Read Mayangna Jueces 5 Bible Online

Jueces 5 - Mayangna bible

Jueces 5

¹Kidika mani, Débora dawi Abinoam walanibis Barac karak aput unbabauna:

²“Bitik Dawan yakat ayangni nuhni yamtanauh, kat Israel yakat baisa bangki kalbauna atnin ahalni balna kulninna aslah duduwa kidika;[13] kat baisa bangki tawan pasyakat kalbaunin sip ahalni balna kidika.

³¡Manna king mana kidika yadakanauh! ¡Manna kabamint kayang balna mana kidika yadakah! ¡Dawan yakat unbautik kalaki ki! ¡Israel Papangni yakat unbautik kalaki ki!

⁴“Dawan man Seir kaupak alahwanaman mani; Edom di dahwa pāni balna kaupak yawanaman mani, sau kidika isihna, dawak kisang kidika laih kalyukna[14] dai, mukus balna kidika laih was utuhna dai.

⁵Dawan man muhma yakat, Israel Papangni man muhma yakat, asang balna kidika dawak Sinaí asangni kidika bik isihna.

⁶Anat walanibis Samgar mani balna yakat, dawak Jael mani balna yakat bik, muih balna pa ūk kau uiwa kidika ta balna kidika ruhmwi dadana dai dawak ta dudutni balna munah awaihwi bang atna dai;

⁷Israel tawanni balna dibinina kidika[15] bitik palni ruhmwi dadana dai. Kaput dawak yang lawanayang dai, ¡Yang Débora, Israel nanangni as!

⁸“Dawan dauh wisasam balna kidika muih as bik duwas laih awas dai kalbaunin kidika laih tawan nuhni dūrni yakat kalbauwabang kat, kaunah nandaknin dini kidika dawak langsa as bik dis dai Israel muihni balna 40,000 pasyakat.

⁹“¡Yang ising kidika diatayang Israel tanituna balna nunuhni kidika yulnina, yang tawanki muihni balna yulnina kalbaunin yakat kalbabauna kidika yulni! ¡Bitik palni Dawan yakat ayangni nuhni yamtanauh!

¹⁰“Manna yultanauh, biriku balna pauni sa kat kikilwa muihni balna kidika; dawak manna la manalaihna kaldakamana kidika dawak manna pa ūk kau yawamana kidika bik sihm yultanauh:

¹¹¡Turuh was bayahyang balna pasyakat, dawak wisnin plitni kidika wista Dawan minit bayakna balna kidika, Israel tawanni yaihnit kau tawan binina minit bayayakna kidika yultanauh![16]

¹²“¡Sahmuhtah, Débora, sahmuhtah, sahmuhtah dawak unbaunin as unbautah! ¡Dawak Abinoam walanibis Barac man laih, lauwa dawak simalak muihni balna kidika duyawah!

¹³“Bahang Israel muihni balna[17] kidika yaklalakna dai pararasni balna kidika karak kalbauna atnin; Dawan kalbauyang muihni balna duwa kidika yang yulki yaklalakna dai kalbauyang muihni balna kidika karak kalbauna atnin.

¹⁴Efraín ahalni balna buas sau langni yakat[18] yaklalakna dai, dawak witingna dangnitna yakat kalbauyang muihni balna Benjamín duwa kidika uina dai. Maquir kalbauyang muihni balna duwa kidika kaupak laih taninatuna balna kidika yaklalakna dai, dawak Zabulón kalbauyang muihni balna duwa kidika kaupak laih, kabamint kayang balna kidika yaklalakna dai.

¹⁵Débora karak kalpakwi uina dai Isacar tanituna balna bik; Isacar laih Barac yakat ilp kalawa dai, bahang witing dangnit kaupak uiwi kiuna dai sau langni yakat. “Rubén kalbauyang muihni balna duwa kidika pasyakat muih ahal nunuhni kulninna wirlalana kidika bangkat,

¹⁶¿ais yulni daklana balna pasyakat wawatna daih, sīp maintalyang balna sīpnina yuyulwa yakat dakawi? ¡Rubén kalbauyang muihni balna duwa kidika pasyakat muih ahal nunuhni kulninna yamadangni dakakawa kidika bangki!

