Read Mayangna Jueces 12 Bible Online

Jueces 12 - Mayangna bible

Jueces 12

¹Efraín sulani ahal kidika bitik kaluduhwi Jordán wasni kidika dakyaklawi, Zafón nining yakat uiwi Jefté yakat kalyuyulna: —¿Amput dawak amonita balna niningna yakat kalbauna yawaman kat, yangna akat bik isingna paktang yawas yangna dai? ¡Warmani ūma pasyakat mahasakdi ūma bitik mabusdarang!

²Jefté aput diyulna: —Yang wanaihki balna dawi amonita balna karang kalbibilna dawakat manna yakat manayultingkat aiwa ilpkina awasdanamana.

³Yang talingkat aiwasdanamana bahang yang alas sangkika kidika daunin yaknayang, dawakat kalbaunayang, dawakat Dawan yaklauwi yāwakat minit bayaknayang. ¿Ais yulni manna aiwanamanah yang karak kalbaunin?

⁴Jefté yaklauwi Galaad alni bitik uduhwi duwi Efraín sulani balna niningna yakat kalbauwi minit bayakna. Efraín muihni balna yuyulna Galaad muihni balna Efraín dawi Manasés kidika balna walsah kau yalalahwa dai kidika muihni balna laih Efraín pāni kidika ruhmwi dadana kapat diyuyulna dai.

⁵Galaad muihni balna yaklauwi Jordán wasni tingni Efraín sulani balna duduwa dai kidika bitik didakyayakna dai, dawak Efraín muihni balna kiri awaihwi bayakdang atwi diyuyulwakat, biriwi diyulwi dakakawadai witingna kidika Efraín muihni balna pa, bahang yuyulwadai dikah,

⁶di papakwa dai yulnin “Shibolet” bahang witingna “Sibolet” atwarang kat, kat Efraín muihni balna kidika yulni sipawas dai yulnin, kaput laihwi pāni yakat ihiwa dai, Jordán wasni tingni kung yakat. Kidika mani balna yakat Efraín sulani balna dadauna dai ahal manah tausin 42.

⁷Jefté laih kurih tiaskauas Israel balna taninatuna kana dai. Dauna manikat, witing tawanni Galaad[25] yakat nununa dai.

⁸Jefté kaupak Israel balna taninatuna ūk kana kidika laih Ibzán, Betlehem kaupak dai.

⁹Witing walabis ahal 30 duna dai, dawakat yayal bik 30 duna dai, bahang bitik laih pa ūk kaupak muihni balna karak kalduduna dai. Ibzán kurih tiaskaubu Israel balna taninatuna kana,

¹⁰dawak dauwak Betlehem sauni yak nununa.

¹¹Kidika kaupak usnit kat Elón, Zabulón sulani Israel balna taninatuna kana kurih salap;

¹²dauwakat Ajalón sauni yakat nununa, witing sulani balna saunina yakat.

¹³Witing kaupak usnit yakat, Abdón, Hilel walanibis, Piratón kaupak dai, bahang Israel balna taninatuna kana

¹⁴kurih tiaskaubās. Abdón walabis ahal 40 duna dai, dawak mani balna laih 30 witingna balna bitik muyul as as kikilwa dai.

¹⁵Dauna manikat, Piratón pāni yakat nununadai, Benjamín sauni yakat pakkidika, Amalec[26] asangni balna yakat.