Read Mayangna Jueces 13 Bible Online

Jueces 13 - Mayangna bible

Jueces 13

¹Kaunah Israel kidika watwi Dawan minikpa yakat dutni yamna, dawak Dawan yaklauwi filisteo balna tingnina dinit yakat kurih 40 praisni āna dai.

²Zora yakat Dan sulani balna pasyakat al as likdai ayangni laih Manoa. Witing yalni kidika sip walabis duwasdai ban kaput.

³Kaunah mani as Dawan innisal yaklauwi witing yakat kiwi aput kalyulna: “Man sip walabis as bik yaktas danaman, kaunah waradika laih muih karuk dama, dawak kaput laih muihbin as yakma.

⁴Kaunah man wain diwinih, dawak dinin ūk balna parasni balna kidika bik, kaput bik kasnin maisihni kulna balna kidika bik kasnin-awas ki,

⁵walabis al as duma ki, dawak basni bik daknam awaski, kat kidika muihnibin kidika laih Papang dini yakna nazareo kapat karangki batahndawas tanitkauh, bahang witing yaklauwi Israel balna laihwi yakna karang filisteo balna tingnina kaupak.”

⁶Yal dai kidika kiwi alni yakat kalyulna: “Papang kaupak al as kaina sakyang dai pāni yakat, bahang kulnik abahlna, Dawan innisal kapat dai. Kalyultik dakasyang dai witing kidika wais pa, dawak witing bik yayulwi dakawasdai.

⁷Yayulna kidika laih muihbin as duma ki yatna dai, dawak bik warakaupak wain dawak dinin parasna balna kidika dinin awaski yatna, di kasnin maisihni kulna balna kidika bik kasnin awas, kat muihbin kidika laih Papang dini kulna karang bahang nazareo kapat, batahndawas tanit kau dawak dauna kat bik.”

⁸Kaput dawak Manoa Dawan kau aput kalyulwi minit yulna: “Dawan, kalma dinit yak buktik yultayang, kidika alni watta sihtah yangna akat, yangna ais yamnikna kidika yanayulna atnin, muihbin batahnwarang kidika ais yamtanakipa.”

⁹Manoa yulna kidika Papang dakana, dawak innisal kidika sihwak watwi kiuna yal kidika asangpas yak sakkat. Manoa laih kidika pāni yakat sak-awas dai bahang,

¹⁰yal dai kidika kiri kiwi kalyulna: —¡Dakah, muhnilau kau muih al as talna yang dai kidika watwi yang yakat kalahna!

¹¹Manoa dai kidika yaklauwi muih al sak dai yakat uina, al dai kidika aput kalyulna: —¿Man yah tanit kau yalki karak yulbauna man dai kidika? Insal biri nangnitlana: —Agha, yang dai.

¹²Manoa biri yulwa dai: —Man yana yulna man kidika kapat kalahna, ¿muihbin kidika amput muhtanaki yah? ¿Muihbin kidika amput yamtanaki yah?

¹³Dawan innisal biri nangnitlana: —Man yalma kau kalyulna yang dai kaput yamwang:

¹⁴wain dinin awaski, dawak wain minik kaupak wasni satni balna yamna kidika bik dinin awaski, kaput bik di maisihni kulna balna kidika kasnin awaski. Yang kalyulki balna kidika manah yamwarang.

¹⁵Manoa, witing kidika alni laih Dawan innisal kidika amanglawas awi, aput kalyulna: —Plisma palni, man yangna karak watta kuts bin as lahtik matanaki kidika kastah. Kaunah Dawan innisal kidika yaklau nangnitnalana: —Yang watki karang bik, sip man kasnam dini kidika yang kastas awaki ki. Kaunah sipki kuts bin kidika Dawan yakat sakripais karauni kauna busta kalana atnam.

¹⁷Bahang Manoa yaklau insal yakat kalyulna: —Man ayangma mahn bik maiyultah, man lawa maiyulnaman dini kidika kaput kalahwakat ting mana atnikna.

¹⁸Kaunah insal kidika yaklau nangnitlana: —¿Ais yulni man dukih mawih yang ayangki amanglana atnam? Kidika laih malni dini as amangladaski.

¹⁹Manoa laih kuts bin kidika dawak plawar minik satni balna kidika duwi, kipala as minityakat ilwi Dawan yakat sakripais karauni kauna buswi kalanadai. Bahang Dawan laih taldas dini as yamnadai Manoa dawi yalni kidika niningna yakat:

²⁰kuh kidika sakripais busnin pāni yakaupak dahlwi kilna kat, Manoa dawi yalni karak tatalna dai Dawan innisal kidika kuh dahlwa papusmunah kisang yakat kil'kaiwakat. Bahang witingna laih abukwi tunanina kidika sau kat susukna dai.

²¹Manoa witing amanglana dai kidika alni laih Dawan innisal dai kidika, bahang watwi witing muhni yakat dawak yalni muhni yakat bik kalahwas danadai;

²²dawak yalni yakat kalyulna: —Rahm palni mayang laih daudarang ki, kat Papang yakat talnamayang bahang.

²³Kaunah yal kidika yaklau nangnitlana: —Dawan yaklau mayang yakat mai-inin kulna katlaih, sakripais karauni kauna dawak minitdis kalanin dini kalanamayang kidika duwas kitdai, dawak bik maidawakat adika dini balna taldaskitdai. Adika dini balna bik maiyulwas kitdai.

²⁴Yal kidika mani kiwi kana mani kat, muihbin albin as duna dai, dawak ayangni laih Sansón paknadai. Muih al bin kidika laih barakwadai dawak Dawan yaklau blis kalyamwadai.

²⁵Dawak ma as kat Sansón kidika Dan ūni labanni yakat sakkat, Zora dawi Estaol karak walsah yakat, Dawan spiritni kidika witing yakat kalkalahwadai.