¹⁷“Galaad laih ūni labanni yamwi watna dai Jordán wasni nakas yakat; Dan laih kuring nunuhni balna kidika yaihnit yakat watna dai, dawak Aser laih kuma kung yakat watna dai dawak kuring nunuhni balna wawatwa pāni kaupak kalahwas dai;

¹⁸kaunah di dadahwa pāni balna mayakat, Zabulón dawi Neftalí karak sangninaka didisna.

¹⁹“Bahang king balna kidika Taanac yakat aina dai, Meguido wasni kidika yaihnit munah; cananeo balna kingnina balna kidika laih kalbauna atnin kulwi aina, kaunah lalah dawak minit nunuhni dini balna kidika laih duduwas dai.

²⁰Kisang kidika kaupak, yaihnitkau tuyulni awaihwa balna kidika kaupak, yala balna kidika Sísara niningyakat kalbabauna dai;

²¹was dawak muhnilau kau wasni kidika, Cisón wasni kidika yaklau witingna bitik yakat suhwi yakmukna dai. ¡Man lawa muih pararasni balna dinitna suru kidika taihta labanni yamnaman karang![19]

²²“¡Aras balna susni kidika parasni yulwi! ¡Aras yayamni balna kidika parasni palni kikiri!

²³Dawak Dawan innisal kidika laih yulwi: ‘¡La tuhna dalani as bukwang Meroz dawak sauni muihni balna minitna yakat bik!’ Bahang muih kulninna dadasni balna walwi uiwas kaput witingna bik uiwas dai Dawan yakat ilp yulwi.

²⁴“¡Jael laih ayangni nuhni yamna karang yayal balna pasyakat, quenita kaupak Heber yalni kidika! ¡U labanni yayalni balna pasyakat ayangni nuhni yamna karang!

²⁵Sísara laih was yulwakat; Jael laih tāwas kau kalana dai. ¡Sutak nuhni yamni as kau butar kalana dai!

²⁶Kaput bik pan rahni kidika tingni wadah kau laihna dai dawak kipala nunuhni sahnin ayanni kidika laih tingpal kau laihna dai, dawak Sísara tunani yakat wiswi dakwi dawak tapani sar balna yakat pawi ahllana dai.

²⁷Sísara laih Jael kalnisar yakat awaihna dai; dalani dakawi awaihwi sau yakat bukna dai, dawak bukna pāni kidika yakat dauna dai.

²⁸“Sísara nanangni laih kulnin bukna palni windar yakat kalahwi talwi aput yulna: ‘¿Ais yulni kārni kidika bainah kaikawas yah? ¿Ais yulni kalbaunin kārni kidika kaiwas diswih?’

²⁹muih yayal di amanglayang balna buas yaklau nangnitlalana, dawak witing alas yakauna bik lamwi kalyulwi dakawi:

³⁰‘Rahm palni di wayahwi duwa bangkapatki kalbauwi minit bayakwi duduna dini balna kidika. Kalbauyang muihni as kidika di yamyang yal as, dawak muih yal baisa al karak kalpakwas kidika as; Sísara laih asna balna mapla duwa kidika duna dai: asna dakni as dawak muih yal baisa al karak kalpakwas kidika as, mapla manas kau karna asnina kidika laih minit bayakwarang muihni kidika dinimak yakat sitnin dini.’[20]

³¹“¡Dawan kaput daukakalna karang, man namangkauh yaklalauwa muihni balna kidika bitik, dawak man yakat dalani matatalwa muihni balna kidika laih yaringni dadahlwang, sihm ma parasni dahlwa kapat!” Kidika usnit kat kurih 40 pasyakat kidika sauni yakat kulnin aslah lani kidika sakdai.