Read Mayangna Hibru 3 Bible Online

Hibru 3 - Mayangna bible

Hibru 3

¹Kaput bahang, wirah balna, manna tawan holi muihni balnamana kidika, Papang manayulna witing dini atnamna, Krais Jisas yakat yamni kultanauh, witing kidika apostel dawak sumalyang nuhni ki, tingkih witing yakat rahm kulnin lani duda kidika.

²Jisas laih barangni dai Papang yakat, bahang adika warkni yakat pakna, Moses barangni dai kapat Papang ūni bitik yakat.

³Kaunah Jisas yakat laih tanit risnipik kidika kalana Moses karak dawakat, sihm kaput bik laih ū yamwa muihni kidika tanit risnipik duwi, ūni kidika karak dawakat.

⁴Ū bitik kidika laih muih yaklauwi yamwi; kaunah Papang kuduh di balna bitik yamna kidika.

⁵Kaput bahang, Moses kidika dini yamyang as kapat, Papang ūni bitik yakat barangni dai, dawak witing warkni yamwa kidika laih, Papang witing ais yulnin kidika witnis kanin dai.

⁶Kaunah Krais, Papang Walanibis, witing bik barangni ki Papang ūni akat, kidika kuduh mayang mamuihki nuhni, kaput bik ban laihwatdi dudarang kat, alasna dawak tahanin duda kidika karak.

⁷Kidika bahang, Spirit Holi yulwa kaput Ulna yakat: “Warmani manna Dawan yulwa kidika dakanama kat,

⁸ismangna dadasni yayamwinih kidika balna niningkauh yaklalauna kapat dawak Papang yakat trainitatalna dai kidika kauhmak wanilang yakat.

⁹Yakat traikitatalnamanna muihmanabararak balna, yang warkki balna kidika tatalna bik, kurih 40.

¹⁰Kidika yulni ising daukalnayangkidika muihni balna yakat, dawak yulnayang: ‘Witingna pirini yakat ki isningna kidika, dawak dukih diawaski taki balna kidikaamanglanin.’

¹¹Kidika yulni ayangki kauyaktik yulnayang,kultik daukalwak urupdinik yakat uiwi kakawas karang.”

¹²Wirah balna, amungtalnauh manna as bik ismangna kaput dutni dunin awaski, dawak bik kultasdata Papang sangka kidika kaupak naikau lawanamna.

¹³Nawatkauh laih, biri biri kulnamna dulautanauh ma balna bitik yakat, Ulna yakat “warmani” yulni yulwa kidika bayakkiwas yakat, kaput laih manna kaupak as bik dutni kidika yaklauwi alas kalyulwas karang, dawak kulnamna kidika anyang kalnamna.

¹⁴Kat mayang laih Krais yakat madiki dunin karang kat, barangni malawinin ki witni kat muhnilau kau yamni kuldadai kidika yakat.

¹⁵Kidika aput yulwi: “Manna warmani dakanama kat Papang yulwa kidika, ismangna dadasni yayamwinih,kidika balna niningkauhyaklalauna kapat.”

¹⁶¿Dawak wais balna kidika niningkauh yaklalauna daih, Papang dinit kidika yulwa dakakana usnit kat? Kidika balna laih Moses yaklauwi Egipto sauni kaupak yakna balna dai kidika bitik.

¹⁷¿Dawak Papang wais balna niningna yakat kulnin daukalna daih kurih 40, kauhmak wanilang pasyakat? Dutni yayamna balna kidika yakat, kauhmak wanilang yakat dadauna kidika.

¹⁸¿Dawak Papang wais balna yakat diyulna daih, urupnin pāni yakat kakawaskarang atna dai kidika? Yulni dakawas balna dai yakat diyulna.

¹⁹Dawak, rahm bik, talnamayang sip kawasdadana, kat rahm kukulwasdai bahang.