Read Mayangna Jueces 18 Bible Online

Jueces 18 - Mayangna bible

Jueces 18

¹Kidika mani balna yakat baisa Israel king disdai. Dan sulani balna kidika witingna sau disdai, kaput bahang pa walwabangdai yalahna atnin.

²Kidika bahang Dan sulani balna kidika sisihna dai Zora kaupak Estaol kat ahal singka kulninna tanit dadasni duduwa kidika balna, bahang witingna laih pa kidika awaihwi talna atnin. Ahal singka kidika Efraín asangnipas yakat uina bahang Micaías uni kat uiwi kalalahna bahang yakat payayahna.

³Micaías uni yaihnit yakat uina kat uman amanglalana dai libait yulbauwa kidika, dawakat uiwi kalyulwi dakakana: —¿Wais madauinayah akat? ¿Ais yamta adika pāni akat sakmahn? ¿Ais waltamahn akat?

⁴Libait yaklauwi diyulna, Micaías karak witing amput kidik, dawakat amput Micaías sumalniyang kana atnin lā yayamna kidika.

⁵Kaput dawak witing yaklauwi kalyuyulna: —Papang yakat kalyulta daka yanatah, yangna yawayangna adika yamni alahwanakipa.

⁶Sumalyang libait kidika nangnitna lana: —Ismangnalak yawanauh, Dawan namatna dakwarang angkat, angkat yawanama kidika.

⁷Kidika kaupak, yakpakwi talnin muih singka uina Lais yakat. Kidika tawanni nuhni muihni balna laih pini yalalahwa dai, sidonio balna amput kidika kapat; isningnalak, kulninna aslah yalalahwadai, muih as bik diuhuswasdai, dawak di bik dis awasdai. Sidonio balna kaupak naikau bangdai, muih ūk karak bik kalpapakwas dai.

⁸Yakpakwi talyang muih balna singka dai kidika Zora dawi Estaol yakat nawatwi aina wanaihnina balna bang dai yakat dawak diyulwi dakakana: —¿Amput aiwandah? Dawak witingna yaklauwi nangnitna lalana:

⁹—Kidika sauni bitik awaihtik talik aiwinikda bahang sau yamni palni ki. ¡Kiunin! ¡Niningna yakat kalbaunin! ¡Dauh manah yalahwi di as yamwas bahang atwinih! ¡Kidika sauni kalbaudi dakyakdi dunin ki!

¹⁰Kidika pāni yakat yawanama kat, kalpaktanama muihni balna kidika piniki, sau nuhni duduwi, dawak di bitik duduwi. Papang yaklauwi kidika sauni manawarang.

¹¹Zora dawi Estaol pāni kaupak, Dan sulani balna andat tiaskauas kalbaunin dini balna yamni duwi uina,

¹²dawak Judá yakat uiwi kakana dawak ūnina labanni papakna, Quiriat-jearim kaupak ma kawa niningyakat, kidika pāni laih warmani ayangni papakna Dan ūni labanni pakna pāni.

¹³Kidika kaupak kalahwi Efraín asangnipas yakat uiwi Micaías uni kat uiwi kalalahna.

¹⁴Ahal singka Lais pāni awaihwi tatalna muihni balna dai kidika, wanaihnina balna yakat diyuyulna: —¿Manna di as amanglatamanah? Adika ūni akat sumalyang prakni nuhni as pakki, dawak bik dawan dauh wayani bik as sakki, minit yakat lalah kau kahwi lana. ¿Ais yamnin kultamanah?

¹⁵Kaput laih yakpakwi talyang as balna kidika kaupak silp kalalahna, dawak libait wahma ūni yakat uina, yuldarangkat, Micaías ūni yakat, dawak dipararasna.

¹⁶Kidika yakat Dan sulani balna kalbauyang kidika 600 kidika tahahana dūr yakat.

¹⁷Yakpakwi talyang singka kidika ū yakat kawi, dawan dauh wayani lalah kau yamnadai kidika duduna, sumalyang prakni dawan dauh wayani kidika bik, sumalyang kidika laih dūr yakat kalbauyang balna 600 kidika balna karak.

¹⁸Sumalyang witing talwak ahal singka kidika Micaías uni yakat kawi dawan dauh wayani dawak sumalyang prakni pihni nuhni kidika bik duduwak diyulna: —¿Ais yamtamanah?

¹⁹Dawak witingna nangnitlalana: —¡Ap data yangna karak aiwah! ¡Dukih yanawi man sumalkinayang awa papangkina kapat alahwang kat!

²⁰Sumalyang kidika yulni dakaki kalanadai dawakat dawan dauh, sumalyang prakni nuhni kidika duwi mahka Dan sulani balna karak kiuna dai.

²¹Sihm muihni balna tanitna yakat lapakwi uina, walaninabis dawak tingninalau balna bitik.

²²Nai lapapakna usnit kat Micaías dawi yaihnit kau yalalahwa muihni balna karak kalpakwi dangkitna kaupak yanauiwi aina dai.

²³Dangnitna yakat sarahwi uiwi aiwak dakakana, dawak Dan muihni balna watwi wiryaklawi Micaías yakat kalyulwi dakakana: —¿Amput mawih? ¿Ais yamta kaput parasni yana sarahtamanah?

²⁴Micaías yaklauwi nangnitlana: —Yang dakiwan manna dunamana, yang yamnayang dai kidika, dawak sumalkiyang bik duyawamana, di dis yadatamana, ¿dawak baisa yayulta dakamanah ampat yawih?

²⁵Kaunah danita balna biriwi nangnitlalana: —Yanasarahwinih, yangna paskingna kaupak kulnin laihwatwas dawi, makalbauwarang, kaput laih sangmaka diswarang dawak wanaihma balna bik sihm.

²⁶Micaías talwak muih mahni kat, mahka dawi nawatwi ūni kau kiuna; dawak danita balna laih tanitna yak uina.

²⁷Micaías dini balna dawak sumalniyang bik duwi Lais yakat uina dai. Lais muihni balna laih pini bangdai kat witingna panina yakat war dis dai bahang, dawak danita balna uiwi laihwi bitik iwi, ūnina bubusna.

²⁸Tawan nuhni kidika Sidón kaupak naikau dai bahang, dawak bik kaltalyang disdi, bahang muih as bik nanitnadakwasdai. Kidika laih Bet-rehob sauni langni yakat dai. Usnit kat kidika pāni yakat danita balna watwi tawan nunuhni balna kidika laihwi dulauwi yamwi yalalahna dai.

²⁹Muhnilau laih ayangni Lais duwa dai, kaunah witingna yaklauwi Dan papakna dai, muihninabararak balna risninapik kau sihm ayangni duduna, kidika laih Israel sulani balna dai bahang.

³⁰Kidi pāni yakat danita balna dawan dauh duwi uina dai kidika ilsasakna, kidika yakat minitnayulnin yulni, dawak sumalninayang laih Jonatán dai, Gersón walanibis, dawak Moses mani. Kidi kaupak Jonatán sulani balna kidika bitik danita balna sumalninayang kakana dai, pa ūk yakat laihwi duwi uina kat.

³¹Witingna pasningna yakat Micaías dawan dauh yamna dai kidika sakdai, ma bitik yakat, Dawan pāni holi silo kau sakdai kidika.