Read Mayangna Ribilisan 13 Bible Online

Ribilisan 13 - Mayangna bible

Ribilisan 13

¹Kuma kaupak di dutni wayakani as kilwakat talnayang dai kidika laih tunani tiaskaubu dawak tamni balna salap duwadai. Tamni balna kat kat kidika kraun as as duduwadai, dawak tunani balna yakat ayangni duwadai Papang niningyakat dutni yulna yulni balna.

²Adika di dutni wayakani talnayang kidika, sihm nawah bulni kapat dai; dawak kalni balna kidika laih sihm kauhmak wanilang nawahni kalni kapat dai, dawak tinpas kidika laih sihm layan tinpas kapat dai. Waula kidika yaklau parasni dawak tronni bik kalana, dawak lani parasni bik mahni kalana dai.

³Di dutni wayakani tunan balna as kidika laih di kaldakna kapat duwadai; kaunah kaldakna kidika laih yamlana dai, dawak sau muihni balna kidika laih amanglawas dawi di dutni wayakani yakat usnit uhuina dai.

⁴Waula yakat ayangni tanit nuhni yayamna dai kat di dutni wayakani yakat lani parasni kalana dai kidika yulni, dawak di dutni wayakani yakat bik aput yulwinah ayangni tanit nuhni yayamna dai: “¿Wais sakyah adika di dutni wayakani apat, dawak wais sipkarangyah witing niningyakat kalbauna atnin?”

⁵Di dutni wayakani yakat di dudutni bik yulnin kaldana dai Papang niningyakat, dawak witing lani parasni bik duwa atnin waiku 42 pasyakat.

⁶Dawak kaput yamna dai; Papang niningyakat yulbauna dai, dawak witing pāni holi kidika yakat dawak kisang kau bangkidika niningna yakat bik dutni yulna dai.

⁷Papang tawanni muihni balna niningna yakat bik war yamnin kaldana dai, angkat mani minitna bayakwarang kat; dawak lani parasni kalana dai muih satni balna, tawan, tuni sat sat yulyang balna dawak nisan balna bitik kidika minitna yakat.

⁸Kidika dini dutni wayakani yakat sau muihni balna bitik ayangni tanit nuhni yayamna karang witingna ayangnina laih ulwas ki, sau yamna mani kaupak, Sīp sakripais kalyamna kidika sangka wauhnitaya yakat.

⁹Wais tapani sulihni duwakat, dakawang:

¹⁰“Silak yakat uinin muihni balnakidika laih, silak yakat duwi uina karang;[8], dawak isparah baini karak dauninmuihni balna kidika laih,[9] isparah baini karak ihina karang.” Akat talwarang ki parasni kidika dawak Papang tawanni muihni balna rahm kulnin lani duduwa kidika bik.

¹¹Usnit kat di dutni wayakani ūk talnayang dai, sau paskaupak kilwadai. Tamni bu duwadai sihm sīp tamni balna kapat, kaunah sihm waula kapat yulwadai.

¹²Dawak di dutni wayakani tatuna lani parasni balna dai kidika bitik duwadai, witing muhni yakat, kaldakna daunin kaupak yamni kalyamna dai kidika.

¹³Di taldas sainni nunuhni balna bik yamwadai. Kisang kaupak bik yamwakat sau yakat kuhpau bukwadai, muih balna muhnina yakat.

¹⁴Dawak di dutni wayakani tatuna muhni yakat sain balna yamwa munah, sau muihni balna yakat alas diyulna dai dawak diyulna dai uiwi di dutni wayakani isparah baini karak kaldakna kat dauwas sangka kidika wayani as yamna atninna.

¹⁵Dawak di dutni wayakani bu yakat parasni kalana dai di dutni wayakani tatuna dai kidika wayani yakat sangnika kalana atnin, kaput karak kidika wayani kidika yulbauna atnin dawak angdika muihni balna witing yakat ayangni tanit nuhni yayamwas karang kidika bik īna atnin.

¹⁶Baisa kidika minityakat, muih balna bitik yakat, walabis dawak muihbarak, di duyang dawak minikunni, pri muihni balna dawak warau balna, tingnina tingpal niningyakat dawak muhnina yakat bik sain ana dai.

¹⁷Dawak muih as bik di bakannin sipawas dai dawak bik wauhwi bakannin sipawas dai, sainni kidika kidik awaskat di dutni wayakani ayangni kidika diskat, kidik awaskat numniba kidika ayangni diskat.

¹⁸Akat talwarang ki sins lani kidika; angdika muihni amanglawakat, kulwi talwang di dutni wayakani numniba kidika, kidika laih muih numniba. Kidika numniba kuduh 666[10] kidika.