Read Mayangna 1 Jan 5 Bible Online

1 Jan 5 - Mayangna bible

1 Jan 5

¹Bitik kasak kulnin duwa kidika Jisas Krais laih Mesías, kidika muihni laih Papang walanibis; papangni dalani talwa kidika, walanibis balna kidika bik dalani talwi.

²Papang yakat dalani talda kat, witing yulwa balna kidika yamdi, amangladi dalani taldi Papang walanibis balna yakat bik.

³Papang yakat dalani talnin kidika laih yulni balna dakawi yamnin; dawak lāni balna kidika laih truknin dini as awaski,

⁴kat Papang walanibis balna kidika bitik laih sau adika minit bayayakwi. dawak mayang kasak kulda kidika yaklauwi mayawak sau adika minit bayaknamayang.

⁵Wais kat Jisas kidika Papang Walanibis kulwa kidika, sau adika minit bayakwi.

⁶Jisaskrais kaiwarang kidika laih sainni āwi dana ki, was dawak ā karak; was manah laih awaski, kaunah was ā karak. Sihm Spiritni kidika witnis adika dini, dawak Spirit kidika kuduh rahm kidik.

⁷Witnis kidika laih bās ki:[3]

⁸Spirit, was dawak ā; bāspak aitani libitwi.

⁹Muih ahal witnis yuyulwa kidika dakadi, kaunah Papang witnis yulwa kidika laih tanit minit nuhni ki, kat kidika laih Papang yaklauwi Walanibis yulni witnis yulna kidika bahang.

¹⁰Wais kat Papang Walanibis yakat kasak kulwa kidika, adika witninis witing kulnin yakat duwi kiwi; Papang yakat kulwa kidika, alas muihni kapat kalwi, kat Papang witing Walanibis witninis yulna yakat rahm kulwa bahang.

¹¹Adika witninis kuduh Papang sangka ban atnin mayana kidika, dawak adika sangnika kuduh Walanibis al yakat sakkidika.

¹²Papang Walanibis al yakat duwa kidika, adika sangnika bik duwi; kaunah wais kat Papang Walanibis al kidika yakat duwas kidika laih, di diski.

¹³Adika manna yakat manaultayang Papang Walanibis al yakat kasak kultamana kidika, amanglanamna sangka ban atnin kidika dutamana.

¹⁴Makulnik kidika Papang yakat ādi dudi, kat witing kulnin lani kat di yulda kidika laih maidakawa bahang.

¹⁵Dawak kaput bik amangladi, mamikityulda balna kidika Papang dakawi, dawak bik amangladi uman dunamayang yulnamayang kidika.

¹⁶Muih as witing talwak wanaihni kidika dutni as yamwi kaunah daunin yakat kaldukiwas kidika, minityulnin ki, dawak Papang yaklauwi wirah kidika sangnika kalana karang. Kaunah dutni balna kidika daunin yakat bik duwi kiwi, kidika yulni laih yultasyang mamatna yulnamna.

¹⁷Dutni kidika bitik laih dutni; kaunah dutni buas kidika daunin yakat duwi kiwas ki.

¹⁸Amangladi wais kat Papang kidika Papangni duwa kidik, baisa dutni yamwas ki, kat Papang Walanibis al kidika yaklauwi maintalwi, bahang dutni kidika laihwas ki.

¹⁹Amangladi Papang kaupak mayang, sau adika bitik laih dutni dinit yakat sakki.

²⁰Dawak bik amangladi Papang Walanibis al kidika kaina, dawak amanglanin kidika mayana Papang rahm kidika. Aslah palni mayalahdi rahm kidika karak, yuldarang laih Walanibis Jisaskrais. Kidika kuduh Papang rahm palni kidika dawak sangka ban atnin kidika.

²¹Walakibis balna, amungtalnauh dawan dauh balna kidika.