Read Mayangna Jueces 2 Bible Online

Jueces 2 - Mayangna bible

Jueces 2

¹Dawan innisal kidika kiuna Gilgal kaupak Boquim yakat, dawak Israel balna yakat diyulna: “Yang manna kidika Egipto kaupak manayaknayang, dawak muihmana bararak balna yakat pramis yamtik diyulnayang dai kidika sauni yakat manaduainayang, bahang witingna yakat aput diyulnayang dai: ‘Yang prakimis manna kaupak yaktas awaki,

²kaunah manna kidika adika sauni muihni balna karak pramis as bik yamtas awanama kat, kaunah nawatkauh laih sakripais bubuswa pāni balna kidika bik daukalmuktanauh.’ Kaunah manna yang yulki dakasdanamana, ¡dawak talnauh manna yamtanda kidika!

³Kidika bahang waradika manna manayultayang: Manna muhmana kaupak kidika tawanni balna kidika yaktas awaki, witingna dawak daninawan dauh balna kidika manna namangna yakat manalaihnin dini as karang.”

⁴Dawan innisal kidika yulbauwi dawakat, Israel balna bitik laih parasni kakaidana.

⁵Kaput bahang kidika pāni laih ayangni papakna Boquim[7] dawak kidika pāni yakat Dawan kau sakripais yayamna.

⁶Josué, witing mahka didawi kalahwi kiudawak, Israel balna kidika saunina pāni kat kat uiwi duduna dai.

⁷Witing sangka mani balna dai yakat, Israel balna kidika Dawan yakat prinias yayamwadai; sihm kaput dai Josué dauwak usnit kat muihbararak balna manina dai yakat bik, bahang witingna kidika laih tatalna dai Dawan di nunuhni balna yamna dai kidika Israel yulni.

⁸Josué daunin kurih 110 laihna kat,

⁹bahang witing sauni Timnat-sera[8] yakat nununadai, kidika laih Gaas asangni kaupak ting pal niningyakat ki, Efraín asangni balna yakat.

¹⁰Josué mani yakat Israel muihni balna dai kidika bitik laih dadauna dai. Dawak kaput laih, usnitkauh muih batahndadana balna kidika Dawan yulni di as bik amangnilalawasdai dawak Israel ilpni di balna yamna dai kidika kat bik amanglalawas dai.

¹¹Israel balna witingna di yayamwa kidika Dawan minikpa yakat dutni manahdai, witingna dawan dauh balna yakat tanit nuhni kukulna.

¹²Dawan yakat ruhmwi dadana, muihnina bararak balna papangnina Egipto kaupak dilaihwi yakna dai kidika, dawak witingna yaihnitnakau muih balna bang kidika daninawan balna yakauh tanit nuhni kukulna, kaput yayamwak Dawan kulnin daukalna dai.

¹³Dawan kidika ruhmwi dadana, dawak dawan dauh yakauh minitna yuyulna, Astarté daniwan balna yakauh,

¹⁴dawak kaput laih Dawan Papang kulnin daukalna Israel nining yakat, dawak dimalyang balna yakat pakna Israel balna dinina kidika bitik malna atnin, dawak yaihnitna kau waihninala balna nining yakat sip di as bik yayamwasdai.

¹⁵Kalbauna kalahwi uiwa bitik yakat, Dawan kidika witingna niningnakauh dai bahang dutni kalalahwadai, bahang kidika laih witing silp diyulna dai. Kaput kaunah, Dawan yaklauwi Israel balna yakat parasni diyamna dai,

¹⁶kaput bik laih tunan wihta kidika kalawak kalalahwadai dinina dakyayakwa kidika kaupak dilaihwi yakna atnin.

¹⁷Kaunah Israel balna yaklauwi adika tunan wihta balna yakat yulnina dakakawasdai kaunah nawatkauh laih Dawan yakat barangni awasdai, dawak dawan dauh balna yakat minitna yuyulna. Witing muihninabarak balna laih Dawan yulni dakakana dai; kaunah sulanina balna laih kaput yayamwasdai.

¹⁸Dawan yaklauwi tunan wihta yakwa bitik kidika, witingna yakat ilp diawadai, dawak tunan wihta kidika lik kidika mani balna yakat Israel waihnila balna kidika kaupak dilaihwi yakwadai, kat witingna yakat ditataihwak kaidi sararahwa kidika dakawi miniknakun ditalwadai bahang.

¹⁹Kaunah tunan wihta kidika dauwakat, watwi dutni yayamwadai, witingna papangnina balna karak tanit dutni yayamna, dawan dauh yakat dini yayamna. Dutni yayamwa kidika dadawasdai.

²⁰Kaput bahang Dawan witing Israel niningkauh kulnin daukalna, dawak yulna: “Adika muihni balna yang witingna muihninabararak balna karak pramis yamnayang dai kidika daukakalwi, dawak yulki dakakawas di.

²¹Kaput bahang wattik kangyaktas awaki witingna yaihnitna kau muih balna kidika, Josué sip kangwi yakwas dana kidika dauwas tanitkauh.”

²²Adika karak Dawan talkih kalana, Israel balna kidika witing tani yakat uiwarangpa, tanit mani kau muihnina bararak balna yayamna dai kaput, dawak kidika awaskat yayamwas karangpa.

²³kidika bahang Dawan yaklauwi nisan balna Josué tingni yakat awasdai kidika kangwi yakwas dana, kaunah nawatkauh laih yakat dabangna dai.