Read Mayangna Ribilisan 20 Bible Online

Ribilisan 20 - Mayangna bible

Ribilisan 20

¹Insal as kisang kaupak yaklakwi kaiwakat talnayang dai tingni yakat puksani tuhni kiniting kidika dawak sin nuhni as duaina dai.

²Adika insal yaklau waula yakat sitna dai, muhnilau kau bilni muih alasni yulyang dawak bik satanás kidika, dawak kurih tausin as kaput atnin sin kau sitna dai.

³Puksani tuhni yakat ruhm āwi putsakna dai, dawak dūr kidika minityakat tamp as taihna dai nisan balna yakat alas diyulwas atnin yulni angdika mani kurih tausin kidika laihwarang kat, kidika kurihni balna kaput laihwarang mani kat, uluhna karangki ma buas likatnin yulni.

⁴Trun balna talnayang dai, dawak kidika balna minityakat yalahna bangdai la yamnin parasni duduna dai kidika balna. Jisas sumalna yulni balna yakat dawak Papang yulni yakat bik barangni yulni tunanina dadakna dai kidika sulnina bik talnayang dai. Witingna laih di dutni wayakani dawak wayani yakat bik ayangni tanit nuhni yayamwas dai, dawak muhnina yakat dawak tingnina yakat bik sainni ahawasdai. Dawak watwi sangka kalwi Krais karak kurih tausin king kakawakat talnayang dai.

⁵Kaunah muih ūk dadauna kidika laih sangka kakalwas dai kurih tausin kidika laihwarang kat. Adika ki tatuna watwi yaklaunin kidika.

⁶¡Alasna isningnalak karang angdika muihni balna tatuna watwi yaklaunin yakat dinina duduwa kidika, bahang kidika laih Papang tawanni muihni balna! Wat bu yakat daunin kidika laih witingna minitna yakat parasni as bik diski, kaunah witingna laih Papang dawak Krais sumalniyang balna karangki, dawak witing karak kurih tausin as kidika king kakana karang.

⁷Kurih tausin as kidika bayakwarang usnit kat, satanás laih silak kaupak uluhna karang,

⁸dawak kalahwi sau sutni arungka yakat nisan balna bitik yakat alas diyulna karang, Gog yakat dawak Magog yakat bik, kalbauyang muihni balna duduwa kidika laih, mahni palni ki sihm kuma kauhnimak kapat, uduhna karang kalbauna atnin yulni.

⁹Dawak sau pirihta panuhni munah kikilna dai, dawak Papang tawanni muihni balna ūnina labanni kidika dawak tawan nuhni witing dalani talwa kidika bik awaihwi dadakna dai. Kaunah kisang kaupak kuhpau bukwi bitik busyamna dai.

¹⁰Dawak muih alasni yulyang yaklau alas diyulna dai kidika laih, kuhpau dawak sulhpa lakunni yakat ruhmana dai, di dutni wayakani dawak prapit dauh kidika karak ruhmana dai kidika pāni yakat. Kidika yakat dalani dakakana karang madah dawak pukta ban kaput atnin yakat.

¹¹Trun pihni nuhni as talnayang dai, dawak kidika yakat yalahna sakdai kidika muihni bik. Witing muhni yakat sau dawak kisang kidika barang didisna dai, dawak pa as kau bik watwi talwasdai.

¹²Dawak muih dadauna balna kidika talnayang dai, muihbararak dawak walabis balna bik, trun kidika muhnit yakat yaklauna bangdai; dawak wauhtaya balna kidika apapahna dai, dawak wauhtaya ūk bik, sangka atnin wauhnitaya kidika. Muih dadauna balna kidika laih witingna ais yayamna kat kaput lanina yamna dai dawak bik kidika wauhnitaya balna yakat amput ulna dai kat kaput.

¹³Kuma laih dadauna balna duwasakdai kidika tingni yakat ana dai, dawak daunin kingni lani yakat dadauna balna bangdai kidika bik tingni yakat ana dai; dawak kidika balna bitik laih lanina yamna dai, witingna ais yayamna dai kat kaput.

¹⁴Usnit kat daunin kingni lani kidika laih kuhpau lakunni yakat ruhmana dai. Adika kuhpau lakunni kidika kuduh watbu daunin kidika,

¹⁵dawak sangka atnin wauhnitaya yakat ayangnina disdai kidika balna laih kidika yakat ruhmana dai.