Read Mayangna Ribilisan 11 Bible Online

Ribilisan 11 - Mayangna bible

Ribilisan 11

¹Kulwi talnin panani as yayana dai, sihm tisnak as kapat, dawak aput yayuyulna dai: “Lawah dawak Papang ūni kidika dawak sakripais busnin pāni kidika bik kulta talah, dawak kidika pāni yakat muih yapak ayangni tanit nuhni yayamwa kidika kulta talah.

²Kaunah makat yulnin ūni watakni ahni niningkauh kidika laih kulwi talwinih, kat Papang kukulwas balna tingnina yakat āna bahang, witingna laih tawan nuhni holi kidika waiku 42 pasyakat taihwi duduwarang ki.

³Dawak yang lawik witnis bu sihki ki, asna utuhni karak, ma 42,000 pasyakat yang yulki yulna atninna.”

⁴Adika witnis muihni balna bu adika kuduh olib bu dawak awas dahlwi ilnin dini bu sau Daniwan tanityakat bangkidika.

⁵Muih as yaklau didaukalmuknin traitalwarang kat, witingna laih tininapas kaupak kuhpau yayakwi, kidika kau witingna niningkauh yaklalauwa balna yakat bitik kau imumukwi; kaput dauna karang ki angdika muihni kat didaukalnin kulwarang kidika laih.

⁶Adika witnis muihni balna laih parasnina duduwi kisang kidika putna atninna, kaput karak witingna Papang yulni yuyulwa mani yakat was lauwas atnin, dawak witingna parasni duduwi was kidika ā yamna atninna dawak sau yakat kalyayamwakat wah dalani satni balna mahni wauhnin bik parasni duduwi, witingna wat yapak dukih diawarang kidika kaput.

⁷Kaunah witingna witnis yulwi saran lalaihwarang mani kat, puksani tuhni kaupak di dutni wayakani kilwa kidika yaklau dikalbauna karang, minitna bayakwarang dawak bik imukna karang.

⁸Dadauna muihnina nuhni kidika laih tawan nuhni tani balna yakat bubukna karang Daninawan pan prihni kau ilwi papana kidika yakat, kidika spirit niningkauh yulnin lain Sodoma dawak bik Egipto.

⁹Dawak ma bās minitkau papusbah, tawan, muih satni balna, tuni satni balna yulyang dawak nisan sat sat muihni balna bik tatalna karang dadauna muihnina nuhni kidika dawak sip didawakat nunuwas karang.

¹⁰Sau akat yalalahwa muihni balna kidika laih kidika muihni balna dadauna yulni alasna kalalahna karang. Isningnalak palni biri biri minit dis dini kalyuyuna karang, kat kidika prapit balna bu dai kidika laih witingna niningna yakat dalani as dai bahang.

¹¹Kaunah kidika ma bās minitkau papusbah laihwa mani kat, Papang yaklau watwi sangka diyamna dai dawak watwi yaklalauna dai, dawak tatalna muihni balna bitik laih uba palni yamaduduna dai.

¹²Bahang witnis muihni balna bu dai kidika laih kisang kaupak yulni as parasni yulwakat dakakana dai, aput yulna dai: “¡Akat ilwa aiwanauh!” Dawak mukus as karak kisang yakat iluina dai, dawak witingna niningnakauh yaklalauwa balna dai kidika tatalna dai.

¹³Kidika minitni yakat sau isihna nuhni as kalahna dai, dawak sau isihna kidika yulni tawan nuhni sahyakna salap kidika bukkiuna dai, dawak muih 7,000 dadauna dai. Sangka wawatna balna kidika laih, uba palni yamaduwi Papang kisang kau sakyakat ayangni nuhni yayamna dai.

¹⁴Daukalna bu kidika laih bayakna, kaunah bās kidika laih sirihni palni kaiwi.

¹⁵Insal tiaskaubu kidika trumnipit puhna dai, dawak kisang yakat yulni pararasni aput yuyulna dai: “Sau kingni lani kidika laih uman mayang Madakiwan dawak Mesíaskidika dini, dawak witingna laih ban kaput atninyakat king kakawarang ki.”

¹⁶Papang muhnityakat muihbararak balna 24 yalahna bangdai kidika, sau kat abukwi Papang yakat ayangni tanit nuhni yayamna dai,

¹⁷aput yulwinah: “Dawan, Papang parasni bitik duyang, tingkih lani matayangna, man laih sangka man kidika dawak bik sangka man dai kidika, kat man laih parasma nuhni kidikadunaman bahang dawak mahka king awanaman.

¹⁸Nisan balna kidika laih kulninnadaukakalna; kaunah kulnam daukalnin mani kidikalaih kiwi kana, muih dadauna balna lanina yamnammani kidika; dawak man dimayamyang prapit balna yakat minitna lauta dianaman karang, man tawanma muihni balna kidika dawak man ayangma yakat rispikyayamwa balna yakat bik, muihbararak karang pa kidik awaskatwalabis karang pa; dawak didaukalmuknaman karang saudaukakalwa balna yakat.”

¹⁹Bahang Papang ūni kisang yakat sakkidika apahna dai, dawak makat yulnin ūni pasyakat aslah kalahna lani baksni kidika lāih dai. Dawak alwana lapna, yul balna,[5] alwana ruhmna balna, sau isihna dawak was dadasni bik uhna dai.