Read Mayangna Jueces 3 Bible Online

Jueces 3 - Mayangna bible

Jueces 3

¹Adika tawanni balna kuduh Dawan yaklauwi dabangna dai kidika pāni yakat Israel balna kulninna tanka talnin yulni, dawak kidika Israel balna laih baisa batatahnwasdai, Canaán kidika dakyaknin yulni kalbauna dai kidika mani balna yakat.

²Dawan yaklauwi dabangna dai witingna kalbauwi lankalna atnin, witing wat as bik kalbauwi tatalwas balna kidika.

³Filisteo tunan muihni balna singka kidika wawatna dai, cananeo muihni balna bitik, sidonio muihni balna dawak heveo balna bik Líbano asangnipas yakat yalalahwadai kidika, Baal-hermón asangni kaupak Hamat kau bayakwa yakat.

⁴Kidika karak Dawan yaklauwi dilaihwi talnin kulna Israel balna yakat, kaput witing talna atnin rahm la yakat yayamwarang pa, Moisés munah la diawadai kidika muihnina bararak balna yakat.

⁵Dawak kaput laih Israel balna kidika yalalahna dai cananeo balna pasyakat, hitita balna, amorreo balna, ferezeo balna, heveo balna, jebuseo balna pasyakat bik,

⁶Israel balna walaninabis ahal dawak yayal balna kidika laih, kidika balna walaninabis balna karak kalduwi daninawan dauh balna yakat tanit nuhni kulwi minitna yuyulna.

⁷Israel balna di yayamna kidika Dawan minikpa yakat dutni manahdai, kat witing yakat dinitna kahna dai bahang, dawak Baal dawak Astarté balna yakat tanit nuhni kulwi minitna yuyulna.

⁸Kidika bahang Dawan kulnin daukalna witingna niningna yakat, dawak Cusan-risataim tingni yakat diana, Mesopotamia kingni yakat. Kurih tiaskaubās Cusan-risataim dini yayamna,

⁹dawak witingna Dawan kalni diniyak bukwi yuyulna dawak muih as yakwak dilaihwi yakna atnin. Adika laihwi yakyang muihni kidika laih Otoniel dai, Cenaz walanibis, dawak Cenaz kidika laih Caleb wirahni binkauh kidika dai:

¹⁰Dawan spiritni kidika Otoniel yakat kiuna, bahang witing laih Israel balna taninatuna kana; dawak kalbauna kalahwi kiuna, dawak Dawan yaklauwi yaklauwi kalawak minit bayakna Cusan-risataim niningyakat.

¹¹Kidika usnit kat kulnin aslah lani kidika sakdai, kidika sauni yakat, kurih 40 praisni. Otoniel dauna usnit kat,

¹²Israel balna kidika watwi Dawan minikpa yakat dutni yayamna dai, kidika bahang Dawan yaklauwi Moab Eglón yakat tanit parasni kalanadai Israel karak dawakat.

¹³Eglón kidika aslah kalalahna amonita dawak amalecitas balna karak, dawak Israel niningyakat kalbauna, dawak palmeras tawanni nuhni kidika kawi duna dai.

¹⁴Kurih 18 Israel balna kidika Eglón dini yayamna,

¹⁵Dawan kalni dinit yakat bukwi yuyulna kat, witing yaklauwi muih as kalawak kalahwi dilaihwi yakna. Kidika laihwi yakyang alni kidika laih ayangni Aod, Gera walanibis, Benjamín sulani kaupak dai. Ma as kat Israel balna yaklauwi tunan minit launin kidika sisihna dai Eglón yakat, bahang kidika dini laih Aod yakat kalalawak duwi kiuna.

¹⁶Kaunah Aod witing isparah as buhwi baini yamna nabupak, dawak naini laih metro papusbah praisni dai, dawak banimak yakat butsakna tingnipal niningkauh;

¹⁷usnitkat tunan minitlaunin dini dai kidika duwi kiuna Eglón yakat, bahang Eglón laih salani dai.

¹⁸Eglón yakat tunan minit kidika uiwi kalana usnit kat mahka kalahwi kiuna aina balna kidika karak kalpakwi,

¹⁹kaunah Gilgal kau dawan dauh wayani bangyakat yaihnit yakat kiwi dawi, Aod dai kidika nawatwi kiuna Eglón yakat, dawi kalyulna: —King man yakat yul as mayulnik dutayang kaunah albu malahwak mayulnik kultayang. Kaput laih king witing yaihnitkau wark kalahwa bang kidika yakat diyulwak ap dadawak diyulna witingna bitik kidika kaupak kalahna atnin.

²⁰Aod dai kidika Eglón karak albulah dadana kurih kat kalahwa pāni yakat, bahang witing kidika yalahna sakdai dawak yaihnit yakat kiwi kalyulna: —King man yakat yul as duaitayang kidika laih Papang kaupak sihna. Eglón, witing kidika yulni dakawi, yalahna kidika kaupak yaklauna, tronni kaupak,

²¹Aod laih witing wadah kau di laihwadai, bahang wadahni kidika tingnipal nining yakat wauhwi dukiwi isniparah dai kidika yakwi Eglón bani yakat pana.

²²Parasni pana kidika laih isniparah kalni bitik laih tukwi āna dai, dawak salani bahang bitik laih kawi kiuna, kaunah Aod witing isniparah kidika yakwasdana.[9]

²³Usnit kat Aod witing dūr balna kidika putna, dawak windar munah kalahwi kiuna.

²⁴Uman kalahwi kiuna, dawak king dini yamyang balna kidika aina, dawak dūr kidika putna sakkat tatalna, bahang witingna kukulna dai king kidika ū paskau ahni pakyakat kana, di dukih kalawakat.[10]

²⁵Witing uba nai tahana usnit kat, witingna isningna abahlna kat king kidika kalahwas bahang kaput dawak kiting kidika duwi dūr kidika apapahwakat, king kidika sau yakat bukna tusdai.

²⁶Kidika balna tahawa bangkat, Aod laih kirana Gilgal kau dawan dauh wayani bang kidika bayakwi dawi Seirat yakat yakmaldana.

²⁷Israel sauni yakat[11] kiwi kana mani kat, trumpit puhna Efraín asangni yakat Israel balna yulwi, dawak witingna bitik laih kalpakwi asang kaupak yaklauwi uina Aod tunan duwak.

²⁸Aod yaklauwi diyulna witing yakat usnit uinin, kat Dawan yaklauwi minit bayaknin kidika diawarang atna moabita balna niningna yakat. Kaput laih witingna Aod yakat usnit uiwi Jordán wasni baini duwa yakat panina duduna, bahang muih as bik dadawak bayakwasdai.

²⁹Kidika mani moabita muihni balna tausin salap ihina dai, dadauna balna kidika laih kalbauyang pararasni dai dawak bik kulninna dadasni. As bik kiri sangka yaklauwasdai.

³⁰Kaput laih Israel balna yaklauwi Moab muihni balna yakat minitna bayayakna dai. Kidika usnit kat, kidika pāni yakat kulnin aslah lani sakdai kurih 80.

³¹Kidika kaupak tunan nuhni wihta ūk kana kidika laih Samgar, Anat walanibis, bahang witing laih filisteo andat tiaskauas ina dai pan subangni. Kaput laih Samgar bik Israel yakat laihwi yakna.