Read Mayangna 1 Jan 3 Bible Online

1 Jan 3 - Mayangna bible

1 Jan 3

¹Talnauh Papang yaklau mayang yakat dalani maitalwa mani kat, Papang walanibis balna maiyulninna sipki, dawak rahm witing walanibis mayang. Kaput bahang, sau muihni balna kidika laih amangnilalawaski, bahang Papang yakat baisa amangnilalawaski.

²Wanaihki dalani balna, mayang laih uman Papang walanibis mayang. Dawak usnit kat ampat mawarang kidika baisa taldas karang bik, Jisas Krais watwi kalahwarang mani kat witing kapat mawarang ki, kat witing ais ampat kat taldarang kidika yulni.

³Dawan angdika muihni balna witing yakat adika tahanin lani duduwa kidika laih, witing alas maisihni dis kalahwi, sihm Jisas Krais maisihni dis kapat.

⁴Kaunah dutni yayamwa balna kidika laih, dutni ki; kat dutni kidika laih dutni ki.

⁵Manna amanglatamana Jisas Krais laih sau akat kaina dutni balna kidika laihwi yakna atnin, dawak witing laih dutni as bik diski.

⁶Kaput bahang, angdika muihni witing karak aslah kidika laih, baisa dutni yamwi tanityakat kiwas ki; kaunah angdika muihni dutni yamwa kidika laih, baisa kaltalwaski dawak bik amangnilawas ki.

⁷Yang walakibis binina, muih as bik alas manayulnin awaski: angdika muihni la kat kidika yakat lan kalwa kidika laih la kat ki, witing laih la kat kaput;

⁸kaunah angdika muihni dutni lan kalwa kidika laih muih alasni yulyang kidika dini, kat muih alasni yulyang kidika laih muhnilau kau dutni yamwi. Adika palni yulni kaina Papang walanibis kidika: muih alasni yulyang yaklau di yamna balna kidika daukalna atnin.

⁹Papang walanibis laih as bik dutni kidika lan kalwas ki, kat Papang yaklau sangnika kalana kidika duwa bahang; dawak baisa sip dutni yamwas ki kat Papang walanibis kidika yulni.

¹⁰Amangladi angdika Papang walanibis balna kidika dawak angdika muih alasni yulyang walanibis balna kidika bik, kat angdika muihni yamni yamwas kidik awaskat yamni yamwa karang bik wanaihni yakat dalani talwa kidika laih, Papang dini awaski.

¹¹Adika ki manna muhnilau kau dakanamana yulni kidika: biri biri dalani kaltalnin.

¹²Sihm Caín kapat awas mawang, dutni muihni dai kidika dawak wirahni yakat īna kidika. ¿Dawak ais yulni ina yah? Kat Caín di yamwa balna dai kidika laih dutni dai bahang, dawak wirahni di yamwadai kidika laih yamni dai.

¹³Yang wirahki balna, manna di talas kapat atwinih sau muihni balna kidika yaklau dutni manayayamwakat.

¹⁴Yangna laih dauna kaupak sangka yakat lawanayangna, dawak amanglatayangna kat yangna wanaihkina balna yakat dalani talayangna bahang. Angdika muihni wanaihni yakat dalani talwas kidika laih uman dauna ki.

¹⁵Angdika muihni witing wanaihni yakat dutni kalyamwa kidika laih muih iyang as ki, dawak manna amanglatamana muih iyang muihni as bik witing sangnika kidika ban kaput atnin duwaski.

¹⁶Mayang amangladi dalani lani laih ais kidika kat Jisas Krais witing sangnika kidika mayang mayulki kalana; sihm kaput bik, mayang masangkika kidika bik mawanaihki balna yulnina dianin ki.

¹⁷Bahang muih as kidika di duyang karang kat dawak wanaihni kidika ilp dukih kalwakat talwarang, kaunah kalawas karang kat, ¿amput witing isning yakat Papang kaupak dalani lani kidika duwarangyah?

¹⁸Yang walakibis binina, mayang dalani lani duda kidika yul manah laih atnin awaski, kaunah lāih yamwi niningkanin ki.

¹⁹Aput karak mayang amanglana mawarang mayang laih rahm dini mayang kidika, dawak Papang muhni yakat yamni kaldakadarang;

²⁰bahang maising kidika di as yulni mayulki yakwakat, Papang laih maising kidika karak witing kauh nuhni ki, dawak di bitik amanglawi.

²¹Wanaihki dalani balna, maising kidika mayulki yakwas kat, Papang muhni yakat yamni maikulwi;

²²dawak witing yaklau mayana karang di kalyulda kidika bitik, kat witing lani balna kidika kat dakada bahang dawak bik witing yamni talwa dini kidika yamda bahang.

²³Dawak witing lani kidika laih witing walanibis Jisas Krais yakat rahm kulna atnin, dawak biri biri dalani kaltalna atnin witing yaklau yamnin maiyulna kaput.

²⁴Angdika muihni balna witing lani balna yakat dakakawa kidika laih witing karak yalalahwi, dawak witing laih witingna karak ki. Dawak mayang kidika karak amangladi witing laih mayang karak kidika: Spirit mayana kidika yulni.