Read Mayangna Hibru 6 Bible Online

Hibru 6 - Mayangna bible

Hibru 6

¹Kaput bahang matakit yakat mawang muihbarak kaldarang kat, Krais yulni balna tatuna kau sumalna dai kidika pirini yakat lanin. Watdi mawaskawang, di tatuna balna dai yakat, daunin yakat maidukiwa warkni balna kidika danin, kidika awaskat Papang yakat rahm kulnin kidika balna,

²was utuh'yaknin, kulyang balna minitna yakat matingki yunin, dauna kaupak watwi yaklaunin, dawak la yamwarang balna kidika bik.

³Kidika yamdarang ki, Papang yaklauwi mayawarang kat.

⁴Kat kidika balna wat as yaringni duduna, dawak Papang prisantni auhni kidika dakakana, dawak Spirit Holi kidika bik apis duduna kidika,

⁵dawak Papang yulni auhni kidika bik dakakana dawak kaput bik matakitkauh sau parasni kaiwarang kidika bik,

⁶watwi bubukwarang kat, watwi kalyamwak Papang yakat kiwas karang ki, kat witingna watwi Papang Walanibis al kidika pan prihni yakat papawi, dawak muih bitik muhnina yakat sarahni kalyuyulwi.

⁷Kidika laih sihm was kidika sau minityak utuhwak diwa kapat ki: dadahwa muihni balna kidika minik yamni yayakwarangkat, Papang blinisin kidika duna ki;

⁸kaunah wakalmanah yakwarangkat, di diski; Papang latuhna yakat bukwi, dawak witni yakat laih busna karang.

⁹Kaunah, kaput yuldarang bik, wirah balna, yamni amangladi manna laih tatuna yakat bangmana, yuldarang kat, laihwi yaknin tani yakat.

¹⁰Kat Papang laih barangni bahang, manna yamnamana kidika dinitkahwas karang dawak dalani kaltalnamana kidika tawan holi yakat ilp kalata, ban yamtamana kapat karang.

¹¹Kaunah dukih mayawi manna kidika witni kat yamta yawanama kat yamkih manawa kidika ban kaput, bahang kaput laih tahatamana kidika bitik palni yamna karang.

¹²Dukih mayawaski manna baskiwah kaltanama, nawatkauh laih usnitna uitanauh, kidika muihni balna kasak kulnin dawak kulnin dulauna kidika ban duduwa kidika munah, Papang di dianin pramis diyamna dai kidik duduwa kidika.

¹³Papang Abraham yakat pramis yamna kat, witing alas ayangni kau yakwi yulna dai, kat witing minit yakat tanit nuhni ūk disdai bahang, kidika ayangni kau yakwi yulnin;

¹⁴dawak yulna: “Agha, yang blisin manas maki, dawak yamtingkat man sulama balna bik mahni karang.”

¹⁵Abraham witing kulnin laihwatwi tahana, Papang pramis kalyamna kidika duna.

¹⁶Muih kidika Papang ayangni kau yakwi yulwi, witing karak tanit muihni ayangni karak yakwi yulwi; witingna di as kaput yayamna karang kat, baisa yulnin bik diski.

¹⁷Bahang, Papang laih lāih yaknin kulna, witing pramis yamna kidika wais balna duninna dai kidika, witing pranimis kat yamnin kulna, satuk yamnin awas. Kidika bahang pranimis kidika witing ayangni kau yamwi yulna.

¹⁸Adika dini bu kidika laih sip satuk yamwas ki dawak Papang laih sip alas yulwaski, mawalakiānin kidika parasni dunamayang Papang yakat manakitdaknin walnamayang kidika, dawak bik tahanin as witing yaklauwi mayana kidika yakat rahm kulnamayang kidika bahang.

¹⁹Adika tahanin laih ban sakki dawak bik rahmki mayang masolki yakat, sihm kumakuring sitwi laihwatwa dini kapat. Dawak kidika tahanin laih makau kisang yakat makat yulnin ūni kau mukna baini kidika piningkau bayakna,

²⁰kidika yakat muhnilau Jisas kawi yaklana mataki apahnin yulni, witing kaput laih sumalyang nuhni kalna ban kaput atnin, sihm Melquisedec kapat.