Read Mayangna Ribilisan 2 Bible Online

Ribilisan 2 - Mayangna bible

Ribilisan 2

¹“Efeso sutsni innisal yakat wauhtaya ultah: ‘Tingnipal niningyakat yala balna tiaskaubu duwa kidika dawak awas ilnin dini balna gol kau yamna kidika paskau likkidika yaklau aput yulwi:

²Yang amanglatayang di balna bitik yamtaman kidika; warkma dadasni dawak kulnam dulauta barangni lawaman kidika bik amanglatayang, dawak bik amanglatayang man di dudutni balna kidika niningyakat sip wauhtasman kidika. Apostel balna awas bik apostel mayang atwa balna kidika yakat wauhnin dianaman kidika bik amanglatayang, dawak witingna alas yuyulwa kidika bik man amanglanaman.

³Ma laih kulnam dulauta barangni lawaman dai, dawak yang yulki uba palni dalani wauhnaman, malunglakwas.

⁴Kaunah di as dutayang man namangyakat: muhnilau kau dalani lani dutaman dai kidika waralaih disman.

⁵Kidika bahang, ismang aitah angkaupak buknaman, Papang yakat wirlawah dawak muhnilau kau ais yamtaman dai kidika watta yamtah. Kaput awas karang kat, man yakat yawik awas ilnin dini kidika pāni kaupak yakki ki, Papang yakat wirlawama laihtakat yaktas awaki ki.

⁶Kaput bik, man ilpma yakat dutaman nicolaíta balna di yayamna yakat dutni talaman kidika, kidika balna laih yang bik dutni talayang.

⁷¡Angdika muihni tapani sulihni balna duwakat dakawang Spirit yaklau suts balna yakat diyulwa yulni kidika! Angdika muihni balna minit bayayakwarang kidika laih sangka atnin panani minik kaupak diatingkat kakasna karang, Papang paranidais kau sakkidika.’

⁸“Esmirna sutsni innisal yakat bik wauhtaya ultah: ‘Adika aput yulwi tatuna dawak witni muihni kidika yaklau, dauna dai kidika laih watwi sangka kalna:

⁹Yang amanglatayang man dalani wauhtaman kidika dawak mamakunni kidika bik, rahm laih duyang muihniman karang bik. Dawak yang amanglatayang man yulma dutni yuyulwa kidika Ju muihni mayang atwa balna kidika kaunah witingna laih di ūk bik awaski sitan usnit uiyang balna.

¹⁰Man dalani wauhma kidika yulni di as bik yamaduwinih, bahang sitan laih manna kaupak buas kidika balna silak yakat āwarangki, manna bitik laih wauhnin yakat manaānin yulni; dawak ma salap dalani wauhnamana karang. Dauna kat barangni awah, dawak yang lawik sangmaka kidika maki ki warkma minit kapat.

¹¹¡Angdika muihni tapani sulihni duwa kat dakawang Spirit yaklau suts balna yakat diyulwa yulni kidika! Angdika muihni balna minit bayayakwarang kidika laih watwi daunin kidika yakat dalani as bik wawauhwas karang ki.’

¹²“Pérgamo sutsni innisal yakat bik wauhtaya ultah: ‘Isparah naini nabupak baini kat duwa kidika yaklau aput yulwi:

¹³Yang amanglatayang man laih sitan tronni duwa kidika pāni yakat yalahtaman; kaput bik tamatyakat barangni yawaman yang yulki yakat. Yang yakat rahm kultaman kidika laih datasman, yang witkinis barangni Antipas sitan yalahwa tawanni nuhni yakat ihina mani balna dai kidika yakat karang bik.

¹⁴Kaunah di balna as as man namangyakat dutayang: kidika yakat muih buas dutaman witingna laih Balaam yulni dakakana kidika kaupak dakwi kalahninna dukih diawaski, kidika yaklau Balac yakat yul kalyulna dai Israel muihni balna yakat diyamwakat dutni yamna atninna diyulwakat kasnin dini balna dawan dauh balna yakat sakripais yayamna kidika kasna atninna dawak la munah kalduduwas lani kidika bik yamna atninna.

