Read Mayangna Jims 3 Bible Online

Jims 3 - Mayangna bible

Jims 3

¹Wirah balna, manna pasmangna yakat maestro manas atnin awaski, amanglanamna ki, sumaltayangna adika yangna laih lakina parasni yamwarangki.

²Muih bitik mistik yamdi; kaunah muih as kat mistik as yamwaskat yulwa kaput yamwa kat, kidika alni laih barangni ki, witing sipki muihni nuhni kidika bitik barangni yakat duwi kiunin.

³Aras tinpas yakat laihwatnin dini kidika anaman kat, yultaman yakat dakawi yamnin yulni, muihni nuhni kidika bitik angkat duwi kiunin kidika dudi mawi.

⁴Kuma kuring balna kidika bik talnauh: nunuhni ki, dawak wing kallaihwa kidika bik parasni laihwi, dawak wauhyang balna kidika wauhnin dini dibin yakat laihwi, angkat duwi kiunin kulwa yakat duwi kiwi.

⁵Matuki bik sihm kaput ki; mamuihki nuhni kidika pasyakat dibin witki, kaunah di nuhni yamnin sipki. ¡Asangpas nuhni sakkidika kuhpau dibin kau sipki busnin!

⁶Matuki kidika laih kuhpau as ki. Sau dini dutni kidika mamuihki yakat āna, bahang muih bitik yakat dutni kidika dilaihwi. Sihm kuhnipau kidika karak dahlwi, dawak kaput bik muih sangnika naini kidika bitik laih dahlwi buswi.

⁷Muih kidika sipki asangpas dini anyang balna bitik minit bayaknin, uhu balna, bil, kuma paskau di anyang balna bitik minit bayakna;

⁸kaunah muih as bik sip laih muih tuni kidika minit bayakwas ki. Kidika laih di dutni as sip minit bayayakwas ki, dawak puisin dutni daunin dini manah buhngki.

⁹Tu karak, Dawan Mapapangki ayangni nuhni yamni, dawak sihm kidika kau Papang witing wayani kau yamna balna yakat dutni diyuldi.

¹⁰Sihm muih tinpas munah yamni kalyulwi dawak dutni bik kalyulwi. Wirah balna adika laih kaput atnin awaski.

¹¹Wastuna as kaupak sip was damni dawak was tapahlni kalahwas ki.

¹²Kaput bik sip ani damni kidika wain minik yakwas ki, dawak wain kidika bik ani damni minik yakwas ki, wirah balna, kuma wasni buhrwi kalahwa kidika kaupak sip was damni kalahwas ki.

¹³Manna pasmangna yakat sins tuhni duwa muihni likkat, kulnin yamni balna warkni kidika lāih yakwang, sins tuhni duwa kidika yaklauwi limahni kalyamwa kidika.

¹⁴Kaunah datanangkat tumnin kidika ismangna tapahlwarang kat, dawak di balna kidika kalsarata yamtanama kat, ais yulni manna manah kapat kaldakanin kidika diskarang, kat di rahm kidika yamtasmana bahang.

¹⁵Kat kidika sinsni tuhni kidika Papang kaupak kaiwaski, kaunah adika sauni sinsni, muih kulnin dawak sihm muih alasni yulyang kidika yamwi.

¹⁶Angkat tumnin dawak kalsaranin sakkidika di dutni satni bitik bangki;

¹⁷kaunah sins tuhni Papang kaupak kaiwa kidika laih, sangnika kidika maisihni dis duwi; kidika minit yakat limahni ki, dawak minikun talnin kidika duwi. Dawak dalani lani bik duwi, muih bitik kau kapapatki, alas yuyulwaski, di yamni manah yayamwi.

¹⁸Kulnin aslah lani wawalwa kidika laih, kulnin aslah kidika dadahwi, dawak lā kat atnin kidika minik bahnin yulni.