Read Mayangna Hibru 2 Bible Online

Hibru 2 - Mayangna bible

Hibru 2

¹Adika yulni, mayang yul sumalwak dakanamayang kidika yamni palni dakanin ki, kidika tani kaupak kalahnin-awas yulni.

²Ma bayakna balna yakat Papang yaklauwi lā sihna dai kidika innisal balna munah, kidika laih lā parasni duwadai, wais kat kidika lāni kat yamwas kidika laih wah kalawādai.

³¿Amput maīri malawarangyah, laihwi yaknin nuhni kidika pini mawarang kat? Kat sihm Daniwan kidika yaklauwi isningpakna dai tatuna, adika laihwi yaknin, kidika usnit kat dakakana muihni balna kidika yaklauwi watwi yuyulna dai, yulni kidika.

⁴Kidika minityakat, Papang witing sainni kau bik yamna, di taldas dini kidika, Spirit Holi munah, bahang kidika laih sat sat munah mayana, witing kulnin lani kat.

⁵Papang yaklauwi insal balna tingnina yakat āwi dawaski, adika sauni tanit yakat kaiwarang yulni yulda adika.

⁶Nawatkauh laih, Ulna balna pasyakat muih as yulna: “¿Muih al kidika aisyah? ¿Muih kidika aisyah? ¿Ais yamta ismangkattamahn, dawak witing yulni kulta kalbautamahn?

⁷Ma as as bayakwak yamnamaninsal balna karak kuihwas, kaunah kalanaman alasnina yaksihnidawak risnipik bik;

⁸di bitik witing kalni dinit yakatanaman.” Kaput bahang, di bitik witing dinit yakat āna kat, Papang yaklauwi di as bik dawasdai witing dinit yakat. Kaput kaunah, baisa taldaski di bitik witing dinit yakat.

⁹Kaunah taldi Jisas kidika, Papang yaklauwi kalyamna insal balna kidika apis dinitnakauh, kaunah ma parahni manah, witing kidika alasna yaksihni dawak risnipik bik kalana, daunin kat wauhna kidika yulni. Papang, dalani lani duwa kidika kau, dauwak talkih dai muih bitik yamni atnin yulni.

¹⁰Di bitik kidika laih Papang dini, Papang yamna kidika munah, witing dukih kalawi walanibis balna kidika bitik alasnina yaksihni kidika duduwak. Kidika bahang Papang, wauhna kidika munah, Jisas Krais kidika barangni kalyamnin dai, witingna dilaihwi yakyang kidika.

¹¹Kat bitik laih sihm Papang aslah ki: Papang dini yakna balna, dawak Papang dini yakyang kidika bik. Kidika bahang Papang Walanibis kidika asalni dakawas ki, maiyulna atnin wirah balna,

¹²Ulna yakat yulwa kidika: “Man yulma kidika diyulkiwirahki balna yakat, dawak muih kaluduhna pasyakatlamawana unbauki man yakat.”

¹³Dawak bik yulwi: “Witing yakat tahanik kidikaātik duki.” Dawak watwi yulwi: “Akat sakyang, Papang yaklauwiyana kidika walanibis balna.”

¹⁴Kaput bik muih as walanibis balna kidika laih sihm muihni aslah ki dawak ā bik, bahang kaput bik Jisas kidika muih muihni nuhni dawak āni bik duwa dai, kaput laih witing dauna kidika munah, inin parasni duyang yakat minit bayakna atnin, yuldarangkat muih alasni yulyang kidika.

¹⁵Kaput laih bitik yakat laihwi yakna, daunin kidika yamaduwi, sangninaka bitik yakat muih dini yamyang kapat yalalahwadai kidika.

¹⁶Rahm kidika laih witing kaiwas ki insal balna yakat ilp dianin, kaunah Abraham sulani balna yakat laih.

¹⁷Dawak kidika yulni laih, witing wirahni balna bitik yakat kaput yamnin dai, witing kidika sumalyang nuhni barangni dawak minikun talnin bik Papang warkni balna yakat, dawak dutnina dāwak disnin kidika duna atnin sakripais kidika munah.

¹⁸Dawak witing alas wauhna bahang, trainitalnin yakat kana, bahang waralaih sipki ilp dianin trainitalnin yakat āwa muihni balna yakat.