¹⁵Kidika yakat bik muih buas dutaman witingna bik nicolaíta balna yulnina dakakana kidika kaupak dakwi kalahninna dukih diawas ki.

¹⁶Kidika bahang, Papang yakat wirlawah; kaput awas karang kat, sirihni palni man yakat yawanayang karang, dawak yang tikpas kaupak isparah kalahwa kidika karak witingna niningna yakat kalbaunayang karang.

¹⁷¡Angdika muihni tapani sulihni duwa kidika dakawang Spirit yaklau suts balna yakat diyulwa yulni kidika! Angdika muihni balna minit bayayakwarang kidika laih maná malni yakat sakkidika diating kakasna karang; dawak kipala pihni as bik dianayang karang, kidika yakat muih ayang wisam as ulna kat muih as bik amanglawas kidika kaunah duwa muihni kidika manah amanglawi.’

¹⁸“Tiatira sutsni innisal yakat bik wauhtaya ultah: ‘Papang Walanibis kidika yaklau aput yulwi, minikpa sihm kuhpau kapat duwa kidika dawak kalni balna kidika laih sihm bras kusna kapat kidika:

¹⁹Yang laih man ais yamtaman kidika bitik amanglatayang; dalani lani dutaman kidika, rahm kulnin lani, warkma, kulnam dulauta barangni lawaman kidika bik amanglatayang, dawak amanglatayang waradika kauh baisa yamtaman muhnilau dai kidika karak dawakat.

²⁰Kaunah man namangyakat di as dutayang: man laih kidika yalni Jezabel yakat yamni talaman, Papang yulni yultayang ta kidika kaunah witing sumalwa kidika karak yang diki yamyang balna yakat alas diyulwi, diyamwakat la munah kalduwas atnin lani kidika yayamwi dawak kasnin dini balna dawan dauh balna yakat sakripais yamna kidika bik kakaswi.

²¹Yang lawik ma kalanayang Papang yakat wiryaklana atnin; kaunah witing laih kidika yamnin dukih kalawas ki dawak bik la munah kalduwas atnin lani kidika bik dawaski.

²²Kaput bahang, kalyamting kat payahnin pāni yakat bukwarang ki, dawak walanibis balna kidika laih imukki ki; dawak angdika muihni balna witing karak marid lani babahwa kidika laih, witingna bik witing yamwa kaput yayamwas karang laih, dalani wauhnin nunuhni sihnayang karang. Kaput laih suts balna bitik amanglalana karang yang laih pasluih, sins dawak isning kidika bik amanglatayang kidika; dawak manna muihmana kat kat mananayang karang ais yamnamana kat kaput.

²⁴Manna namangnakauh laih, Tiatira yakat bangmana kidika kaunah kidika sumalna yulni balna usnit uitas mana kat dawak bik witingna sitan dini balna malni tuhni yakat atwa kidika bik amanglatasmana kat, manayultayang truknin dini ūk laih manatasyang.

²⁵Kaunah ais dutamana kidika apaktanauh, angdika mani yang aiwaki kat.

²⁶Angdika muihni balna minit bayayakwarang kidika dawak yang ais yamnin yultayang kidika yamwi witni kat uiwarang kidika laih, nisan balna minitna yakat parasnina dianayang karang,

²⁷sihm yang Papangki yaklau yang akat yana kapat; dawak nisan balna yakat kabamint kakana karang ayan tulninah karak, dawak bahwi bikikisni yayamna karang sihm sau suba balna kapat. Dawak mapiris yalani nuhni kidika bik dianayang karang.

²⁹¡Angdika muihni tapani sulihni balna duwakat dakawang spirit yaklau suts balna yakat diyulwa yulni kidika!’