Read Mayangna Jueces 16 Bible Online

Jueces 16 - Mayangna bible

Jueces 16

¹Ma as kat Sansón Gaza tawanni nuhni yakat kiuna. Yakat pini yalni as talna, dawakat uni pasyakat kana dai albu payahna atnin yal yakarak.

²Gaza muihni balna, Sansón yakat kiuna kidik dakakana kat, kalahwi awaihdadakna, dawak tawan ta kawa balna yakat tahawi tatalna dai mapiris kaupak masan kat.[33] Pukta laih uiwi yakururupdana dai, witingna kukulna kidika payahlawarah kat inin.

³Kaunah Sansón kalangna dai pukpapus kat manah. Kidika yakat yaklauwi tawan dūrni putwa kidika bahyakwi dukiuna panan nunuhni dungna balna bitik trukwi Hebrón muhnit yakat asang as sakki, tuna yakau uiwi ilwi dana dai.

⁴Kidika usnit kat Sansón yal as yamni talna di ayangni laih Dalila bahang yal kidika Sorec yakat yalahwa dai.

⁵Filisteo tunan muihni balna Dalila yakat uiwi talwi aput kalyuyulna: —Sansón yakat alas kalyulta walta talah witing parasni nuhni duwa kidika angkaupak duwi dawakat amput minit bayaknin sip awanaki yah; kaput laih sip laihtik sittik dutanaki. Man kaput yamma kat yangna bitik kau muihkina kat kat manaki lalah tausin as minit kau andat as.

⁶Yal dai kidika Sansón yakat kalyulna: —Plisma yayulta, parasma nuhni kidika angkaupak dutamahn. ¿Amput masitdak sip uluhtas awamanayah?

⁷Sansón yaklauwi nangnitlana: —Las wahni tiaskaubu baisa buhlalawas kidika kau yasittanama kat, paraski diswarang dawakat muih al ūk kaput awaki.

⁸Filisteo tanituna muihni balna Dalila yakat uiwi kalalana las wahni tiaskaubu wisasam manah, dawakat yakau duwi Sansón yakat sitna.

⁹Baisa sitwas tanitkau payahwa pāni yakat ahal buas awi malna bahang, sarahna: —¡Sansón, filisteo balna namangyakat aiwi! Sansón kiri yaklauwi sitna kidika iswi dakna, wah kuh kau buswi wanan manah yamna kapat. Filisteo balna walwi yakwas dadana parasni kidika angkaupak kaiwa kidika.

¹⁰Dalila yaklauwi kalyulna: —¡Alas yayultada! ¡Alas yayulnaman dai! Kaunah waralaih plisma yayulta, amput yamwi man sitnin yah.

¹¹Sansón nangnitlana: —Wah wisasam palni kau yasittanama kat paraski diswarang, dawakat al ūk kaput awaki.

¹²Dalila wah wisam kau duwi sitwi dawi sarahna: —¡Sansón, filisteo balna namangkauh aiwi! Sihm payahwa pāni yakat ahal buas awi malna dai; Sansón watwi iswi dakna dai wah dibinina kapat.

¹³Dalila yaklauwi Sansón yakat kalyulna: —¡Baisa alas yayultaman! ¡Yayulta amput yamtik masitki yah! Sansón yaklauwi nangnitlana: —Man yamnam kidika laih baski labuna tiaskaubu kidika, asna yamnin dini kau duta asna kapat yamdata, pan subangni kau duta libitta sau yakat tista āma. Kaput laih paraski diski, dawakat muih al ūk kapat awaki. Kaput laih Dalila yaklauwi Sansón yakat pakwak kamana, dawakat basni labuna tiaskaubu kidika libitwi asna yamwa dini yakau sitna,[34]

¹⁴dawi pan subangni kau duwi sau yakat dungwi āna usnit kat sarahna: —¡Sansón, filisteo balna namangyakat aiwi! Sansón kiri yaklauwi sau kau pan ukna balna dai kidika iswi dutyakna.

¹⁵Yal dai kidika kalyulna: —¡Alas muihni! ¿Amput man yang akat dalani matalayang yatimahn? Wat bās yangkau sarahni yatalaman, dawakat baisa yayultasman angkaupak parasma kaiwapa.

