Read Mayangna 3 Jan 1 Bible Online

3 Jan 1 - Mayangna bible

3 Jan 1

¹Yang muihbarak yang lawik yang karak kaltalyang yamni Gayo yakat adika wauhnitaya ultayang, rahm witing yakat dalani kaltalayang kidika.

²Wirah dalani, Papang yakat kalyultayang, Spirit yakat yamni yawaman kidika, man yakat di bitik yamni karang, dawak man muihma kidika bik.

³Yang kasak alasna dunayang, wirah balna aiwi yayuyulwak dakanayang, man laih barangni man rahm dini kidika yakat.

⁴Yang laih alasna ūk tanit nuhni disyang, kaunah walakibis balna kidika di rahm yakat yalalahwa kidika manah laihtakat.

⁵Wirah dalani, barangni man, wirah balna ūk yakat dinina yamtaman kidika, tanit kidika laih pa ūk kaupak uiwa kidika balna yakat.

⁶Muih balna kalududuhna muhnina yakat yuyulna, man ampus dalani ditalaman kidika. Plisma ilp diatah witingna angkat uiwa kidika yakat, Papang dukih kalawa kidika kaput.

⁷Kat witingna uiwa kidika laih Jisaskrais dini yamna[1] uiwi, bahang witingna muih balna baisa Papang yakat kukulwas balna ilpnina kidika dukih diawaski.

⁸Kidika bahang mayang witingna yakat ilp dianin ki, yul rahm kidika sumamalwa yulni.

⁹Yang lawik wauhtaya as ulnayang dai kalududuhna muihni balna yakat, kaunah Diótrefes laih maikulwaski, kat witing laih mamikit yakat atnin kulwa bahang.

¹⁰Kidika bahang, yang yawaki kat, sumalki ki, witing laih mayang ma-alaski yulwi. Dawak kamanah bik isninglakwaski, wirah balna uiwa kidika yamni diyamwaski, dawak yamni diyamnin kukulwa muihni balna kidika laih didāwakat yayamwaski, dawak kaluduhna paskaupak yakmukwi.

¹¹Wirah, dutni yamwa kidika talwi yamwinih, kaunah di yamni balna kidika laih. Di yamni yamwa muihni kidika laih Papang kaupak ki, kaunah di dutni yamwa kidika laih baisa Papang talwaski.

¹²Bitik, sihm di rahm kidika bik, Demetrio yulni yamni yuyulwi. Mayang bik witing ilpni yuldi, dawak man amanglataman di rahm yultayangna kidika.

¹³Yang di yulnik manas dutayang dai, kaunah wauhtaya kau ulnik laih dukih yāwaski,

¹⁴kat sirihni matalnik tahatayang, dawak man karak yulbaunin.

¹⁵Kulnin aslah lani dutah. Kaltalyang yamni mana kidika parasnin masisihwi. Plisma, bitik kau yultang pararaswang.