Read Mayangna Jueces 20 Bible Online

Jueces 20 - Mayangna bible

Jueces 20

¹Dawakat Israel balna, Dan kaupak Beerseba kat Galaad bik, kalududuhna Mizpa Dawan muhni yakat.

²Israel sulani tanituna balna bitik yakat bangdai, dawak Papang tawanni kidika kalududuhna muih 400,000, kalkau uiwi kalbauyang balna kidika.

³Benjamín sulani balna amanglana, Israel sulani ūk balna Mizpa yakat kalududuhna kidika. Dawakat Israel balna libait yakat kalyulwi dakana, amput kalahna dai kidika.

⁴Yal dauna kidik alni, libait yulna: —Yang ialki karak Guibea tawanni nuhni yakat yawik awanayangna dai, Benjamín sulani balna yakat, payahna atnikna.

⁵Kaunah kidika puknita, tawan nuhni muihni balna kidika awaihdadakna, āwanayangna ūni yakat, yainin kukulna, kaput laih ialki yakat dutni yayamna, bahang witing dauna.

⁶Kaput dawak muih dauna kidika dutik sarahnayang, dawak pa bitik kau sihnayang, Israel balna bitik talna atnin Israel nining yakat dutni yayamna kidika.

⁷Israel balna kapat, manna tingmana yakat ki ais yamnin kidika.

⁸Muih al aslah kapat, bitik kalnina kau yaklauwi yuyulna: —Mayang paskaupak muih as bik nawatwi kiwas karang ūni kau.

⁹Mayang yamnin kidika laih suerte ruhmdi taldarang wais Guibea nining yakat kalbauwarang pa.

¹⁰Sulani balna bitik kau muih ahal salap kidika paskaupak as kalahwi kasnin dini walwarang kalbauyang balna kasninna; as balna kidika laih Guibea yakat uiwi minit kalalana karang, Israel niningkau dutni yamna kidika.

¹¹Israel balna bitik kalududuhna muih aslah kapat tawan nuhni nining yakat kalbauna atnin.

¹²Benjamín sauni bitik yakat muih sisihna dai yulna atnin: “¿Ais dini dutni yamnamana manna as as mana kidika?

¹³Guibea kau muih dudutni bang kidika yangna tingkina akat atanauh, kaput laih itik, Israel paskau maisihni kidika dis yamtanakuh.” Kaunah Benjamín sulani balna wanaihnina Israel balna yakat yulnina dakawas dadana,

¹⁴nawatkauh laih Benjamín sulani balna tawan nunuhni ūk balna dai kidika bitik kalududuhna Guibea yakat, Israel as balna niningna yakat uiwi kalbauna atnin.

¹⁵Benjamín tawanni nunuhni balna kaupak kalududuhna kidika laih tausin 26 dai, dawak Guibea ahal 700 kidika laih bahawi kulwasdai.

¹⁶Kidika ahalni bitik pasyakat wadah kau di kiwah ruruhmwa kidika 700 dai, witingna ruruhmwa kidika laih di as bik dadawak bayakwasdai.

¹⁷Israel balna kidika laih kalbauyang lan balna manah kalududuhna dai 400,000.

¹⁸Israel balna Betel yakat uina, dawi Papang yakat yulwi dakakana angdika sulani tatuna kalahwi kalbauwarangpa Benjamín sulani nining yakat. Dawan yaklauwi diyulna Judá sulani tatuna kalahwi kalbauwarang.

¹⁹Kaput laih Israel balna mahka yaklauwi Guibea yaihnit yakat uiwi panina duduna.

²⁰Benjamín sulani balna niningna yakat uina, dawak Guibea muhnit yakat panina duduna kalbaunin.

²¹Kaunah Benjamín sulani balna tawan nuhni kaupak kalahwi, kidika mani Israel balna tausin 22 ihina dai.

²²Kidika bahang Israel balna kidik mani Betel yakat uiwi kakaidana Dawan muhnit yakat, payahlanin manah kat, dawakat kalyulwi dakana watwi sippa wirahnina balna niningna yakat. Dawan yaklauwi dipakna dai bahang kalbaunin, kulninna yaklauna, payahwak nawatwi uina benjamín sulani balna niningna yakat, sihm muhnilau kalbabauna pāni dai yakat.

²³

²⁴

²⁵Watbu Benjamín balna kalahwi kalbabauna Guibea kaupak, dawakat watwi tausin 18 ihina Israel balna yakat.

²⁶Kaput dawak Israel balna bitik dawak tawan balna bitik Betel yakat watwi uina, Dawan muhni yakat kaidinin. Mapiris kaupak masan kat di kaswas pupukna, Dawan karak watwi yamni kalahnin sakripais kidika bubusna, dawak sakripais karauni kauna bubuswa kidika bik.

