Read Mayangna Ribilisan 14 Bible Online

Ribilisan 14 - Mayangna bible

Ribilisan 14

¹Sayan asangni yakat Sīp yaklauna sakdai kidika talnayang dai. Kidika Sīpni karak muih 144,000 bangdai kidika balna laih muhnina yakat Sīp dawak Papangni ayangni kidika bik ulna duduwadai.

²Usnit kat kisang kaupak di as parasni yulwi kaiwa kidika dakanayang dai; sihm kitang parasni yulwa kapat atna dai, sihm alwana parasni ruhmwa kapat; sihm paswi yakisdinin dini kat pasyang balna paswi yakikisda kapat atna dai.

³Dawak unbauna wisam as unbabauwa dai trun kidika, di sangninaka duduwa balna kidika dawak muihbararak balna kidika muhnitna yakat bik. Muih as bik sip lan kalwas dai kidika unbauna, kaunah sau muihni balna paskaupak muih 144,000 laihwi yaknin lani duduna kidika balna manah lan kakalna dai.

⁴Adika balna kuduh yayal balna karak kalpakwi muihnina yakat dutni yayamwas dai kidika; witing laih Sīp angkat angkat kiwarang kidika usnit uhuiwi. Witingna laih muih balna paskaupak laihwi yaknin lani kidika duduna dawak Papang dawi sīp kidika bik dini minitdis kalanin dini as ki.

⁵Witingna kungninamak yakat alas as bik yuyulwas dai, bahang witingna laih dibilwas atnin muihni balna ki.

⁶Insal ūk talnayang dai, kidika laih kisang papus yakat yaklauna witdai dawak ban kaput atnin yulni as duwi kiwadai sau yakat yalalahwa muihni balna, nisan, muih satni, tuni sat sat yuyulwa dawak tawan balna bitik yakat bik diyulna atnin.

⁷Parasni palni aput yulwadai: “Papang yakat yamanidutanauh dawak ayangni tanit nuhni yamtanauh, bahang witing la yamnin awarni kidika laih uman kiwi kana. Kisang, sau, kuma dawak wastuna balna yamna muihni yakat ayangni tanit nuhni yamtanauh.”

⁸Insal ūk kaiwi aput yulna dai: “¡Babilon nuhni kidika laih uman bukna uman bukna, witing yaklau nisan balna bitik yakat muihni nuhni dukih kalawa lani kidika karak wasak dihina kidika!”

⁹Usnit kat insal bās kidika kaina dai, kidika bik parasni aput yulna dai: “Angdika muihni di dutni wayakani dawak wayani kidika yakat bik ayangni tanit nuhni yamwarang kat, dawak bik muhni yakat kidik awaskat tingni yakat sainni kidika awarang kat,

¹⁰Papang kulnin daukalna wainni kidika dina karang ki, witing annin sūnitak maisihni dis ridi yamna kidika; dawak dalani kalana karang ki kuhpau dawak sulhpa karak insal balna holi dawak sīp kidika bik muhni yakat.

¹¹Kidika dalani wayauni kidika laih ban kaput atnin kilwi, dawak madah dawak pukta kidika yakurupdinin diski di dutni wayakani dawak wayani yakat ayangni tanit nuhni yayamwa balna kidika dawak ayangni sainni duduwa balna kidika bik.”

¹²¡Akat talwarang ki Papang tawanni parasni kidika, witing lani balna kat laihwi yayamwa kidika dawak Jisas yakat bik bararangni kidika!

¹³Bahang kisang kaupak yulni as aput yayulwakat dakanayang dai: “Adika ultah: ‘Yamni palni karang angdika muihni balna warmani kaupak tanitkauh yakat Dawan karak aslah kalahwi dadauwa kidika.’ ” Spirit yaklau “Agha —ti—, witingna laih warknina balna kaupak yakururupdana karang, bahang warknina balna kidika yaklau miniknadadawi.”

¹⁴Mukus pihni as talnayang dai, dawak kidika minityakat muih as yalahna sakdai muhni kidika laih muih muhni duwadai. Tunani yakat gol kraunni as duwadai dawak tingni yakat laih isparah baini as duwadai.

¹⁵Dawak makat yulnin ūni kidika kaupak insal ūk kalahna dai, mukus minitkau yalahna sakdai kidika yakat sarahwi aput kalyulna dai: “¡Ismaparah kau di minik balna kidika daktah; kat awarni kidika laih uman kiwi kana, dawak sau kaupak di minik balna kalahwa kidika laih uman pihna!”

¹⁶Mukus minityakat yalahna sakdai kidika laih isniparah kidika sau minityakat ana dai, dawak sau kaupak di minik balna kalahwa kidika dakna dai.

¹⁷Usnit kat insal ūk kalahna dai kisang kau makat yulnin ūni sakkidika kaupak, witing bik sihm isparah baini as duwadai.

¹⁸Dawak sakripais busnin pāni kaupak insal ūk kalahna dai, witing laih kuhpau yakat parasni duwadai dawak isparah baini duwadai kidika yakat yulni parasni kalyulwi aput kalyulna dai: “¡Ismaparah kidika kau sau yakat wain wahni balna kidika daktah, kat wain minik balna kidika laih uman lalahna bahang!”

¹⁹Insal kidika laih isniparah kidika sau yakat ana dai dawak sau yakat wain minik balna kidika dakna dai, dawak usnit kat wain tiriswi puwa dini nuhni sakyakat puna dai dawak kidika tanka laih Papang kulnin daukalna.

²⁰Wain minik balna kidika laih tawan nuhni kidika kaupak ahni naikau yakat tirisna dai dawak di punin dini kidika kaupak laih ā kalahna dai, kidika laih aras balna iswi laihwatnin dini kidika kat kiwi kana dai panuhni niningkauh laih kilometros 300.