Read Mayangna Ribilisan 16 Bible Online

Ribilisan 16 - Mayangna bible

Ribilisan 16

¹Yulni parasni as dakanayang dai, kidika laih holi pāni kaupak kalahwadai dawak insal balna tiaskaubu yakat aput diyulwadai: “Yawanauh dawak kidika Papang wahni yamadangni sūnitak nunuhni tiaskaubu kidika sau minityakat utuhtanauh.”

²Insal tatuna kidika kiwi sūnitak kidika sau minityakat utuhna dai; dawak di dutni wayakani sainni duduwa dai kidika dawak wayani yakat ayangni tanit nuhni yayamwa dai kidika bik, pilau dalani dutni as dikalahna dai.

³Insal bu sūnitak kidika laih kuma minityakat utuhna dai, dawak kuma wasni kidika laih ā kalna dai, sihm muih ihina kapat, dawak kuma yakat di sangninaka duduwa dai kidika bitik dadauna dai.

⁴Insal bās sūnitak kidika laih was balna dawak wastuna balna kidika bik minitna yakat utuhna dai, dawak ā kakalna dai.

⁵Usnit kat was balna inninasal kidika yaklau aput yulwakat dakanayang dai: “Man laih la kat man kaputla yamnaman kidika yulni, Papang holi, sangka man dawaksangka man dai,

⁶kat witingna laih ānina ututuhna man tawanma muihni balna kaupak dawak prapit balna kaupak bik, dawak waralaih man lawa ādibayahnaman. ¡Witingna laih kaput duninna dai!”

⁷Sakripais busnin pāni kaupak bik aput yulwakat dakanayang dai: “Agha, Dawan, Papang parasni bitik duyang, man laih rahm lani dawak barangni lani munah bik la yamnaman.”

⁸Insal arungka sūnitak kidika laih ma minityakat utuhna dai, dawak ma yakat parasni kalana dai muih balna yakat kuh karak dibusna atnin.

⁹Dawak muih balna bitik laih dutni palni dibusna dai; kaunah Papang yakat wiryaklalawasdai dawak bik ayangni tanit nuhni bik yayamwas dai, kaunah witing niningyakat dutni yuyulna dai, adika wah balna minityakat parasni duwa kidika.

¹⁰Insal singka sūnitak kidika laih di dutni wayakani tronni kidika minityakat utuhna dai, dawak king kāwa lani kidika laih puksani watna dai. Muih balna kidika laih dalani dakawi tunina kakaswādai;

¹¹kaunah kaput karang bik dutni yayamwa kidika laih dadawas dai, kaunah dalani dakakawa dawak pilaunina kidika yulni kisang Papangni niningyakat dutni yuyulna dai.

¹²Insal tiaskauas sūnitak kidika laih Éufrates wasni kidika minityakat utuhna dai, dawak was kidika laih buhlakna dai king balna ma kilwa niningkaupak aiwa kidika bayakna atninna yulni.

¹³Waula, di dutni wayakani dawak prapit dauh kidika balna tininapas kaupak, spirit maisihni bās kalalahna dai sihm pik kapat.

¹⁴Walasa spiritni balna dai, dawak taldas sainni balna yayamwa dai dawak sau kingni balna bitik yakat yakwi ududuhwa dai Papang parasni bitik duwa kidika mani nuhni yakat kalbauna atnin.

¹⁵“Talnauh, yang laih di malyang yang kapat aiwayang. Alasna yamni karang angdika muihni sahmuhni kidika dawak prakni bik āwa kidika, wah dis likkauna kaltalwi yakasaldas atnin yulni.”

¹⁶Dawak king balna kidika ududuhna dai pa as ayangni hibru kau laih Armagedón.

¹⁷Insal tiaskaubu sunitak kidika laih wing yakat utuhna dai, dawak holi pāni kaupak yulni parasni as kalahna dai kidika laih trun kaupak kaina dai dawak aput yulna dai: “¡Uman yamwi dana!”

¹⁸Bahang alwana lapna, yul balna[12] dawak alwana ruhmna bik kalahna dai, dawak sau kidika laih isihna dai sau parasni as isihwakat muih balna yalalahna kaupak sau isihna balna kidika karak dawakat.

¹⁹Tawan nuhni kidika laih sahyakna bās sahwi kalahna dai, dawak sau tawanni nunuhni balna kidika laih buk'uina dai; dawak Papang laih Babilon tawanni nuhni kidika isningkatna dai, witing kulnin daukalna yamadangni kidika kalawakat dina atnin.

²⁰Ki wirni balna dawak asang balna kidika bik didisna dai,

²¹dawak kisang kaupak muihni balna minitna yakat was dadasni nunuhni uhna dai, kidika balna laih paun 80 minitkau duduwadai, dawak muih balna kidika laih Papang niningyakat dutni yuyulna dai wah as was dadasni uhwa kidika yulni, kat kidika laih wah as nuhni palni dai.