Read Mayangna Jueces 4 Bible Online

Jueces 4 - Mayangna bible

Jueces 4

¹Aod dauna usnit kat, Israel muihni balna kidika watwi Dawan minikpa yakat dutni yayamna dai,

²kaput bahang Dawan yaklau Jabín tingni dinit yakat ana dai, cananeo kaupak king as Hazor tawanni nuhni yakat kabamint kawa dai kidika. Witing kalbauyang muihni balna duwa kidika taninatuna ayangni laih Sísara dai, dawak witing laih Haroset-goim yakat yalahwa dai.

³Jabín laih ayan kārni manah 900 duwa dai, dawak kurih 20 pasyakat dutni palni ditaihwi duna dai Israel muihni balna yakat, dawak witni kat Israel muihni balna yaklau Dawan kalni dinit yakat bukwi ilp kalyuyulna dai.

⁴Kidika mani yakat Israel muihni balna kidika Prapit yal as yaklau kingnina kawa dai ayangni laih Débora, Lapidot yalni.

⁵Débora laih witing niningh kuku satni panan dinit yakat yalahwa dai (niningh yuyulwa kaput “Débora kuniku panan”), Efraín asangni balna kau bangdai kidika, Ramá dawi Betel karak walsah yakat, dawak Israel muihni balna laih witing yakat walwi uiwa dai witingna kaluhusna kidika barangni yamna atnin yulni.

⁶Ma as kat, Débora yaklau muih al as ayangni Barac kidika yakat kalyulwakat kiuna, Abinoam walanibis, Neftalí sulani balna tawannina as ayangni Cedes yakat yalahwa dai kidika, dawak kalyulna: —Dawan, Israel Papangni yaklau adika yamnin mayulwi: ‘Tabor asangni yakat yawa Neftalí dawak Zabulón sulani balna kaupak muih ahal 10,000 uduhtah kidika pāni yakat.

⁷Yang lawik yamtingkat Jabín kalbauyang muihni balna duwa kidika taninatuna Sísara kidika Cisón wasni yakat kaiwi kārni balna dawak kalbauyang muihni balna duwa yakau makalbauwarang ki. Kaunah yang lawik man tingma yakat āki ki.’

⁸Barac yaklau nangnitlana: —Yang karak yawama laih takat yawaki kaunah yang karak yawasman laih yawasyang.

⁹Débora yaklau nangnitlana: —Bahang man karak yawakiki. Adika awaihna nuhni yaksihni awaihma kidika laih man dima awas karangki, kat Dawan yaklau Sísara kidika muih yal as tingni yakat awarang ki. Bahang Débora laih Barac karak Cedes yakat uinadai.

¹⁰Kidika pāni yakat Barac yaklau Zabulón dawak Neftalí sulani balna yakat diyulwakat uina dai, dawak witing tingni dinityakat kalbauyang muihni balna 10,000 uduhna dai. Débora laih witing karak kiuna dai.

¹¹Cedes ulis yakat, kirah kaupak yaihnit yakat, quenita kaupak Heber ūni labanni kidika sakdai, witing laih quenita muihni ūk balna kaupak dakwi kalahna dai, kat witingna bik sihm Moses unisah Hobab,[12] sulani balna dai kidika yulni.

¹²Sísara witing dakawakat Barak laih Tabor asangni yakat kilna kat,

¹³ayan kārni balna 900 duwa kidika dawak kalbauyang muihni balna duwa kidika bitik uduhna dai, dawak witingna karak uina dai Haroset-goim kaupak Cisón wasni kat.

¹⁴Bahang Débora yaklau Barac yakat kalyulna: —¡Tuna lawa lapaktah, warmani ki Dawan yaklau Sísara kidika man tingma yakat awarang kidika! ¡Dawan laih uman man kalbauyang muihni balna dutaman kidika tanitna yakat kiwi! Barak laih Tabor asangni kaupak yaklakna dai kalbauyang muihni balna 10,000 karak,

¹⁵dawak Dawan yaklau muihsakdaunin kidika kalbaunin kārni balna dawak Sísara kalbauyang muihni balna duwa kidika walsah yakat dana dai Barac isniparah kau kalbauwa minitni yakat; dawak Sísara witing palni bik kalbauwa kārni kaupak yaklakwi kalkau kirana dai.

¹⁶Kaput bik, Barac laih kalbauyang muihni balna yakat dawak kar balna yakat bik uiwi kiuna dai Haroset-goim kat. Kidika mani Sísara kalbauyang muihni balna duwa kidika kaupak as sangka watwas dai: bitik dadauna dai.

¹⁷Jabín laih Heber walanibis balna karak kulnin aslah lani kidika duwa dai bahang, Sísara laih kalkau kiwi kana dai, Heber yalni Jael ūni labanni kat,

¹⁸bahang yal kidika kalahwi kalparasna dawi kalyulna: —Yang dakiwan man akat laih yamaduwinih. Sísara laih ū pasyakat kawak Jael yaklau kalmuknin dini as karak mukwi malpamna dai;

¹⁹bahang Sísara yaklau was kalyulna dai, kat uba was dikih kalana dai kidika yulni. Jael laih tāwas puwa dini unitak dai kidika yakat apahwi kalawakat dina dai; usnit kat watwi muksakna dai.

²⁰Sísara yaklau kalyulna: —Ū labanni kaikawa pāni yakat sakawah, dawak muih as kaiwi adika pasyakat muih as sakyah, mayulwi dakawarang kat, muih diski kaltima.

²¹Kaunah Sísara laih uba palni kallunglakna dai kidika yulni yamni palni kamana dai. Bahang Jael laih amar as dawak ū labanni sisitwa panan rahni kidika as duwi ap Sísara kamatus dai kidika yaihnit yakat kiwi, pan rahni kidika tapan sar yakat sau karak libitwi pana dai. Sísara laih kaput dauna dai.

²²Dawak laih Sísara yakat walwi kiwakat, Jael laih kalahwi kalparasna dai dawak kalyulna: —Aiwah, namangkaki ki waltalikman dini kidika. Barac laih ū labanni yakat kana dawak Sísara laih tunan yakat pan rahni kau pana kidika kauna dauwi sau yakat bukna tuskat yakna dai.

²³Kidika mani kaput Dawan yaklau cananeo kingni Jabín kidika yakat lakna dai Israel muihni balna muhnina yakat.

²⁴Dawak kidika mani kaupak Israel muihni balna kidika yaklau Jabín yakat wat wat dutni kalyayamna dai, daukalpapamna kat.