Read Mayangna Jueces 7 Bible Online

Jueces 7 - Mayangna bible

Jueces 7

¹Gedeón witing ayangni ūk papakna dai kidika laih Jerobaal, bahang witing karak bang kidika muihni balna bitik pukta kau yaklauwi Harod wasni bin yakat uiwi pa duduna. Madián muihni balna laih Harod wasni bin kaupak tingpal nining yakat bang dai More asangni sar yakat.

²Dawan yaklau Gedeón yakat kalyulna: “Uba muih mahni duaitaman bahang yang niking yakat kukulwarang witingna alas kalbauwi minit bayayakna kapat kukulwarang, Madián muihni balna niningna yakat.

³Kidika bahang muih balna yakat diyultah, wais yamaduwa kat sipki uni yakat kiunin.” Gedeón yaklauwi aput laihwi talwadai,[22] dawak muih ahal 22,000 uinadai, bahang tausin salap manah wawatna.

⁴Kaunah Dawan yaklauwi watwi yulna: “Baisa uba mahni ki, dutayawang was didiwarang, yakat wattik yang laihtik talki ki, angdika balna man karak uiwarang kidika dawakat wais kidika uiwas karang kidika.”

⁵Kaput laih Gedeón muih balna dukiuna was dina atnin, bahang Dawan kalyulna: “Silp yaknaman karang, tingnina kau butwi didiwa, kidika dawakat limbabah dawi didiwa balna kidika.”

⁶Tingkau butwi didina kidika dawakat, sul was diwa kaput didina balna karak libitwak andat bas dai. Dawakat as balna kidika laih limbabahwi didina muihni balna dai.

⁷Dawan yaklauwi Gedeón yakat kalyulna: “Ahal andat bas adika kau manalaihtik yakki ki dawakat Madián muihni balna minitna bayakki ki. As balna mana laih sipki yawamana.”

⁸Kaput laih Gedeón yaklauwi sihwak uina panina bangdai yakat; baisa uiwas tanit kauh, tuninaruh tamni, dawakat was punin uni duduwa dai kidika dakyakna. Muih ahal andat bās kamanah wawatna, witing walwi yakna muihni balna kidika, dawak Madián balna minit yakat uiwi pa duduna, sau langni kau bangdai kidika.

⁹Kidika puknita Dawan paknadai Gedeón yakat: “Lawa lakyawa Madián muihni balna yakat kalbauta man tingma yakat adika.

¹⁰Kaunah man yamadutaman kat kalbaunin, tatuna man warauma Fura karak lak'yawanauh Madián muhni balna bang kidika yakat,

¹¹bahang dakanama ais yuyulwa kidika. Bahang kidika usnitkat kalbaukih alahwa kalbauma.” Kaput laih Gedeón witing warauni Fura karak yaklakwi uina waihninala bang kidika yaihnit yakat.

¹²Madián muihni balna, Amalec muihni balna dawakat ma kilwa niningkau muihni balna kidika bitik, rana bangdai langni pa nuhni kidika bitik kiamil mahni kuma kauhnimak kapat duduwa dai.

¹³Gedeón witing waihnila balna ūnina yaihnit yakat kiwi tapayuwi dakana bahang as yaklauwi wanaihni yakat aput kalyulna: —Amana kau talnayang dai, plawar busna as asang mayakaupak tulwi kaiwi maūki baulakwak talnayang.

¹⁴Wanaihni dai kidika yaklauwi kalyulwi: —Kidika laih ūk awaski Gedeón, Joás walanibis kidika isniparah, Israel sulani. Papang yaklauwi Gedeón tingni yakat āna karang ki Madián muihni balna kidika bitik, ūnina balna bitik.

¹⁵Amana talna kidika yulwak, amput wirlawi biriwi kalyulwa kidika bitik dakana Gedeón, bahang Dawan ayangni nuhni yamwadai. Kidika usnit kat nawatwi kiuna Israel balna ūnina labanni yakat, dawak dipakna: —¡Lawanauh Dawan yaklauwi Madián muihni balna ūnina labanni kidika mayawarangki!

¹⁶Muih balna andat bās kidika, uduhna bās sahyakna, dawi turuh tamni as as diana dawakat sulun panimanah pasyakat kuhpau dahlna duwa kidika bik as as diana.

¹⁷Aput diyulna: —Waihla balna ūnina labanni papakna kidika pining nakas yakat bayakyawik, ais yamki kidika yang akat yatala ais yamtayang kaput yamtanama manna bik.

¹⁸Yang yawayangna adika, turuh tamni puhtining kat manna bik puhtanama kung awaih kidika bitik dawakat aput yultanama: ‘¡Dawan ayangni kau dawak Gedeón ayangni kau bik!’

¹⁹Kaput laih, Gedeón witing ahal andat kidika karak kalpakwi waihnila balna bang pining yakau bayakkiuna, kidika minitni yakat, maintalyang muihni balna kidika ūk sins yamnin manah dai, pukpapus dai bahang. Kaput laih turuh tamni kidika mahka pupuhna dawak tingnina kau sau subani duwi uina kidika ruhmwi sasahna,

²⁰dawak sahyakna bās kidika balna bik tuninaruh tamni puhwi, sau suba ruhmwi sasahna dai. Tingnina wadahni kauh awas dahlna duwi uina dai dawak turuh tamni puhnin dini kidika laih tingnina palni yakat duwi uina dai bahang parasni sarahwi yuyulna: “¡Kalbaunin! ¡Dawan ayangni kau dawak Gedeón ayangni kau bik!”

²¹Israel balna bitik laih ap dawi kus bangdai, ū labanni papakna kung awaih yakat, dawakat Madián muihni kalbauyang balna kidika parasni sarahwi kalahwi kikirana bitik ki.

²²Israel balna dawas ban turuh tamni kidika pupuhna, dawakat Dawan yaklauwi yamwak Madián muihni balna kidika biri biri kalbauwi kalahwi Bet-sita pāni kat uina, Zera tani yakat, Abel-mehola sauni kai'watwa Tabat yaihnit yakat.

²³Kaput dawak Israel balna diyulwak uiwi Neftalí sulani balna, Aser sulani balna, dawak Manasés sulani balna bitik, Madián muihni balna yakat uiwi uina atnin.

²⁴Gedeón bik muih sahni dai Efraín asangni balna yakat adika muihni balna uiwarang ki Madián muihni yakat kalbauna atnin, bahang Betbara Jordán wasni dadakwarang pāni yakat tanitna kau uiwi tahahana karang ki, Efraín muihni adika yulni dakakana kat, yakat yayamwa dai.

²⁵Dawakat Madián muihni balna tanina tuna albu lalaihna Oreb dawi Zeeb. Oreb laih ihina kipala nuhni as sakki kidika yakat, bahang kidika kinipala laih ayangni papakna Oreb kinipala. Zeeb laih ihina kidika pāni laih witing ayangni papakna bahang kidika pāni yakat witing wain minik atakwa dai, wain yamna atnin. Madián muihni balna dangnitna kaupak uiwi kuihwi kalbauwi dawi usnitkat, nawatwi uiwi yakat Oreb dawi Zeeb tunanina balna kidika uiwi kalalana Gedeón yakat, bahang witing laih Jordán wasni nakasyak sakdai.