Read Mayangna 1 Pita 3 Bible Online

1 Pita 3 - Mayangna bible

1 Pita 3

¹Manna sihm kaput bik, marid yayal balna, maridmana ahal balna tingnina dinityakat awanauh, witingna kaupak buas kidika yul yamni kidika yakat rahm kukulwas karang kat, manna lawa kulninna laihna atnamna, yul kau laih yultas, manna di yamtamana kidika karak,

²witingna yaklau manna maisihni dis di yamtamana kidika dawak Papang yakat rispik yamtamana kidika yakat bik talna atninna.

³Manna yakat yaksihni atnin dini kidika laih ahni minittang dini balna atnin awaski, minitbayakwi bas kusna kapat, gol kau di yamna balna kidik awaskat prak yayamni balna kidika,

⁴kaunah manna ismangna pasyakat atnin, daukalwas atnin dini yamni spiritni yudutni alasna yakat. Adika yaksihni adika laih Papang muhni yakat minit nuhni kalkulna ki.

⁵Bahang adika dini bik dai, muhnilau kau mani balna dai kidika yakat, yayal holi balna yaksihni kalyayamwa dini; witing laih Papang yakat yamni kalkukulwa dai dawak maridnina balna tingnina dinityakat kakawa dai.

⁶Sara laih kaput dai, Abraham yakat yulni dakana dai dawak aput kalyulna dai “dakiwan”. Dawak manna witing walanibis yayal mana kat, di yamni kidika yamtanama dawak di as bik yamadutas awanama.

⁷Manna namangnakauh laih, marid ahal balna, maridmana yayal balna yulnina kidika dakanauh. Risninapik lani duduwa kidika diatanauh, muih yal yudutni kidika yulni laih awaski, kaunah Papang witing dalani lani duwa kidika kau witingna yakat pramis diyamna kidika yulni manna sangmanaka yalahtamana kidika karak kapat. Manna kaput yamtanauh di as bik manausnin awas yulni mamatna yultamana kidika yakat.

⁸Witni kat, manna bitik aslah yalahtanauh, aslah kapat kaldaka dawak dalani kaltalnauh kalwanaih balna mana kapat. Dalani lani dawak kulnamna buknin lani bik dutanauh.

⁹Dutni manayayamwakat biriwi dutni yayamwinih. Nawatkauh, blisin lani kidika wirlata diatanauh, bahang Papang yaklau manayulwakat aiwanamana blisin kidika duna atnin.

¹⁰Kat: “Angdika muihni sangnika kidika dalani talnin dawak bik alasna atnin dukih kalawakat, tuni kidika maintalwang dutni yulnin awas dawak kungnimak balna kidika bik maintalwang alas yulnin awas;

¹¹dutni kidika kaupak naikau alahwah dawak yamni kidika yamtah, kulnin aslah lani kidika waltah dawak usnit uitah.

¹²Kat Dawan laih la kat muihni balna kidika maintalwi dawak minitna yuyulwa kidika bik didakawi, kaunah dutni yamyang balna kidika yakat laih niningkauh ki.”

¹³¿Wais yaklau dutni manayamwarangyah, manna laih di yamni kidika ban kaput yamtamana kat?

¹⁴Kaunah manna barangni atnamna kidika yulni dalani wauhnamna karang kat, ¡manna laih yamni palni awanama! Muih as yakat bik yamaniduduwinih, muihsak bik dadauwinih,

¹⁵kaunah Krais yakat rispik yamtanauh manna ismangna Daniwan kapat. Manna ma balna bitik yakat ridi awanauh angdika muihni balna yaklau manna tahanin lani dutamana kidika yulni manayulwi dakakawakat birita nangnitnalana atnamna,

¹⁶kaunah kulnamna bukna lani dawak rispik lani karuk bik yamtanauh. Manna kulnamna alasna atnamna kaput di balna kidika yamtanauh, manna Krais yakat kulyang balna mana kapat di yamni yamtamana kidika yulni muih ūk balna yaklau dutni manayuyulwa kidika, witingna silp yulnina yakauna yakasaldana atninna.

¹⁷Baisa yamni ki di yamni yamnin kidika yulni dalani wauhna atnin, Papang yaklau kaput dukih kalawakat, di dutni kidika yamnin karak dawakat.

¹⁸Kat Krais witing palni daunin dalani kidika wauhna mayang madutki kidika yulni, wat aslah ban kaput atnin. Witing laih yamni dai, kaunah dudutni balna kidika yulnina dalani wauhna, manna kidika Papang yakat manaduwi kiuna atnin yulni. Muih kapat dauna; kaunah spirit muihni dai kidika yulni, watwi sangka kalna.

¹⁹Dawak spirit muihni bahang, kiwi sumalna dai spirit balna silak kau bangdai kidika yakat.

²⁰Adika balna laih muhnilau kau mani yakat yul dakakawas dai, Noa mani balna dai yakat, kuring kidika yamwakat Papang laih kulnin laihwatna karuk tahawa dai mani, kidika yakat muih balna buas, bitik kat tiaskaubās, was paskaupak dilaihwi yakna dai kidika.

²¹Dawak kidika wasni laih was utuhwi yakna wasni dai, waralaih mayang laih kidika munah mailaihwi yakna. Was utuhwi yaknin kidika laih mamuihki nuhni kidika maisihni dis maiyamnin dini laih awas ki, kaunah Papang yakat kalyuldakat kulnin lani as maisihni dis mayana atnin; dawak Jisas Krais watwi yaklauna munah mailaihwi yakwi,

²²kisang yakat kilwi kiwi Papang tingnipal niningyakat sakkidika, dawak insal balna dawak spirit muihni balna ūk parasnina duduwa kidika bik witing tingni dinityakat wawatna kidika.