Read Mayangna 1 Jan 1 Bible Online

1 Jan 1 - Mayangna bible

1 Jan 1

¹Manna yakat manaultayangna muhnilau kau sakdai yulni kidika, mayang silp matapaki dakanamayang dai kidika dawak mamikpa karak bik talnamayang dai kidika. Kat talnamayang dawak matingki karak bik laihnamayang bahang. Sangka atnin Yulni kidika yuldi.

²Adika sangnika laih lāih kalahna: yangna talnayangna dawak kidika yulni yultayangna, dawak adika sangnika ban kaput atnin yulni kidika manna yakat manayultayangna, kidika laih Papangni karak sakdai dawak yangna yakat lāih kalahna ki.

³Bahang, manna yakat manayultayangna, talnayangna dini kidika dawak dakanayangna dini kidika bik, manna laih yangna karak aslah atnamna yulni, sihm yangna Papang dawak Walanibis Jisas Krais karak aslah yangna kapat.

⁴Adika dini balna manna yakat manauldi yangna alaskinana kidika aitani atnin yulni.

⁵Adika yulni kuduh Jisas Krais yaklauwi yangna yakat yanasumalna kat manna yakat manayultayangna kidika: Papang laih awas yaringni ki dawak witing yakat laih puksani as bik diski.

⁶Witing karak aslah mayang atdi yuldarang, kaunah puksani yakat yalahda laih, alas yuldi dawak rahm yulni kidika bik lan malahwaski.

⁷Kaunah awas yaringni yakat yalahda laih, sihm Papang awas yaringni yakat sak kaput, bahang kaput laih mayang karak aslah mayang, dawak witing Walanibis Jisas āni kidika bik madutki balna bitik kau maisihni dis maiyamwi.

⁸Dutni as bik dismayang atdi yuldarang kat, mayang silp alas kalyuldi dawak mayang yakat di as bik rahm diski;

⁹kaunah madutki balna kidika yakdi yuldarang kat, Papang, la kat kidika yaklau madutki balna dawakat disna karang dawak maisihni dis bik maiyamna karang.

¹⁰Dutni yamdas ki atdi yuldarang kat, Papang laih alas muihni kalyamdi dawak witing yulni kidika rahm palni dudaski.