Read Mayangna Jueces 15 Bible Online

Jueces 15 - Mayangna bible

Jueces 15

¹Ma as as bayakwa kat, di minik balna bahnin mani kat Sansón yalni talna kiuna, kuts bin as kalanin duwi kiuna dai. Kiwi kawi kulna: —Yalki yakat āwik talki ki, payahwa pāni yakat. Kaunah unisah yaklauwi dawak kawas dai,

²dawak aput kalyulna: —Yang kulnayang laih dalani kaltalasman, kaput bahang kaltalyang yamni dutaman kidika as kau kalanayang. Kaput kaunah wirahni bin kidika kauh tanit yaksihni ki, wirahni barakni pāni yakat dutah.

³Sansón yaklauwi nangnitlana: —¡Filisteo balna yakat dutni diyamki kidika yang akat bukwas karang!

⁴Kaput laih kiwi wassala yayal 100 laihwi, bu bu libit sitna dai mamahnina yakat, dawak mamahnina yakat sitna dai awas kidika;

⁵bahang kuhpau kau awas kidika pakwi dahlwi damukwak filisteo balna di dadahna pasyakat kiri sutwi awawaihna. Kaput laih di minit dakwi ududuhna dawakat baisa dadakwas kasakni bahang dai kidika, wain dawak ani damni balna kidika bitik busna dai.

⁶Filisteo balna walwi tatalna wais busna daipa, usnit kat amanglalana witing unisah yaklauwi Sansón yalma kidika dakyakwi al ūk kau kalana bahang kidika yulni yamak kidika busna bahang witingna uiwi yalni dawi papangni karak busmumukna dai.

⁷Sansón yulna: —Manna kaput yamtamana bahang, ¡Papang ayangni kau dutik yultayang, biri manayamki kat laih urupdaki!

⁸Parasni bitik duwi niningna kau kalbauna wakalnina bitik laih ruputni manah kalna dai. Usnit kat, Etam kinipala nuhni sakkau sulihni yakat kiwi yalahna dai.

⁹Filisteo balna laih aiwi Judá yakat watwi ūnina labanni papakna dai, Lehi[30] kat uina bangdai,

¹⁰dawakat Judá muihni balna yulwi dakakana: —¿Ais yamta yangna nikingnakauh kalbauna aiwanamanah? Biriwi nangnitnalalana: —Sansón laihna aiwanayangna, yanayamna kidika minit lauwi yanana atnin yulni.

¹¹Kidika dakawi Judá sulani balna ahal tausin bās kalpakwi uina Etam kinipala nuhni kau sulihni sakyakat, dawakat Sansón yakat kalyuyulna: —¿Man amanglatasmahn filisteo balna kau pararasni kidika mayang karak dawakat? ¿Ais yamta kaput dutni yanayamtaman? Sansón yaklauwi nangnitnalana: —Yang di ūk yamtasyang sihm lalahni yakau lautik dianayang.

¹²Dawakat witingna yaklauwi kalyuyulna: —Yangna aiwanayangna adika laih laihtik filisteo balna tingnina yakat mahanikna aiwanayangna. Sansón nangnitna lana: —Papang ayangni kau yakta yayultanauh manna yaītas awanama.

¹³Witing rahm kidik yuyulna: —Maītas awanaki ki malaihtik filisteo balna tingnina yakat mahanikna kamana. Kaput laih wah wisasam bu kau sitwi yakmalda pāni kaupak murwi yayakna.

¹⁴Lehi pāni yakat uiwak filisteo balna bangkauna kalahwi kalpapakna dawakat alasna duwi sararahna. Kaunah Dawan spiritni Sansón muihni yakat kallaihna bahang wah sisitna kidika iswi dakna dai tingni kaupak, wah dibin kapat;

¹⁵usnit kat biriku kananmak as sakkat duna dai baisa yamni buhlawasdai bahang yakau filisteo muihni balna tausin as ina dai.

¹⁶Usnit kat yulna: “Biriku kananmak kau uduhna as bu yamnayang; biriku kananmak kau ahal tausin as inayang.”

¹⁷Usnit kat kananmak kidika ruhmpamna, bahang kidika pāni ayangni papakna Ramat-lehi.[31]

¹⁸Sansón uba was dikih kalawak Dawan yakat kalyulna dai aput yulna: “¿Amput sipyah adika minit bayaknin nuhni palni yanamahn, dawakat yadatangkat, adika balna man kau makukulwas muihni balna tingnina yakat was dikihni kau dautayang?”

¹⁹Bahang Papang yaklau Lehi kau pa sulihni as sak kidika yakat kalawak was kalahwak diwak isninglakna. Kidika bahang warmanikat Lehi kau was buhrwasak kidika ayangni paknadai En-hacore.[32]

²⁰Sansón Israel balna tanina tuna kāna kurih muihasluih, kidika mani balna yakat filisteo balna kidika sauni laih witingna tingnina dinit yak dai.