Read Mayangna Hibru 7 Bible Online

Hibru 7 - Mayangna bible

Hibru 7

¹Adika Melquisedec laih Salem kingni dai, Papang sumalniyang as. Abraham, witing war kalbauwi king balna kidika minitna bayakwi kaiwak, tanipas yakat Melquisedec kalahwi bliskalyamna;

²kaput laih Abraham witing kalbauwi minitbayakwi di duna balna kidika kaupak sahyakna salap kidika kalana dai Melquisedec yakat. Kaput bahang talma kat Melquisedec tanka laih “king la kat”, kaunah Salem kingni kapat bik kalahwi, kidika tanka laih “kulnin aslah kingni”.

³Papangni dawak nanangni bik amangladaski, muihninabararak balna kalahwi kaina kidika bik; dawak batahndana, dauna kidika yulni balna bik dakadaski; dawak kaput laih Papang Walanibis sihm kapat, sumalyang kidika ban ki.

⁴Waralaih talnauh, Melquisedec kidika ampus nuhni kulna dai kidika, mayang mamuihkibarak Abraham palni yaklauwi, witing king balna niningna yakat kalbauwi minitbayakwi di duna balna dai kidika kaupak sahyakna salap kidika kalana dai.

⁵Moses lāni yakat, sumalyang balna Libai sulani balna kidika laih rahmnina duduwi tawan yakat sahyakna salap kidika yulwi dunin, di bitik yakat, kalwanaih balna karang bik, dawak Abraham sulani balna karang bik sihm witingna kapat.

⁶Kaunah Melquisedec laih, Libai sulani awasdai, kaunah sahyakna salap kidika Abraham yakat pakwak lauwi kalana, Papang pranimis munah duna dai kidika. Kaput laih Melquisedec yaklauwi Abraham yakat bliskalyamna;

⁷dawak muih as bik sip yulwaski blisyamwa kidika laih tanit nuhni ki, blisin duwada kidika karak dawakat.

⁸Akat, masangkika duda adika, dauyang muihni balna maipapakwak sahyakna salap laudi; kaunah Ulna yakat laih yulwi Melquisedec laih baisa dauwas sangka kapatki.

⁹Dawak yulnin sipki, sumalyang Libai sulani kidika waradika sahyakna salap yuyulwak lalauwa kidika, baisa witingna bik Melquisedec yakat lauwi kalalana, dawak Abraham bik lauwi kalana;

¹⁰kat kulnin as yakat, Melquisedec witing Abraham tanipas yakat kalahna, bahang witing muihni yakat uman duwādai sulani baisa batahndadawas kidika.

¹¹Israel tawanni lā kidika duna bahang kidika laih sumalyang libai balna warknina yayamwa kidika munah. Waralaih yamni ki, adika sumalyang balna yaklauwi muih yakat barangni diyamnin sipdai kat, nid awasdai sumalyang ūk kalahnin, Aarón kapat laih awas, kaunah Melquisedec kapat.

¹²Sumalyang warkni kidika satuk wirlana kat, lā kidika bik satuk wirlanin ki;

¹³dawak Madakiwan, Ulna yakat witing yulni yulwa kidika, Israel sulani ūk kaupak yah, kidika kaupak sumalyang ūk kalahwas kidika.

¹⁴Kat mayang yamni amangladi Madakiwan kidika laih Judá sulani kaupak kaina, dawak Moses di as bik yulwasdai sumalyang balna warknina yulni yulna dai mani yakat.

¹⁵Adika laih tanit lāih ki, sumalyang wisam as kalahna kidika, sihm Melquisedec kapat,

¹⁶kidika laih sumalyang awaski lā munah karangkat, muih aihwa mayang apat karang kat, kaunah sangnika daukalwas as parasni munah karang kat.

¹⁷Kat adika kuduh Papang yulwa kidika witing yulni: “Man laih sumalyang man ban kaput atnin, sihm Melquisedec kapat.”

¹⁸Kaput bahang tatuna lāni balna kidika laih dauh kalna, kat parasni dis dai bahang,

¹⁹kat Moses lāni dai kidika laih sip barangni kalwasdai bahang, dawak kidika pāni yakat tahanin as tanit yamni dudi, kidika munah Papang yaihnit yakat mawi.

²⁰Dawak Papang yaklauwi witing ayangni kau yakwi yulna. Sumalyang ūk balna kidika laih ayangnina pakna Papang ayangni yakwi yulwas,

²¹kaunah Dawan niningkauh laih Papang ayangni yakwi yulna dai, kat Ulna yakat yulwa bahang: “Dawan, Papang ayangni kau yakwi yulna dawak yulwas laih dawaskarang: ‘Man laih sumalyang as ban kaput man.’ ”

²²Kaput laih Jisas yaklauwi pramis as tanit yamni yamwi muhnilau dai kidika karak dawakat.

²³Sumalyang ūk balna dai kidika laih mahni dai kat daunin kidika yaklauwi dāwak sangka awasdai bahang;

²⁴kaunah Jisas laih dauwas bahang, witing sumalyang warkni duwa kidika muih ūk yakat yaklawas ki.

²⁵Kidika bahang Papang yaihnit yakat uiwa kidika laihwi yaknin sipki, witing munah, sangka ban kaput kidika, witingna yulnina Papang yakat ilp yulnin kidika.

²⁶Kaput bahang, Jisas kuduh sumalyang nuhni dukih mayawa kidika. Witing laih holi ki, dutni as bik diski, dawak sani kahna bik diski, dutni yamyang balna kaupak naikau yakna, dawak makau kisang yakat duwi kiuna.

²⁷Sumalyang nunuhni ūk balna kapat awaski, witingna laih ma bitik yakat didauh balna iwi sakripais yayamwa kidika, tatuna laih witingna alas dutnina yulni, dawak usnit kat tawan dutni yulni. Wirlawakat, Jisas laih wat aslah sakripais yamna, witing alas muihni sakripais kalyamna mani kat.

²⁸Moses lāni kidika laih muih ahal barangni awas balna yakat sumalyang āna, kaunah Papang yamnin yulna kidika laih, lā kidika usnit kat yamna, bahang witing walanibis al kidika Sumalyang Nuhni āna, witing laih barangni palni kalyamna ban kaput atnin.