Read Mayangna 1 Pita 1 Bible Online

1 Pita 1 - Mayangna bible

1 Pita 1

¹Yang, Pita, Jisas Krais aposnitel, adika wauhnitaya ultayang muih balna saunina kaupak naikau rani yalalahwa muihni balna yakat, Ponto, Galacia, Capadocia, Asia dawak Bitinia sauni sahyakna balna yakat,

²Papang yaklau muhnilau kau walwi yakna dai kidika witing yaklau ais yamnin kulna dai kidika kaput. Manna laih spirit munah holi manayamna witing yulni dakana atnamna dawak bik maisihni dis atnamna Jisas Krais āni karak. Minikun talnin lani dawak kulnin aslah lani kidika minitbayak dutanauh.

³Papang dawak Jisas Krais Papangni yakat ayangni nuhni yamdanang, witing dalani lani nuhni duwa kidika munah maiyamwakat watdi batahndi malahwana Jisas Krais watwi yaklauna kidika munah. Adika laih tahanin lani as sangka mayawi,

⁴dawak witing yaklau yamwakat di pahni as kisang yakat Papang apakna sakkidika dunamana karang, kidika laih sip daukalwaski, maisihni laihwaski, dawak bik kusulawaski.

⁵Manna Papang yakat rahm kulnin lani dutamana kidika yulni, witing yaklau parasni karak tamatna dakwi laihwi yaknin lani ridi yamna sakkidika laihna atnamna yulni, kidika laih witni mani balna yakat namangnakana karang.

⁶Adika yulni manna laih alasna manah mana, ma balna buas pasyakat wauhnin balna manas bayaktanama karang bik.

⁷Kat manna rahm kulnin lani dutamana kidika laih sihm gol kapat ki: yamni kidika laih kuhpau pasmunah buswi talna karang ki. Rahm kulnin lani sip niningkauh yaklauwa kidika laih wauhnin kidika laih baisa nuhni kalkulna ki gol kidika karak dawakat, gol kidika laih daukalnin sipki. Kaunah manna rahm kulnin lani dutamana kidika laih, kaput wauhwi bayakna karang kat, yamni talna kidika, alasna yaksihni dawak rispik lani bik dunamana karang Jisas Krais kalahwarang mani kat.

⁸Manna laih Jisas Krais kidika dalani talamana, talasmana karang bik; dawak waralaih, witing yakat talasmana yakauna rahm kultinah, alasna nuhni dawak alasna yaksihni karak bik alasna alahwamana yul kau laih yulnin sip awasmana,

⁹kat manna rahm kulnin lani dutamana kidika karak uita kuihnamna kidika uita laihtamana kidika yulni, kidika laih laihwi yaknin lani kidika.

¹⁰Uman muhnilau kau Prapit balna laih adika laihwi yaknin yulni kidika lakwi walwi tatalna dai, dawak Papang witing dalani lani duwa kidika kau manna yakat ais manawarang kidika yuyulna dai.

¹¹Krais spiritni kidika laih Prapit balna yakat baisa kau diyulwa dai Krais dalani wauhwarang kidika dawak usnit kat alasna yaksihni kaiwarang kidika bik; dawak witingna laih traitatalwa dai spirit yaklau mani dawak awarni bik diyulwa kidika walwi yakna atninna.

¹²Kaunah Papang yaklau diyulna dai witingna yuyulwa kidika laih witingna silp dinina awas ki, kaunah manna yamni atnamna kidika yulni. Bahang waralaih, adika yulni manayulna ki yul wisam yamni manayuyulna dai kidika muihni balna yaklau kisang kaupak Spirit Holi sihna kidika parasni karak. ¡Adika dini balna laih insal balna kat bik lakwi talnin dukih diawi!

¹³Kidika bahang, ridi awanauh dawak bik la yamni dutanauh. Manna tahanin lani dutamana kidika Papang dalani lani duwa kidika kau di manawarang kidika yakat āta dutanauh Jisas Krais kalahwarang mani kat.

¹⁴Walanibis balna yul dakayang mana kidika, Papang amangnilatasmana tanitkauh muihmana nuhni di dukih manawakat yalahtamana dai kidika kaput yalalahwinih.

¹⁵Nawatkauh laih, holi lani yakat yalahtanauh, kat Papang, witing yaklau kiunin manayulna kidika laih, holi bahang;

¹⁶bahang ulna yakat laih aput yulwi: “Manna laih holi awanauh, kat yang laih holi yang bahang.”

¹⁷Manna lawa Papang yakat “Papang” yultamana kat, witing yaklau muih balna bitik yakat lanina yamwa kidika witingna amput di yayamna kat kaput dawak muih balna kidika yakat bik satuk satuk talwas, manna laih rispik kalyamnamna ki adika sauni akat ma mahni yalahtanama kidika yakat.

¹⁸Bahang Papang yaklau manna kidika manalaihwi yakna manna muihmanabararak balna kaupak sangnika as dutni dunamana dai kidika kaupak; dawak manna laih yamni amanglatamana kidika manalaihwi yakna minit kidika di daukalnin dini kau minitlauwas dai, gol kidik awaskat sihm lalah kau kapat bik,

¹⁹kaunah Krais āni minit nuhni kidika karak, sakripais yamna kidika sihm sīp kurih as laihna kat dutni as bik dis dawak maisihni bik dis kidika kapat.

²⁰Krais laih adika dini sihwakat kaina dai muhnilau baisa sau yamwas dai kidika tanitkau, kaunah adika mani witni balna akat laih lāih kalahna ki manna yamni atnamna kidika yulni.

²¹Krais munah, manna laih Papang yakat kultamana, witing yaklau watwi dulauna kidika dawak bik alasnina yaksihni yamna kidika; kaput laih manna rahm kulnin lani dawak tahanin lani dutamana kidika bik Papang tingni yakat āta danamana.

²²Waralaih manna, rahm yulni yakat dakanamana kidika yulni, maisihni dis alahwanamana alas lani dis karak manna wanaihmana balna yakat dalani talnamna kidika yulni. Kaput bahang biri biri dalani kaltalnamna ki ismangna maisihni dis karak dawak parasmana bitik karak bik.

²³Bahang manna laih watta batahnta alahwanamana, dawak waralaih sau papangni balna dadauwa kidika karak awas, kaunah Papang yulni karak, kidika laih sangka ban kaput ki.

²⁴Kat ulna kidika yakat aput yulwi: “Muih balna bitik kidika laih sihm dibasta kapat ki, dawak nuhni kalkulna kidika laih sihm dibasta puluni kapat ki. Dibasta kidika laih kusulawi dawak puluni kidika laih bukwi,

²⁵kaunah Dawan yulni kidika laih ban kaput ki.” Dawak adika yulni laih laihwi yaknin yulni manna yakat manayulna kidika ki.