Read Mayangna Jueces 11 Bible Online

Jueces 11 - Mayangna bible

Jueces 11

¹Galaad sauni yakat al as kalbauyang muihni kulnin dadasni as sakdai ayangni Jefté. Yal al suhlsuhl as walanibis, alni ayangni laih Galaad.

²Bahang Galaad yalni kidika walanibis ūk duna dai kidika walanibis balna bararakna mani kat, wirahnina Jefté kidika ūnina paskaupak kangwi yayakna, dawak bik kalyuyulna papangnina dini balna kidika as bik duwas karang, kat Jefté kidika nanang ūk bahang.

³Kaput laih Jefté kidika wirahni balna kaupak kalahwi kiri kiwi Tob sauni yakat yalahna dai, bahang kidika pāni yakat muih dudutni buas uduhwi duna kat kalpakwi kalahwi kiri awawaihwadai.

⁴Ma as as bayakwak amonita balna Israel niningyakat kalahwi kalbabauna dai,

⁵dawak Galaad tawanni tunan muihni balna kalpakwi yulbauwi dawi, Tob sauni yakat uiwi Jefté kidika yulwi duahaina,

⁶dawak kalyuyulna: —Aiwa yangna takinatuna awa kalbautah, amonita balna niningna yakat.

⁷Jefté aput diyulna: —¿Yangkau dutni yatalasmana dai, dawak papangki uni kaupak bik yakangta yaktasmana daih? ¿Ais yamta aiwa yawaltamanah manna namangna yakat dutni kaiwak?

⁸—Kat yangna nikingna yakat dutni kaiwa bahang mawaltik aiwayangna. Dukih yanawi man yangna karak aiwang kalpakdi amonita balna niningna yakat kalbauna atnin, dawakat kaput bik Galaad kau bang kidika bitik man takinatuna awama.

⁹—Manna dukih manawakat, yang wattik nawattik aiwik kalbauna atnik amonita balna niningna yakat, dawakat diyulna, Dawan yaklauwi yamwakat minit bayakki kat, manna bitik tamana tunan awaki.

¹⁰Dawakat tunan muihni balna kidika yuyulna: —Dawan kidika maidakana, bahang yamtanaki yulnaman balna kidika bitik.

¹¹Kaput laih, Jefté witingna karak kalpakwi panina yakat uina, dawakat tanina tuna nuhni ahana dai. Muhnilau yul as yulna dai kidika, Mizpa pāni yakat watwi Jefté yulwadai Dawan muhni yakat.

¹²Kidika usnit kat, muih as yakwi sihna amonita balna kingnina yakat, kalyulwi dakana atnin: “¿Man yang niking yak ais dutaman, yang sauni akat aiwa yakalbaunam?”

¹³Amonita balna kingnina yaklauwi diyulna, Jefté muih sihna balna yakat: “Israel balna manna Egipto kaupak alahwanamana kat, yangna saukina dakyaknamana, Arnón wasni kaupak, Jaboc dawak Jordán wasni kat. Kaput bahang nawatta yatah yani munah.”

¹⁴Jefté watwi muih ūk yakwi sihna amonita balna kingnina yakat,

¹⁵adika yulni karak. “Adika kuduh Jefté nangnitlana kidika: Israel yangna adika, man sauma dakyaktasyangna, moabita dawak amonita balna yakat bik.

¹⁶Egipto kaupak alahnayangna, dawak kauhmak wanilang munah bayaknayangna Kuma pauni kat, dawak cades kat yawik awanayangna.

¹⁷Bahang yul duwi uiyang muihni balna sihnayangna Edom kingni yakat, yanadawak witing saunina munah bayakna atnikna, kaunah witing laih yanadawak bayaktasyangna dai. Moab king bik yanadawak bayaktas danayangna. Kidika bahang Cades yakat watnayangna.

¹⁸Kidika usnitkat, kauhmak wanilang munah lapaktik Edom sauni balna yaihnit munah awaihnayangna dawakat bayaktik yawanayangna Moab sauni ma-kilwa nining yakat yawik datik, Arnón wasni kung yakat ū dunayangna kaunah Arnón wasni kidika daklawas yangna dai kat kidika wasni nakas yakaupak laih Moab sauni kulna dai bahang.

¹⁹Muih yaktik sihnayangna Sehón yakat amorreo balna kingnina Hesbón yakat king kawa tusdai yakat kalyulna yangna yanadawak witing sauni-pas munah bayaktik yangna saukina yakat yawinikna.

²⁰Kaunah Sehón witing yanadawak bayaktas yangna dai; nawatkauh kalbauyang ahalni balna bitik uduhwi duna dai Jahaza pāni yakat dawi nikingna kauh kalbauna dai.

