Read Mayangna 1 Pita 2 Bible Online

1 Pita 2 - Mayangna bible

1 Pita 2

¹Kaput bahang, di dudutni balna, alas yulnin, sins dis lani dawak tumnin, dawak muih yulni yulwi karinin satni balna bitik kaupak dakta alahwanauh.

²Muihbinina wisam batatahnna kapat, dukih waltanauh spirit taniwas maisihni dis kidika, kidika munah manna barakna atnamna dawak laihwi yaknin lani kidika bik duna atnamna,

³manna rahm palni amanglanamana kat Dawan laih yamni kidika.

⁴Bahang Krais yaihnit yakat aiwanauh, kipala sangka as muih balna yaklau ruhmwi yayakna kidika, kaunah Papang niningyakat laih kipala as walwi yakna ki dawak bik minit nuhni kalkulna ki.

⁵Aput laih, Papang yaklau manna kidika sihm kipala sangka, makat yulnin spiritni ūni, sumalyang as holi kapat manayamna karang, Jisas Krais munah spirit niningyakat sakripais yamna atnin, Papang yamni talna atnin.

⁶Kidika bahang ulna yakat bik aput yulwi: “Yang lawik sayan yakat kipala as laktayang kipala as nuhni kidika, walwi yakna dawak bik minit nuhni kalkulna kidika; angdika muihni kidika yakat yamni kalkulwarang kidika laih alas kalyulwas karang ki.”

⁷Manna namangnakauh laih, rahm kultamana kidika, kidika kinipala laih minit nuhni kalkulna ki; kaunah rahm kukulwas muihni balna kidika niningnakauh laih ulna yakat yulwa kaput kalahwi: “Kipala as ū yamyang balna yaklau ruruhmna kidika laih, kipala as nuhni kalna.”

⁸Dawak ūk akat bik aput yulwi: “Kipala nuhni as yakat kalmana baunamana karang.” Bahang witingna laih kalnina babauwi yul yamni kidika dakakawas yulni: witingna laih kaput atnin yulni disihna.

⁹Kaunah manna laih sulani as manawalwi yakna, sumalyang as king dini yamna atnin, nisan as holi, tawan as Papang yaklau duna kidika. Dawak adika dini laih aput ki Papang warkni taldas dini balna yamna kidika yulna atnamna yulni, witing yaklau manayulna puksani kidika kaupak alahwa witing yaringni taldas dini kidika yakat āwana atnamna yulni.

¹⁰Manna laih muhnilau kau tawan bik awasmana dai, kaunah waralaih Papang tawanni mana; muhnilau laih Papang yaklau manna yakat mamaknakun manatalwas dai, kaunah waralaih mamaknakun manatwi.

¹¹Yang wanaih ki dalani balna, kalmana dinit buktayang, pa ūk muihni balna mana yakat, muihmana nuhni dukih manawa kidika yaklau solmana niningyakat kalbauwa kidika kaldadawinih.

¹²Papang yakat kukulwas muihni balna kidika pasyakat yamni lapaktanauh. Kaput laih witingna, waradika manna namangna yakat yuyulwarang bik manna laih sihm dutni yamyang balna mana kapat, witingna tatalwarang manna di yamni yamtamana kidika dawak Papang yakat ayangni nuhni yayamwarang witing yaklau muih balna bitik yakat diyulwi dakawarang mani.

¹³Dawan yulni, la tunan muihni balna bitik tingnina dinityakat awanauh; king tanit nuhni kidika yakat bik, kat tunan muihni nuhni kidika yulni,

¹⁴witing yaklau kabamint kayang balna yakat sihwa kidika dutni yamyang balna yakat wah diana atnin dawak di yamni yayamwa balna yakat laih rispik yamna atninna.

¹⁵Kat Papang laih dukih kalwi manna kidika di yamni yamna atnamna, kaput karak di amanglalawas dawak mutu balna kidika bik manna namangna yakat di as bik yulwas atninna.

¹⁶Muih pri balna kapat awanauh, primana lani kidika data dutni yamnin laih kukulwinih. Papang dini yamyang balna kapat awanauh.

¹⁷Muih balna bitik yakat rispik yamtanauh. Wanaihmana balna yakat dalani talnauh, Papang yakat dawak king tanit nuhni kidika yakat bik rispik yamtanauh.

¹⁸Di yamyang balna, manna damanawan balna yakat rispik lani karuk witingna tingnina dinit yakat awanauh, yayamni dawak amanglalawa balna yakat manah laih awaski kaunah dudutni balna yakat bik.

¹⁹Kat Papang laih yamni talwi la kat awas munah muih as wauhnin balna sip wauhwa kidika, witing muhni yakat yamnin dini kat yamwa kidika yulni.

²⁰Bahang manna di dutni as yamnamana yulni wah mananawarang kat, ¿ais as yamniyah kulnamna laihwatna karuk sip wauhna atnamna? Kaunah di yamni yamnamana kidika yulni dalani wauhtanama kat, dawak wauhnin kidika kulnamna laihwatna karuk sip wauhtanama kat, kidika laih Papang muhni yakat yamni talwi.

²¹Bahang adika yulni Papang yaklau manayulwakat aiwanamana, Krais laih manna yulmana dalani wauhna kidika yulni, witing amput di yamna kat kidika yakat tala usnit uina atnamna yulni.

²²Krais laih dutni as bik yamwas dai dawak muih as yakat bik alas kalyulwas dai.

²³Dutni kalyayamna mani kat, dutni lani karak nangnitnalawas dai; kalyayamwakat dalani wauhna mani kat, bilninalauwas dai, kaunah Papang yakat yamnin kalyulwa dai, witing laih barangni karak la yamwa kidika.

²⁴Krais yaklau mayang madutki balna kidika duwi kiuna pan prihni kidika minityakat, mayang laih dutni yakat dauna atnin dawak bik sangka lani as barangni yalahna atnin yulni. Krais laih muihni nuhni kidika kaldakna dai manna yamni alahwana atnamna kidika yulni.

²⁵Bahang manna laih muhnilau kau sihm sīp didisna kapat mana dai, kaunah waralaih Krais yakat wirlawanamana, sihm sīp maintalyang as kapat mainmanatalwa kidika.