Read Mayangna Jims 5 Bible Online

Jims 5 - Mayangna bible

Jims 5

¹¡Adika dakanauh, di duyang balna! ¡Aida sarahtamana dutni wauhtanama kidika yulni!

²Dimana balna kidika bitik laih dutlalana; asmanana balna kidika banibil kasna.

³Golmana dawak lalahmana kidika bik bubuh laihna, kidika bubuh laihna kidik namangna yakat laihwi talna as karang bahang kuhpau kapat daukalmukwarangki. Adika mani balna akat di mahni uduhnamana, witni akat.

⁴Muih ahal yakat wark yayamna kidika minit lautasmana dai, dimana minik babahna kidika, manna namangna yakat yuyulwi; dawak Dawan parasni bitik palni duwa kidika dakana wark muihni balna yuyulwa kidika.

⁵Sau akat manna sangmanaka kidika di yayamni manah yus yamnamana dai dawak dukih manawa yakat, tinglau kapat salanamana, ¡bahang inin mani kidika kiwi kawi!

⁶Manna lawa inin yakat wirlanamana dutni yayamwas balna kidika, dawak witingna sip namangna yakat yaklalauwasdai.

⁷Kaunah manna, wirah balna, kulnamna laihwatta tahatanauh Dawan kaiwarangkat. Yamak kau di dahyang muihni, di minik balna bahnin tahawa kidika, witing kulnin laihwatnin ki waslauwarang mani kidika.

⁸Manna bik kulnamna laihwattanauh, dawak parasni taihwattanauh, kat Dawan kidika sirihni kaiwarang bahang.

⁹Wirah balna, manna biri biri yulmana yuyulwinih, kaput laih lamana yamnin awas yulni; kat Wihta laih uman dūr yakat sakki.

¹⁰Wirah balna, sampla as dutanauh wawauhna dawak kulninna laihwawatna kidika, prapit balna Papang ayangni yakwi yuyulna balna kidika.

¹¹Kat yangna laih kultayangna wawauhwa balna kidika laih isningnalak ki. Manna dakamana Job amput wauhna kidika, dawak bik amanglatamana witni kat Dawan yaklauwi amput kalyamna kidika, kat Dawan laih dalani lani nuhni duwa bahang dawak bik minikun talwa bahang.

¹²Kidika minityakat, wirah balna Papang ayangni kau yakwi yuyulwinih: makau kisang kidika ayangni kau dawak sau ayangni kau bik, di ūk ayangni kau bik awaski. Manana “agha” atnamana kat, agha kawang; dawak “dikah” atnamana kat dikah kawang, kaput laih Papang dutni yakat manawirlawas karang.

¹³Manna kulnamna bukna kat mamatna yultanauh. Dawak wais alasna kat unbauwang.

¹⁴Muih as siknis karang kat, suts muihnibararak balna yulwi dukiwang, dawak witing yulni minitna yuyulwang Dawan ayangni kau dawak dia karak salalapwang.[2],

¹⁵Kasak kulnin kau minitna yuyulwang, siknis muihni kidika yamni kalwarang, Dawan yaklauwi dulauwarang; dutni yamna kat, dutni yamna kidika dawak diswarang.

¹⁶Kaput bahang, biri biri yultanauh dutni yamnamana kidika, dawak biri biri mamatna yultanauh, kaput laih sikmananis kidika kaupak yamni alahwanama. Lā kat muihni minityulwa kidika laih parasni nuhni duwi.

¹⁷Prapit Elías kidika muih al as mayang apat dai, witing kasak minityulwi yulna waslaunin awas, kaput laih sau minit akat waslauwas dai kurih bās minitkau papusbah.

¹⁸Kidika usnit kat watwi minityulna, dawak waslauna, dawak sau kidika di minik yakna.

¹⁹Wirah balna, manna pasmangna kaupak di rahm yakaupak pirini yaklawak, ūk kidika yaklauwi watwi laihwi dukiwarang kat,

²⁰amanglatanauh wais karang bik dutni yamyang kidika ta dutni kaupak nawatwi wirlawi dukiwarang kat, daunin kaupak laihwi yakwi, dawak kidika laih yamwi dutni balna manas kaupak dawak disnin.