¹⁶Dalila yaklauwi wat wat kalyulna, sihm kidika dini manah kalyulwi dakana, Sansón kidika dakana manah kalsuhna dai dawakat bik daukihni kallaihna dai;

¹⁷witni kat parasni angkaupak duwa kidika kalyulna dai: —Baisa muih as bik baski dadakwas ki baisa batahn datasyang kau Papang dini yayakna. Baski dadakwarang kat, paraski diswarang ki dawakat muih ahal ūk kapat awaki.

¹⁸Dalila yamni amanglana mani kat Sansón parasni angkaupak duwa kidika, filisteo tunan muihni balna yakat yul sihwi diyulna: —¡Waralaih aiwanauh Sansón parasni angkaupak duwa kidika nikingkana! Bahang tingnina yakat lalah karuk uiwi kaltatalna dai.

¹⁹Sansón Dalila barahnimak yakat tunan awi kamana dai, dawakat muih al as yulwak laihna, Sansón basni labuna tiaskaubu kidika daknin. Usnit kat dutni kalyamwi

²⁰dawi sarahna: —¡Sansón, filisteo balna namangkauh aiwi! Sansón sahmuhwi kulna witing nining yaklawa bahang ban watwi yaklauwarang kulna, witing amanglawasdai Dawan yaklauwi kaldana kidika.

²¹Kaput dawak filisteo balna laihwi minikpa yakmumukna dai dawi Gaza yakat duwi uiwi sīn kau yamni sitwi dawi silak ūni paskau tiknin dini nuhni sakyakat papakwak wark kalahna.

²²Kaput kaunah basni kidika watwi nanaina dai.

²³Filisteo tunan muihni balna kaluduhwi alasna dunin, minit bayayakna kidika yulni, dawak sakripais yamnin daninawan dauh Dagón yakat. Dawak aput unbabauna: “Mayang mapapangki yaklauwi, mawaihkila Sansón kidika matingki akat āna.”

²⁴Muih balna tatalna kat, witingna bik, daninawan kau ayangni nuhni yayamna, dawi aput yuyulna: “Mayang mapapangki yaklauwi mating akat āna mawaihkila Sansón kidika, witing kuduh mayakimak daukalwa dai kidika dawak mawanaihki balna mahni bik iwadai kidika.”

²⁵Isningnalak bangdai bitik ki, yuyulna Sansón kidika duwi uiwak kalyakisdi niningkarinin. Silak uni kaupak yakwi niningkari alasnina duduna, dawakat duwi uiwi dulalauna rahni nunuhni bu walsah yakat.

²⁶Sansón yaklauwi kalyulna albin as witing tingni yakat laihwi murwi kiwalik kidika yakat: —Yaduyawah rahni nuhni palni ūni adika laihwi duwa sak yakat, kidika yakat taihtik dakakih yawi.

²⁷Filisteo balna taninatuna bitik kidika ūni yakat bangdai, bahang kaput laih buhngdai, ahal dawak yayal bik. Kidika minit yakat, muih tausin bās kapat bangdai uptis yakat, talwa bangdai amput Sansón yakat uswi alasna duduwa kidika.

²⁸Sansón Dawan yakat kalyulwi aput yulna: “Kalma dinit yakat buktik yultayang, Dawan, baisa wat as bik yang akat yakulta, paraski yatah filisteo balna mikpa bupak yayakna kidika yulni, witingna yakat minit diyulkih yawi.”

²⁹Usnit kat walwi laihna rahni nunuhni balna prinias ūni nuhni laihwi duwasak kidika dawakat tingni bupak yamni laihwi,

³⁰sarahna: “¡Filisteo balna yang karak dautanaki!” Kaput laih parasni bitik rahni laihna sakdai kidika tukna, dawakat prinias uni kidik bahwi filisteo balna tanina tuna muihni balna minitna yakat bukna, muih bahng kidika bitik minitna yakat. Sansón witing dauna yakat muih ina kidika laih tanit mahni dai, sangnika bitik yakat muih ina kidika karak dawakat.

³¹Sansón wirahni balna aiwi duwi uiwi ahana Zora dawi Estaol pāni walsah kau yakat Manoa sauni-ū yakat, Manoa laih Sansón papangni dai. Kurih muihasluih Israel balna taninatuna kana dai.