Read Mayangna Jueces 17 Bible Online

Jueces 17 - Mayangna bible

Jueces 17

¹Efraín asangni yakat al as yalahwa dai ayangni laih Micaías,

²bahang witing nanangni yakat yamna balna kidika kalyulna: —Lalahma 1100 mamalna kidika yulni la tuhnaman kidika dimalyang yakat, laihnayang. Yang man dima malnayang; kaunah nawattik matayang, kat yultang dakanayang kidika laih Dawan dini yaknaman dai, kidika kau sihtang kat dawan dauh wayani as yamwi manin, lalah kau manah birwi. Dawakat lalahni nawatwi kalana. Dawakat nanangni parasni yulna: —¡Dawan yaklauwi blis mayamwarang, yang walakibis al![35]

⁴Micaías, lalah kidika nawatwi kalana nanangni yakat, dawak nanangni yaklauwi lalah kau di yamyang muihni as kau kalana, lalah dadasni 200, kaput laih dawan dauh wayani as yamwi kalanin yulni, usnit kat Micaías ūni yakat duwi kiwi ilna dai.

⁵Micaías ūnipas yakat minityulnin pāni as duwa dai. Dawak Sumalyang prakni nuhni kidika as yamna, dawak dawan dauh bik as yamna dai wanaihni balna bitik dinina, dawak witing walanibis al as sumalyang āna dai.

⁶Kidika mani balna yakat Israel kidika baisa king disdai bahang, muih kidika ais kulwa kidika yakat yamwadai.

⁷Betlehem tawanni yakat wahma as likdai bahang witing laih kaltalyang disdai wahma kidika Judá sulani, dawak libait dai.

⁸Adika wahma Betlehem kaupak kalahwi pa ūk walna yalahna atnin, dawakat Efraín asangnipas munah awaihwi Micaías uni kat kiwi kana.

⁹Micaías kalyulwi dakana: —¿Angkaupak aiwamahn? —Betlehem kaupak aiwayang —kaput nangnitlana wahma kidika—. Yang laih libait as yang bahang angkat yalahnik pāni waltalikyang.

¹⁰—Micaías yaklau kalyulna —Yang karak wattah kalatna—, yang sumalkiyang atnam dawak bik papangki kapat atnam. Yang lautik maki laih salap, kurih as pasyakat, kidika minit yakat kasnam dawak asmana maki.

¹¹Kaput laih libait kidika Micaías uni yakat watna dawakat witing walanibis kapat kalna dai.

¹²Micaías witing sumalniyang yamna dai dawakat yakat watwi yalahna.

¹³Micaías kulna Papang blisinni kidika uman duna kapat, kat libait as ūni yakat duwa bahang, sumalyang kapat.