²⁷Kidika mani balna yakat Papang pranimis baksni kidika Betel yakat tusdai dawakat sumalniyang laih Finees, Eleazar walanibis, dawak Aarón mani. Dawak Israel balna Dawan yakat yulwi dakakana: “¿Baisa wat as, wirahkina Benjamín sulani balna yakat kalbautanakiyah, kidika awas kat datanaki mikitna bayayakna bahang?” Dawan yaklauwi diyulna: “Kalbautanauh, yahan mani manaki minit bayaknin kidika.”

²⁸

²⁹Kaput laih Israel balna buas Guibea yaihnit awaih yakat yakmamaldana dai,

³⁰dawak as balna laih tanitna yakat lapakwi Benjamín balna niningnayakat, uiwi panina duduna mahka kalbauna atnin Guibea niningyakat, muhnilau yayamna dai kaput.

³¹Watwi Benjamín sulani balna kidika tawannina nuhni kaupak dawi naikau kalalahna Israel balna niningna yakat kalbauna atnin. Guibea kaupak Betel kat kidika tapas yakat Israel balna 30 dadauna dai.

³²witingna kukulna, Israel balna kidika yanaduwi kikiri, muhnilau watbu dai kapat, kaput kaunah Israel balna yaklauwi tawan nuhni kidika kaupak naikau diduwi uina, waihla balna kidika ta pasyakat diuiwi uina atnin yulni.

³³Sirihni palni Israel balna bangdai kidika kaupak kalahwi panina duduna kalbauna atnin Baal-tamar yakat, dawakat Guibea yaihnit kau yakmaldana bangdai kidika kalalahna

³⁴dawak tawan nuhni niningyakat kalbabauna. Guibea tawanni nuhni niningkau kalbabauna kidika laih Israel ahal kalbauyang tanit yayamni kidika 10,000 dai. Parasni kalbabauna, Benjamín sulani balna kidika amanglalawasdai sip awas kalalahwarang kidika.

³⁵Dawan yaklauwi Israel balna yakat diana dai minit bayakna atnin kidik, Benjamín balna niningna yakat, dawakat kidika mani Israel balna yaklauwi Benjamín balna yakat 25,100 ihina dai.

³⁶Kaput laih Benjamín muihni balna kidika amanglalana, sip awas kalalahna kidika. Israel balna tani tani dawi kalalahna dai kalbabauwa bang kidika kaupak, kat Guibea yaihnit kau muih ahal ūk yakmaldana bang kidika yakat kulninna duduna dai bahang, Guibea niningyakat kalbabauwarang kidika.

³⁷Kidika muihni balna kalahwi Guibea niningkau kalbabauna isningna aiwas bangkat, tawanni nuhni muihni balna bitik ihina dai.

³⁸Yakmaldana bangdai kidika isningna papakna dai as balna yakat witingna tawan nuhni kidika kawi duduwarang kat, wayau kidika kalalawak kilna atnin.

³⁹Kidika minitni yakat Israel balna kira kapat yayamna, dawak wayau kidika kilwak tatalna, dawak nawatwi Benjamín sulani balna niningna yakat watwi yaklalauna dai. Benjamín sulani balna yaklauwi ihina Israel balna yakat 30, kidika karak minit bayayakna kapat kukulna, muhnilau kalbabauna dai kapat;

⁴⁰kaunah kidika yakat mahka wayau kidika pukwi kilna tawan nuhni kidika kaupak, Benjamín sulani balna kidika wiryaklawi tatalwak, kuh dahlwi makau kisang yakat kilwi laihna dai.

⁴¹Kaput dawak Israel balna niningna yakat yaklalauna dawak Benjamín balna yamaduduna kat witingna minitna yakat didutni kaiwa bahang.

⁴²Israel balna kaupak dawi kalahwi kikirana, kauhmak wanilang yakat, kaunah sip kiri yaklalawasdai, kat tawan nuhni kaupak kalalahwak tanitna dakwi laihwa bahang.

⁴³Benjamín sulani balna laih Israel balna yaklauwi awaihwi dadakna, kidika balna yakat uiwi ihina Menúha kaupak Guibea makilwa ningkauh yakat.

⁴⁴Kaput dadauna tausin 18 Benjamín sulani kalbauyang balna.

⁴⁵As balna kidika laih nawatwi kauhmak wanilang yakat kikirana Rimón niningyakat kaunah tausin singka laih dadauna ta balna pasyakat. Israel balna ban uiwi uina ihina ahal tausin bu.

⁴⁶Bitik kat kidika mani Benjamín sulani kalbauyang tanit yayamni kidika dadauna tausin 25.

⁴⁷Kaunah andat tiaskauas nawatwi kauhmak wanilang nining yakat kikirana dawakat Rimón kinipala nuhni yakat waiku arungka wawatna dai.

⁴⁸Israel balna Benjamín ūk balna yakat bik uiwi kalbabauna tawan nunuhni bitik kau ahal bang dai kidika bitik laih kuhbik kau ihina dai, tingninalau kaupak ihina, taninapas yakat ais ais kalpapakwa kidika bitik dawakat tawan nunuhni balna kidika bubusna.