Read Mayangna Jims 4 Bible Online

Jims 4 - Mayangna bible

Jims 4

¹¿War balna kidika angkaupak kaiwih dawak manna pasyakat kalbaunin kalahwa kidika? Kidika laih di dutni dukih manawa kidika kaupak kaiwi.

²Di as dukih manawi, kaunah sip dutasmana; itamana, tumtamana, dawak sip yaktasmana bahang, mahka kalbautamana war yamtamana. Dukih manawa kidika sip yaktasmana kat Papang yakat yultasmana bahang;

³dawak yultamana bik dutasmana, kat dutni yultamana bahang, kat manna duta muihmana nuhni dukih kalawa yakat yusyamnin kultamana bahang.

⁴¡Muih barangni awas balna! ¿Amanglatasmanah sau karak yamni atnin kidika laih Papang karak waihla kalahnin kidika? Wais sau karak yamni atnin kulwakidika laih Papang waihnila kalwi.

⁵Ulna yakat di as yulwi: “Dawan yaklauwi spirit mayang mamuihki yakat āna kidika minit parasni anwi.”[1],

⁶Kaunah Papang laih minikun talnin kidika karak ilp mayawi, Ulna yakat yulwi: “Papang laih niningnakauh ki witingna manah kapat kaldakakawa muihni balna yakat, kaunah minikun diyamwi limahni balna yakat laih.”

⁷Papang dinit yakat awanauh. Dawak diablo niningkauh lawanauh kaput laih manna kaupak kirarang.

⁸Papang yaihnit yak yawanauh, witing yaihmatna yak kiwarang. ¡Tingma klin yamtanauh, dutni yamyang balna! ¡Ismangna maisihni dis yamtanauh, manna Papang yakat dalani talnin kultamana dawak sau yakat bik dalani talnin kultamana kidika!

⁹¡Kulnamna bukwang aidanauh! ¡Ara mana kidika data mamaknawas yaktanauh, dawak alasna kidika kulnamna bukna yakat wirlatanauh!

¹⁰Papang muhni yakat sau kat buktanauh, dawak witing manadulauwarang.

¹¹Wirah balna, manna biri biri dutni kalyuyulwinih. Wirahni niningyakat dutni kalyulwa kidika laih lani yamwasakki, dawak lā niningkauh dutni yulwa kidika laih lani yamwi. Dawak lā kidika yulni yulta yamma kat wihta alahwaman yulwa yakat daka yamnam dai kaunah.

¹²Aslah ki lā duaina kidika dawak witing bik Wihta bahang witing malaihwi yaknin sipki dawak dutni yakat masihnin bik sipki; kaunah man laih ¿waismahn yaihmatkau muihni kidika lani yamnin?

¹³Waralaih adika dakanauh manna yultamana kidika: “Warmani kidika awaskat yahan mani pa as kidik awaskat tawan nuhni as kau mawarang ki, dawak kidika yakat kurih as bayakdarang ki lalah warkni yamdi dawak lalah dudinah”,

¹⁴¡manna amanglatasmana, sangmanaka kidika ampat karangpa yahan mani! Manna laih mukus pihni as kapat mana, minit as kaiwi kaunah tihn dawak diski.

¹⁵Manna yulnamna kidika laih: “Dawan dukih karang kat, sangka mawarang, dawak kidika balna yamdarang.”

¹⁶Kaunah, manna laih manna manah kapat yultamana; kidika witing manah kapat kaldakanin kidika laih dutni ki.

¹⁷Di yamni lan bik yamwas kidika, dutni yamwi.