²¹Kaunah Dawan, Israel Papangni yaklauwi witing tawanni yakat kalana minit bayaknin kidika, bahang Sehón dawakat kalbauyang ahalni balna duwa dai kidika bitik minit bayakna yangna, dawakat amorreo balna saunina bitik dunayangna dai:

²²Arnón wasni kaupak Jaboc kat, dawakat kauhmak wanilang kaupak Jordán kat.

²³¿Man kidi waisman, Dawan yaklauwi amorreo balna tingnina kaupak dakyakwi yanana kidika man lawa yanadakyaknam?

²⁴Man damawan Quemós yaklauwi di as mawada kidika man dima kultaman, ¿rahm awasyah? Bahang yangna bik yangna dikina kultayangna Dawan yaklau yangna dikina yanana kidika.

²⁵¿Zipor walanibis Balac Moab kingni kidika karak man kau tanit kaldakaman? Witing yangna nikingna yakat kalbauna kaiwas ki.

²⁶Kurih 300 dawi, Hesbón yakat yalahtayangna, Aroer yakat dawakat Aroer yaihnit kau pa binina balna yakat bik, dawakat Arnón yaihnit kau tawan nunuhni yakat bik; ¿amput dawak manna kidika sauni balna yulni yana yultasmana daih ma mahni yalahna yangna pasyakat?

²⁷Yang man yakat dutni as bik mayamtasyang. Man laih takat dutni yamtaman aiwa nikingna kauh kalbautaman. Kaunah Dawan laih wihta kidika bahang witing yaklauwi Israel balna dawi amonita balna lanina kidika yamna karang.”

²⁸Amonita kingni Jefté yulna kidika dakawas dai.

²⁹Kaput laih Dawan spiritni kidika Jefté minit yakat kiuna, dawakat witing kalahwi awaihna Galaad, Manasés dawakat Mizpa Galaad pāni munah bayakna, amonita balna niningna yakat kalbauna atnin yulni.

³⁰Jefté yaklauwi Dawan yakat aput pramis yamna dai: “Man lawa yatang amonita balna niningna yakat minit bayakki kat,

³¹Sakripais karauni kauna buswa kidika man yakat buski, wais palni tatuna kalahwi kaiwarang kidika yang yakat, nawattik yawingkat war kaupak.”

³²Jefté yaklauwi amonita balna niningna yakat kalbauwak Dawan yaklauwi kalawak minit bayakna dai.

³³Jefté yaklauwi waihnila balna mahni ina dai dawakat tawan 20 laih dakyakwi duna dai, kidika pāni balna dakyakna dai kidika laih Aroer, Minit dawak Abel-keramim pāni balna walsah yakat dakyakna dai. Kaput laih Israel muihni balna yaklauwi amonita balna yakat taihwi duduna dai.

³⁴Jefté mahka ūni kau kiuna Mizpa yakat, bahang walanibis yal aslah duwa dai kidika niningkauh kalahwi kiwi kalpakna, kilingnin dini isihwinah. Kidika kaupak walanibis yal ūk disdai, dawak walanibis ahal bik,

³⁵kidika bahang walanibis kaput yamwak talwi witing alas parakni iswi bisna dai tanka laih muihsakdauna, dawi aput yulna: —¡Alakaih, walakibis yal aslah man kidika, dalani nuhni palni yatamahn! ¡Man lawa alaskina kidika dispamnaman Dawan yakat pramis as yamna yang, bahang waralaih kidika pranimis yamnik ki!

³⁶Sirau kidika papangni yakat aput kalyulna: —Dawan kau ais pranimis yamnin yulnaman kidika yamta, kat witing laih man kau ais yamnin yulna kidika uman yamna, kidika bahang kalbauta minit bayaknaman, waihmala amonita balna niningna yakat.

³⁷Kaput kaunah, man kalma dinit yakat buktik yultayang, yadatang yawakuh waiku bu, asang balna yakat kaltalyang balna karak kalpaktik, yawik aidakuh, al dutas aput dautayang kidika yulni.

³⁸Jefté yaklauwi waiku bu kalana dai walanibis yakat, kidika wainiku bu pasyakat kaltalyang balna karak kalpakwi asang balna yakat kiwi kaidana dai al duwas dauwa kidika yulni.

³⁹Kidika wainiku bu bayakwak papangni yakat kiuna dawakat witing Dawan kau amput pramis yamna dai kidika yakat yamwadai. Jefté walanibis baisa wat as bik al kalpakwas dauna.

⁴⁰Kidika bahang Israel balna kurih bitik laih ma arungka kidika uiwi kakaidi Jefté walanibis yulni uiwa kidika muihni balna laih sirarau manah ki.