parasni kalatanauh,

¹³tingpal kau ta kidika waltanauh, kaput laih kalmana dalani kidika yamni kalwarang, baisa dalani dakas awanama.

¹⁴Muih bitik karak kulnin aslah dunin kidika waltanauh dawak sangmanaka holi atnin kidika waltanauh; holi awaskat balna kidika sip Dawak yakat tatalwas karang.

¹⁵Waltanauh muih as bik Papang tingni kidika dis atnin awaski, witni kat sihm pan rikni tapahlni kapat atnin awaski, dutni maiyamwa kidika dawak muih yakat bik puinisin dilaihwa kidika.

¹⁶Manna as bik ahal ūk ūk karak payahyang yayalni atnamna awaski, Papang dini kulna kidika dauh kulnin awaski; Esaú laih kaput yamna, di kasnin as yulni walabis tatuna rahmni kidika bakanpamna.

¹⁷Dawak manna amanglatamana usnit kat papangni kaupak blisin dukuhtak, kalawasdana; dawak kasak kaidana kaunah sip di as bik yamwasdai uman kaput kalahna dai kidika.

¹⁸Manna yaihnit yakat yawasmana dai, Israel balna kapat, di as[7] laihwi talnin sip dini dai kidika, dawak dahlwi kilwasakdai kidika, puksani dawak wingbauwasak pasyakat;

¹⁹trumpit yulni bik dakakawasdai, dawak Papang dinit yulwa kidika bik. Kidika dinit yulwak dakakana balna yaklauwi yuyulna baisa yuldibaunin awas,

²⁰kat yamnin balna yulwa kidika sip-awas diyamwa kidika yulni: “Wais asang yakat kalni atakwarang kat, inin karang kipala kau bahrwi, kidika awasbik langsa kau, tinglau karang bik.”

²¹Di yamadangni tatalna dai, bahang sihm Moses bik yulna: “Yamaduting yayukwi.”

²²Manna laih nawatnikauh, Sayan asangni yaihnit yakat yawanamana, Papang sangka tawanni nuhni yakat, Jerusalén makau kisang kidika yakat, dawak insal balna bik mahni bangdai Papang ayangni nuhni yamnin yulni,

²³Papang walanibis balna tatuna ayangnina ulna kidika makau kisang yakat tawannina yakat. Papang yaihnit yakat uina, muih bitik wihninata kidika, muih ahal yayamni spiritnina Papang yaklauwi barangni yamni yamna kidika,

²⁴Jisas yakat aslah kalahnin wisam as witing kawi yamna kidika, dawak āni kau maisihnidis malahna kidika, kidika laih tanit yamni maiyulwa kidika Abel āni karak dawakat.

²⁵Kaput bahang amungtalnauh yul maibauwa kidika dakawas kapat laih yayamwinih. Kat Papang, witing sau kat yul diyulwak dakawas dadana balna kidika, kiri yaklawas dadana. Dawak mayang laih mahlaih sip-awas mawarang kiri yaklanin, makau kisang kaupak yul maisumalwak dangbuh dādarang kat.

²⁶Kidika mani Papang dinit kidika yamwak sau kalyukna, kaunah waralaih yulwi: “Baisa wat as kalating sau yukwarang, kaunah kamanah awaski makau kisang kidika bik yukwarang.”

²⁷Yulwa kidika “baisa wat as”, kidika laih amanglanin ki di yamna balna kidika yakmukwarang ki, laihwi itiknin sip balna kidika, dawak itiknin sip-awas balna kidika laih ban pāni yakat karang.

²⁸Papang kingni lani mayawa kidika, sip itikwas ki. Kidika yulni tingkih kalanin ki, dawak Papang yakat mamikityuldang, rispik lani kidika bik dukih kalawa kidika.

²⁹Kat Mapapangki laih sihm kuhpau di buswa kapat buswi.