Read Mayangna 2 Pita 3 Bible Online

2 Pita 3 - Mayangna bible

2 Pita 3

¹Wanaihki dalani balna, adika ki, wauhtaya wat bu manaultayang kidika. Wat bu yakat yang dukih yana dai, yulki balna karak, manayamtingkat barangni kulna atnamna.

²Manna ismangnakattanauh ma ūk balna dai yakat Prapit holi balna yuyulna dai kidika; dawak Dawan laihwi yakyang lāni balna, apostel balna yaklau manna yakat manasumamalna dai kidika.

³Di balna bitik yakat adika laih kulta awanauh: ma witni balna yakat muih aiwarang ki witingna dukih diawa lani dudutni balna kidika kaput yalalahwarang ki, dawak sarahni lani karak

⁴aput yulwi dakakana karang: “¿Krais watwi kainin pranimis dai kidika ais kalahnayah? Papangkina balna laih uman dadauna, dawak sau yamna mani kaupak ban kapat tanityakat kiwi.”

⁵Kidika muihni balna laih witingna amanglana atninna dukih diawas ki muhnilau mani kaupak uman kisang dawak sau duwa dai kidika, Papang yaklau witing yulni karak yulwakat was paskaupak kalahna dai kidika dawak was papus yakat laihwatwi duwa kidika.

⁶Was munah bik was nuhni āwa kat kidika sauni daukalna dai.

⁷Kaunah waradika kisang balna dawak sau duwa kidika laih, kuh yaklau busna atnin dana Papang yaklau yamnin yulna kaput. Kidika kuhni laih la yamnin mani yakat dawak dutni yamyang balna disninna mani yakat busna karang ki.

⁸Baisa kidika minityakat, wanaihki dalani balna, damatnakahnin awaski Dawan niningyakat laih ma as kidika sihm kurih 1000 kapat ki, dawak kurih 1000 kidika laih sihm ma as kapat ki.

⁹Dawan witing pranimis yamnin kidika laih tahawas karang ki, muih balna buas yuyulwa kaput; kaunah witing laih manna yakat kulnin laihwatnin lani duwi, bahang witing dukih kalawas ki muih as bik dauna atnin, kaunah muih bitik Papang yakat wiryaklana atnin kidika dukih kalawi.

¹⁰Kaunah Dawan kainin mani kidika laih sihm di malyang kapat kaiwarang ki. Bahang kisang balna kidika laih parasni yamadangni atwarang ki, dunin dini balna kidika laih kuhpau yaklau daukalmukna karang ki, dawak sau yakat di balna bangkidika laih, Papang lani kidika dinityakat watna karang ki.[5]

¹¹Bahang kaput laih di balna bitik kidika daukalna karang ki, ¡manna laih ampus holi dawak dalani lani karak yalahtanamayah!

¹²Papang kaiwarang mani kidika tahatanauh, dawak traitala sirihni yamtanauh. Kidika mani kisang balna kidika laih kuhpau yaklau daukalmukna karang ki, dawak dunin dini balna kidika laih kuh dahlwa pasyakat arwi dislalana karang ki;

¹³kaunah mayang laih kisang dawak sau wisam kidika tahadi Papang yaklau pramis yamna kidika, kidika yakat laih di balna bitik kidika la kat dawak bik yamni karang ki.

¹⁴Kidika bahang, wanaihki dalani balna, manna adika dini balna tahata kauna, traitala di balna kidika yamni yamtanauh Papang yaklau kulnin aslah lani, maisihni dis dawak dutni as bik dis karak manatalna atnin yulni.

¹⁵Manna damatnakahwinih mayang Madakiwan yaklau kulnin laihwatnin karuk maiyamwa kidika laih laihwi yaknin lani kidika mayang duna atnin yulni yamwi. Adika yulni mawanaihki dalani Pal bik manna yakat manaulna ki, Papang yaklau sins lani kalana kaput.

¹⁶Witing wauhtaya ulna balna bitik yakat adika yulni manayulna ki, kidika balna pasyakat di amangladas dini balna bik bangki di amanglalawas dawak rahm kulnin lani yakat parasnina dis balna kidika bik niningna iwitwi, Ulna balna ūk yakat niningna iwitwa kapat,[6] witingna silp disninna yulni.

¹⁷Kidika bahang, wanaihki balna dalani, manna uman baisa kau adika dini balna amanglatamana bahang, mainkaltalnauh, dutni yamyang balna alasnina karak manalakwi manamurnin awas yulni dawak pamana yakat barangni mana kidika kaupak bik buknamna awas yulni.

¹⁸Kaunah Madakiwan Jisas Krais kidika yamni amangnilatanauh dawak witing dalani lani duwa yakat baraktanauh. ¡Witing alasnina yaksihni kidika laih waradika dawak ban kaput karang! Kaput karang.