Read Mayangna Hibru 5 Bible Online

Hibru 5 - Mayangna bible

Hibru 5

¹Sumalyang nuhni kidika bitik laih muih al paskaupak walwi yakwi, bahang ayangni pakna ki Papang muhni yakat kiunin, minitdis dini kalanin dawak bik muih dutni yulni sakripais yamnin.

²Dawak sumalyang laih muih yudutni kalahwa kidika kallaihwa bahang, miniknakun talnin sipki di amanglalawas ta disna balna kidika yakat bik;

³dawak witing silp yudutnina yulni sakripais yamnin ki dutnina yulni, sihm tawan dutni yamna balna kapat.

⁴Muih as bik sip adika risnipik laihwi duwaski, kaunah Papang yaklauwi yulwak kiwak kalanin risnipik kidika, Aarón kau kalana kidika.

⁵Sihm kaput bik laih, Krais kidika witing silp sumalyang nuhni kawasdai, kaunah Papang yaklauwi kidika risnipik kalana, kat witing kuduh kalyulna: “Man laih yang walakibisman; warmani mayaknayang.”

⁶Dawan Ulna pīsni ūk yakat bik kalyulna: “Man laih sumalyang kidika ban man, sihm Melquisedec kapat.”

⁷Krais kidika sau akat likkat, witing yulni parasni dawak minikwas karuk minityulna Papang kau, witing parasni duwi daunin kaupak laihwi yaknin; dawak witing yulni dakawi yamwa kidika yulni laih, Papang dakana.

⁸Kaput bahang Krais laih, witing Walanibis dai karang bik, dalani wauhwi lankalna yulni dakawi yamnin kidika;

⁹dawak kaput yamwi barangni kalwi, witing munah laihwi yaknin kidika kalahwi kaina yulni dakawi yayamwa muihni balna bitik yakat,

¹⁰dawak Papang yaklauwi sumalyang nuhni pakna, sihm Melquisedec kapat.

¹¹Di manas yulnin dudi adika yulni, kaunah dadasni ki lāih yakwi yulnin laih, kat manna laih sip sirihni di amanglatasmana bahang.

¹²Ma mahni bayakna bahang, manna laih uman maestro kalnamana atnin ki; kaput kaunah nidmana watwi tanka lāih yakwi manayulnin Papang isi sumalna balna kidika. Parasmana dis kalnamana, di dadasni balna kasnamna dai kidika waralaih tāwas dinin yultamana.

¹³Tāwas didiwa balna kidika laih sihm muihbinina kapat ki, la barangni bik sip yayamwas ki.[2],

¹⁴Kasnin dadasni balna kidika laih muihbararak balna dinina, muih lani yamnin sip balna kidika, kat uman amanglalawa bahang di dutni dawak yamni kidika bik.