Read Mayangna Jueces 14 Bible Online

Jueces 14 - Mayangna bible

Jueces 14

¹Ma askat Sansón yaklauwi kiuna dai Timnat pāni yakat bahang filistea yal as talna,

²dawakat papangni balna yakat kiwi diyulna dai: —Plismana, filistea yal as Timna yakat talnayang kidika dunik kultayang, bahang laki yamtanauh.

³Kaunah papangni balna yaklau kalyuyulna: —¿Ais yamta filisteo muihni balna pasyakat yawa yal walnamyah, Papang kukulwas muihni balna kidika?[27] ¿Mawanaihki pasyakat, dawakat Israel pasyakat yayal diskatpah? Sansón yaklau nangnitlana: —Kidika sirau laihtak dukih yawi, bahang kidika yang yalki yanamna yamni kultayang.

⁴Papangni balna amanglalawas dai Dawan yaklauwi di balna bitik kaput yamwa kidika, bahang filisteo balna niningna yakat kalbaunin wawalwadai, kat filisteo balna yaklauwi Israel muihni balna niningna yakat di tataihwa bahang.

⁵Kaput laih Sansón papangni balna karak Timnat yakat uina dai. Sansón witing tawan wainni yamak yakat kiwi karak, layan wahma as nining yakat kalahna dai.

⁶Dawan spiritni Sansón yakat kallaihna dai, dawakat lakat laihwi bahna sihm kuts bin as kapat; kaunah papangni balna yakat diyulwas dai di kalahna kidik.

⁷Usnit kat sirau dukih kalawa yakarak kiwi yulbabauna dai.

⁸Ma as as bayakwak usnit kat, Sansón watwi kiuna dai yal sirau kidika mahka duna atnin, bahang kiwi ta piriwa yakat kawi kiuna, layan dauna kidika talna atnin, bahang layan dauna muihni yakat amak ū duduna dai.

⁹Amak uni kidika tingni kau kuhrwi yakwi kaswinah kiuna dai. Papangni balna yakat kiwi kuihwi amak kidika diawak didina dai kauna diyulwas dai layan dauna muihni kaupak yakna kidika.

¹⁰Sansón papangni, yal sirau yakat kiwi talna dai; dawakat Sansón alasna as yamna kidika mani balna wawahma balna manah alasna yayamwa dai kaput.

¹¹Kaunah filisteo balna laih yamaniduduwadai bahang,[28] kaltalyang balna 30 duwi uina dai, witing karak kalpakwi bang atnin.

¹²Sansón yaklauwi ahal 30 balna yakat diyulna: —Manna yakat yul malni as manayulki. Bahang ma tiaskaubu alasna karang pasyakat adika yulni malni kidika yakta yayultanama bahang kaput laih suruhmnin asnina linin kat as as manaki, dawak alasna yakat kanin asnina bik kana as as manaki.

¹³Kaunah yayultas awanama kat, manna lawa linin asnina suruhmnin as as yatanama, dawak alasna kau kanin asnina bik as as yatanama, manna bitik kau. Dawakat witingna biriwi nangnitlalana: —Bahang yul malni kidika yanayulta. Yangna dakana ki.

¹⁴Yul malni dai kidika Sansón yaklauwi aput yulna: “Kaswadai kidika kaupak kasnin dini as kalahna; dawak parasni dai kidika kaupak damni kalahna.” Ma bās bayakwak usnit kat, yul malni kidika walwi yayakwas dai;

¹⁵kaput bahang ma arungka yakat[29] Sansón yalni yakat kalyuyulna: —Alma yakat tanidutang yul malni yulna kidika lāih yakwi yulwak yanayultah, kaput awas karangkat, kuh kau mabusdarang, papangma dawak wanaihma balna bitik. ¡Manna yanayultanang aiwanayangna kidika laih dikina dakyaknin manah yamnamana kapat ki!

¹⁶Yal dai kidika alni yakat kiwi kaidi aput kalyulna: —¡Dalani yatalasman! ¡Maisihni yatalaman! Wanaihki balna yakat yul malni as diyulnaman, kaunah yang akat laih lāih yakta yayultas man. Dawak Sansón biriwi kalyulna: —Papangki nanangki yakat bik diyultas yang, bahang man laih mahlaih sip mayultasyang.

¹⁷Kaunah yal kidika alni yaihnit yakat kiwi kaidana dai ma tiaskaubu alasna duduna yakat, dawakat wat wat kalyulwak ma tiaskaubu kiwi kuihma mani yakat yul malni dai kidika lāih yakwi kalyulna. Kaput dawak wanaihma balna yakat kiwi diyulna dai.

¹⁸Ma tiaskaubu yakat, baisa ma kidika kakiwas kat, filisteo balna uiwi kalyuyulna Sansón yakat: “Amak damni kaput ūk diski, dawak layan parasni kapat ūk diski.” Sansón biriwi nangnitnalana: “Tukiruh yal bin yakarak wark yamnamana bahang, yulki malni kidika lāih yaknamana.”

¹⁹Kidika usnit kat Dawan spiritni Sansón yakat kallaihna dai; dawakat Ascalón pāni yakat kiwi ahal 30 iwi asnina balna kau duwi, uiwi diana dai yul malni lāih yakwi yuyulna balna yakat. Usnit kat kulnin daukalwi papangni ūni yakat kiwi kana dai,

²⁰dawakat Sansón yalni dai kidika Sansón karak kaltalyang as kat, yakat kalalana dai.