Read Mayangna Jims 1 Bible Online

Jims 1 - Mayangna bible

Jims 1

¹Jims, Papang, dawak Dawan Jisaskrais dini yamyang, diparaswi Israel sulani 12 balna sau bitik kau rawi kiuna yakat.

²Wirah balna, manna alasna dunamna ki wauhnin satni balna manna yakat kaiwa kidika yulni.

³Uman amanglatamana rahm kulnin lani dutamana kidika laihwi talna kat, manna wauhnin kidika yakat parasmana karuk lan alahwamana.

⁴Kaunah adika parasni kalwa kidika barangni kalahnin yakat duyawanauh, muihbarak kalnin, di as bik dis atnamna laih awaski.

⁵Manna pasmangna yakat muih as sins tuhni kidika dis kat, Papang yakat kalyultah, bahang witing mawarang; kat Papang laih mayawi di as bik laihwatwas dawak bilna lani as bik dis.

⁶Kaunah kasak kulnin karak yulnin ki, sat sat laih kulnin awaski; kat wais kat rahm awaskarang kapat kulwa kidika laih kuma lalamwa kapat ki, wing yaklauwi pini kaldukiwi.

⁷Wais kaput kidika, Dawan kaupak di duwarang kidika rahm kulwas ki,

⁸kat warmani di as kulwi, dawak yahan mani di ūk kulwa bahang, witing kulnin lani kidika di aslah kulwas bahang.

⁹Wirah witing minikunni kidika, Papang yaklauwi kallaihwi dulauwa kidika witing manah kapat kaldakanin ki;

¹⁰dawak di duyang sau yakat lakpamna kidika. Kat di duyang kidika laih dipulu as kapat ki, sip ban awas kidika.

¹¹Ma kalahwi daihni buswakat, dibasta kidika kusulawi, dawak puluni kidika bukwi dawak yaksihn kidika bik diswi. Sihm kaput bik laih di duyang kidika lalahni warkni pasyakat diswi.

¹²Yamni palni ki muih al as wauhni kidika niningyakat parasni wauhwa kidika, kat minit bayakwarang kat minit yamni duwarang bahang kidika kuduh sangka ban atnin, kidika kuduh Papang yaklauwi kraun dianin yulwa kidika dalani kaltatalwa balna yakat.

¹³Muih as di dutni yamkih kalawak, kulwinih kidika laih Papang kaupak kaiwi, kat Papang laih dutni yamkih kalawas ki, muih as kau bik trainitalwaski yamna atnin.

¹⁴Nawatkauh laih, mayang di dutni dukih mayawa kidika mailaihwi, maimurwi dukiwi makulnik laihwi.

¹⁵Di dutni dukih mayawa yakaupak dutni kidika kalahwi; dawak dutni kidika yamni palni barakwak, daunin kidika kaiwi.

¹⁶Wirah balna, manna silp alas kalyuyulwinih:

¹⁷di yamni bitik mayawa kidika laih, mayakaupak kaiwi, Papang kaupak, witing yaklauwi yala balna yamna kidika. Papang laih witing ban ki: witing sip satuk kalwaski dawak bik puksani bik kalwas ki.

¹⁸Kat witing laih kaput dukih kalana bahang, masangkika mayana rahm yulni kidika munah, kaput laih mayang adika di yamna balna kidika kaupak minik tatuna yakna kidika mayang atnin.

¹⁹Adika ismangna kattanauh, wirah balna: manna bitik laih ridi atnamna ki dakanin kidika; kaunah yulnin kidika laih laihwatta yulnamna ki, dawak kulnamna daukalnin bik.

²⁰Kat muih al kulnin daukalna kidika laih Papang muhni yakat di yamni yamwas ki.

²¹Kaput bahang, maisihni balna kidika bitik yakpamtanauh dawak dutni kidika bik manas kidika, dawak yulni minik balna dahna kidika dutanauh limahni palni, kat kidika yulni laih parasni duwi laihwi yaknin.

²²Kaunah yulni kidika dakanin manah awaski; warkni yamnin ki, kaput awaskarang kat manna alas muihmana yakat alas kalyultamana.

²³Wais kat yulni manah dakakawi warkni yamwas kidika laih sihm muih as wayatal kau kaltalwa kapat ki:

²⁴witing kaltalwi kaunah mahka wiryaklawi kiwakat uman dinitkahna ki ampat dai kidika.

²⁵Kaunah dakawa kidika dinitkahwas pri lāni barangni yakat talwa kidika, dawak kidika lani yulwa yakat yamwa kidika, isninglak karang witing yamwa kidika.

²⁶Muih as witing, Papang ayangni nuhni yamni warkni muihni as kulwa kat, kaunah tuni laihwatwas kat, witing silp muihni yakat alas kalyulwi, warkni balna yamwa kidika dauh manah ki.

²⁷Papang ayangni nuhni yamnin maisihnidis kidika Papang niningyakat kidika laih adika ki: warau balna tingmak balna kulninna bukna balna yakat ilp dianin, dawak sau akat dutni kidika kalkahnin awaski.