Read Mayangna 1 Jan 2 Bible Online

1 Jan 2 - Mayangna bible

1 Jan 2

¹Yang walakibis balna, adika dini balna manaultayang dutni yamtas atnamna yulni. Muih as dutni yamwarang bik, Papang muhni yakat manakitdaknin muihni as dudi, kidika laih Jisas Krais, dawak witing laih la kat ki.

²Jisas Krais laih sakripais kalyamna madutki balna kidika dawak disna atnin yulni; dawak mayang madutki balna manah laih awaski, kaunah muih balna bitik dutnina.

³Papang lani balna kidika kat dakadarang kat, mayang laih rahm kulnin ki witing yakat amangnilanamayang kidika.

⁴Kaunah muih as aput yulwarang kat: “Yang laih amangnilatayang”, dawak lani balna kidika kat dakawas kat, witing laih alas yulyang muihni dawak witing yakat di rahm kidika diski.

⁵Wirlawakat, angdika muihni witing yulni kat dakawarang kat, witing laih rahm palni dalani kaltalna karang ki, dawak kaput laih mayang amangladi witing karak aslah mayang kidika.

⁶Angdika muihni Papang karak aslah alahwanayang ti yulwa kidika laih, Jisas Krais yalahna kapat yalahnin ki.

⁷Wanaihki dalani balna, adika lani balna manaultayang adika laih wisam awaski: muhnilau kau dunamana dai kidika ki. Adika lani umani laih uman dakanamana yulni kidika ki.

⁸Dawak, kaput bik, adika manaultayang adika laih la wisamni ki, kidika laih Krais niningyakat dawak manna namangna yakat bik rahm ki, kat puksani kidika laih bayakwi kiwi dawak awas rahm kidika laih uman yaringni kalahwi.

⁹Angdika muihni awas yaringni yakat sakyang ta kidika laih, kaunah wanaihni yakat laih dutni kalyamwa kat, kidika laih baisa puksani yakat sak ki.

¹⁰Angdika muihni wanaihni yakat dalani talwa kidika laih awas yaringni yakat yalahwi, dawak sip di as bik kalyamwakat bukwas karang ki.

¹¹Kaunah angdika muihni wanaihni yakat dutni kalkulwa kidika laih puksani yakat yalahwi dawak bik puksani yakat likki, dawak witing amanglawas ki angkat kiwa pa, kat puksani kidika yaklau minikpa di talwas kalyamna bahang.

¹²Walakibis binina, manna yakat manaultayang kat Papang yaklau Jisas Krais munah dutmana dawak disna bahang.

¹³Papang balna, manna yakat manaultayang kat muhnilau kau sakdai kidika yakat amanglanamana bahang. Wawahma balna, manna yakat manaultayang kat dutni kidika yakat minit bayaknamana bahang.

¹⁴Walakibis binina, manna yakat manaulnayang, kat Papang yakat amanglanamana kidika yulni. Papang balna, manna yakat manaulnayang, kat muhnilau kau sakdai kidika yakat amanglanamana kidika yulni. Wawahma balna, manna yakat bik manaulnayang, kat pararasnimana kidika yulni dawak Papang yulni kidika ismangna yakat dunamana kidika yulni, dawak dutni kidika yakat bik minitbayaknamana kidika yulni.

¹⁵Sau yakat dalani tatalwinih, dawak kidika di balna duwa kidika bik. Angdika muihni sau yakat dalani talwarang kat, Papang yakat laih dalani talwas ki;

¹⁶kat sau mayawa dini kidika as bik Papang kaupak kaiwas ki, kaunah sihm kidika sauni kaupak kaiwi. Dawak adika ki sau yaklau mayawa kidika: dutni lani mamuihki nuhni dukih mayawa kidika dawak ritsni balna mamikpa yakat dukih mayawa kidika bik.

¹⁷Kaunah sau kidika laih witwi kiwi, di dudutni balna duwa kidika kauna; wirlawakat, angdika muihni Papang kulnin lani yamwa kidika laih ban kaput atnin sangka ki.

¹⁸Walakibis binina, witni awarni kidika laih adika ki. Manna dakanamana antikrais kaiwa kidika; bahang yamni, waralaih antikrais mahni palni kalalahna ki. Kidika yulni amangladi witni awarni kidika.

¹⁹Witingna laih mayang mapasking kaupak kalalahna; kaunah rahm mayang balna kaupak dai kidika awaski. Kaunah kaput kalahna lāih amanglana atnin bitik laih mayang kaupak awas kidika.

²⁰Krais Holi kidika yaklau, manna kidika witing dini manayakna Spirit kidika karak, dawak manna bitik laih di balna kidika yamni amanglatamana.[1],

²¹Bahang manaultayang, di rahm kidika amanglatasmana yulni laih awaski, kaunah amanglatamana kidika yulni; dawak manna amanglatamana alas lani as bik di rahm kaupak kaiwas kidika.

²²¿Wais kidika alas muihni yah? Angdika muihni Jisas laih Mesías awas ki ti yulwa kidika ki. Kidika ki antikrais, kat Papang kidika dawak Walanibis kidika bik talwas ki ti yulwa bahang.

²³Angdika muihni Walanibis kidika yakat talwas ki ti yulwa kidika laih, Papangni kidika yakat bik diski; kaunah Walanibis yakat ilpni yulwa kidika laih, Papangni kidika yakat bik duwi.

²⁴Kidika bahang, manna ismangna yakat apakta dutanauh muhnilau kau dakanamana yulni kidika; dawak muhnilau kau dakanamana kidika ismangna yakat watwarang kat, kaput bik laih manna aslah awanama Walanibis dawak Papangni kidika karak bik.

²⁵Adika palni adika ki Jisas Krais yaklau pramis maiyamna kidika: ban kaput sangka atnin kidika.

²⁶Manaultayang wais balna yaklau alas manayuyulwarang kidika balna yulnina.

²⁷Kaunah manna laih Spirit Holi kidika dutamana Jisas Krais yaklau kidika karak witing dini manayakna kidika, dawak muih as bik alas manayulna atnin dini awaski, kat witing yaklau Spirit manana kidika laih di balna bitik niningyakat manasumalwi, dawak witing sumalwa yulni balna kidika laih rahm ki dawak alas lani awaski. Krais karak aslah awanauh, Spirit yaklau amput manasumalna kat kaput.

²⁸Waralaih yang walakibis binina, Krais karak aslah awanauh, witing kaiwarang mani kat yamni kaltalna atnin yulni dawak witing muhni yakat asalni dakanin laih awas.

²⁹Manna amanglatamana Jisas Krais laih la kat kidika, bahang amanglana atnamna ki angdika muihni balna la kat dini yayamwa kidika bik Papang walanibis balna.