Read Mayangna 1 Pita 4 Bible Online

1 Pita 4 - Mayangna bible

1 Pita 4

¹Kidika bahang, Krais muihni nuhni yakat dalani wauhna kaput, manna bik sihm agha atnamna ki dalani wauhna atnamna. Bahang angdika muihni kat muihni nuhni yakat dalani wauhna kidika laih dutni kidika niningyakat daukalna,

²witing sangnika baisa watwa kidika laih Papang kulnin lani yakat yalahna atnin yulni dawak muihni nuhni dukih kalawa kaput laih awas.

³Manna laih ma mahni yamnamana Papang yakat kulwas muihni balna yayamwa kaput, bahang kidika mani balna yakat laih di suhlsuhl, di dutni dukih, wasak dinin dawak kasnin alasnina, minitbayak dinin lani dawak wayani dauh maisihni balna yakat ayangni tanit nuhni yamtamana dai.

⁴Waralaih, witingna sangninaka dutni kidika yakat usnit uitasmana kidika yulni, witingna laih taldas dini kapat tatalwi dawak manna yakat dutni manayuyulwi.

⁵Kaunah witingna laih yulnina yuyulna karang ki muih sangka dawak dadauna balna lanina yamna atnin ridi kalahna sakkidika muhni yakat.

⁶Bahang muih dadauna balna kat bik yul yamni kidika diyuyulna dai, spirit yakat sangka atninna yulni, Papang yulna kaput, adika sauni akat muihnina nuhni yakauna lanina yamna dai kat bik, muih balna yuyulwa kaput.

⁷Di balna bitik manina witni kidika kaiwi uliswi. Kidika bahang, manna laih la yamni dutanauh dawak kulnin lani rahm karuk mamatna yultanauh.

⁸Manna pasmangna yakat dalani lani kidika nuhni sakkarang, kat dalani lani kidika laih dutni lani balna mahni yakat dawak diswi.[1],

⁹Manna biri biri ūmana yakat kaldutanauh, muih as yakat bik yulni yultas.

¹⁰Papang prisantni balna sat sat maintalyang yayamni balna mana kapat, manna muihmana kat kat muih ūk balna yakat dinina yamtanauh ais prisantni lani dunamana kat kaput.

¹¹Manna kaupak muih as yulbauwarang mani kat, yulmana kidika laih sihm Papang yulni balna kapat kawang. Manna kaupak muih as wark as yamwarang mani kat, wark kidika yamtah Papang yaklau parasma mawa kidika bitik karak. Di balna bitik yamtanama kidika, yamtanauh Papang ayangni nuhni yamna atnin yulni Jisas Krais munah, witing laih alasna yaksihni dawak parasni bik ban kaput atnin duwa kidika. Kaput karang.

¹²Yang wanaihki dalani balna, kuhpau buswi talnin kidika yakat āwanamna kidika di as talasmana dini kapat laih kukulwinih, sihm di as taldas dini kapat.

¹³Nawatkauh, alasna alahwanauh Krais dalani wauhwarang kidika yakat dimana dutanama kidika yulni, dawak witing alasnina yaksihni kidika lāih kalahwarang kidika yakat bik alasna duna atnamna yulni.

¹⁴Manna laih yamni palni awanama, muih as yaklau Krais yulni dutni manayulwarang mani kat, kat Papang spiritni alasna yaksihni kidika laih manna mamatna yakat ban kaput kidika yulni.[2]

¹⁵Manna kaupak muih as dalani wauhwa kat, muih īna, di malna kidik awaskat dutni yamyang, dawak muih ūk yulnina pasyakat kana yulni laih atnin awaski.

¹⁶Kaunah kristian kidika yulni dalani wauhwa laih, yakasaldinin awaski, kaunah Papang ayangni nuhni yamnin ki kidika ayangni duna atnin yulni.

¹⁷La yamnin mani kidika laih uman kaiwi kana Papang sulani balna kidika kaupak. Dawak la kidika laih mayang mayulki yamwakat, ¿Papang yulni wisam yamni kidika yakat dakakawas muihni balna manina witni kidika laih ampat karangyah?

¹⁸Dawak la kat muihni kidika dadasni munah laihwi yaknin lani duwa kat, ¿ampat karangyah dutni muihni dawak dutni yamyang kidika laih?

¹⁹Dalani wawauhwa balna kidika Papang kulnin lani kat kaput wawauhwa laih, witingna laih yamni kidika yamwi tanitna yakat uininna ki dawak solnina kidika bik Papang witingna diyamna kidika tingni yakat āninna ki, bahang witing laih barangni ki.